ەربولات دوسايەۆ بولاشاق بالالاردى وڭالتۋ ورتالىعىنىڭ عيماراتىن قايتا قۇرۋ جوباسىن اياقتاۋدى تاپسىردى
الماتى اكىمى ەربولات دوسايەۆ المالى اۋدانىنداعى جۇمىس ساپارى اياسىندا 1950 جىلى سالىنعان بۇرىنعى تەمىرجول گوسپيتالىنىڭ قاراۋسىز قالعان عيماراتىن قايتا جاڭارتۋ جوباسىمەن تانىستى، وندا اۋىسىمدا 250 ادام قابىلدايتىن قالالىق بالالار وڭالتۋ ورتالىعىن اشۋ كوزدەلگەن.
قالا باسشىسىنا «جەتىسۋ-ساۋلەت قۇرىلىسى» ج ش س ازىرلەگەن جوبا تانىستىرىلدى.
«ءبىز قالانىڭ تاريحي ورتالىعىندامىز. زاماناۋي ماتەريالدار مەن جاڭا تەحنولوگيالاردى قولدانىپ، ارحيتەكتۋرالىق كەلبەتتى ەسكەرە وتىرىپ، جوبانى ازىرلەۋ قاجەت»، - دەپ قالا اكىمى ۇسىنىلعان جوبا قازىرگى زامانعى وڭالتۋ ورتالىعىنىڭ تالاپتارىنا ساي كەلمەيتىنىن ايتتى. كومپانياعا بيىل جىل سوڭىنا دەيىن تۇزەتۋلەر ەنگىزۋ جانە اياقتالعان جسق جوباسىن تانىستىرۋ تاپسىرىلدى. قۇرىلىس جۇمىستارى ساراپتامادان وتكەننەن كەيىن 2024 جىلدىڭ مامىرىنا باستالادى دەپ جوسپارلانعان.
المالى اۋدانىنىڭ اكىمى ايدار جاقىبايەۆتىڭ ايتۋىنشا، جاقىن ماڭداعى ۇيلەردىڭ تۇرعىندارى قاراۋسىز قالعان عيماراتقا الاڭداۋلى. وسىعان بايلانىستى مەگاپوليس باسشىسى ەربولات دوسايەۆ قۇرىلىس باسقارماسىنا سيفرلاندىرۋ باسقارماسىمەن بىرلەسىپ، نىساندى پايدالانۋعا بەرگەنگە دەيىن بەينەكامەرالار ورناتۋ جانە قالا تۇرعىندارىنىڭ قاۋىپسىزدىگى ءۇشىن قاراۋسىز قالعان عيماراتتى قورعاۋدى كۇشەيتۋ سىندى ۋاقىتشا شارالار قابىلداۋدى تاپسىردى.
قوعامدىق دەنساۋلىق ساقتاۋ باسقارماسىنىڭ اقپاراتىنا سايكەس، ورتالىق تىرەك-قيمىل اپپاراتى اۋرۋلارى، بالالاردىڭ سەرەبرالدى سال اۋرۋى، باس جانە جۇلىن جاراقاتىنان كەيىنگى جاعداي، داۋن سيندرومى، جۇرەك جانە ەندوكريندىك جۇيە اۋرۋلارى بار 18 جاسقا دەيىنگى بالالاردى كەشەندى وڭالتۋعا ارنالعان. ورتالىقتا وقۋ-تاربيە جانە پسيحولوگيالىق كومەك بولىمشەلەرى جانە مەديسينالىق-وڭالتۋ، 114 ورىندىق ستاسيونارلىق بولىمشە، كۇندىزگى ستاسيونار جۇمىس ىستەيدى.