№1 بالالار ءۇيى تاربيەلەنۋشىلەرى ازايعاندىقتان جابىلىپ، ورنىنا وتباسىن جانە بالالىقتى قورعاۋ ورتالىعى اشىلعان ەدى.
الماتىداعى وربيتا شاعىن اۋدانىندا قاراۋسىز قالعان بۇرىنعى بالالار ءۇيى ماسكۇنەمدەردىڭ مەكەنىنە اينالعان، دەپ حابارلايدى Almaty-akshamy.kz
ءقازىر بۇل عيماراتتىڭ ساۋ تامتىعى قالماپتى. نەگىزگى ماسەلە بۇل ەمەس. جەرگىلىكتى تۇرعىنداردىڭ الاڭداپ وتىرعانى بالالارىنىڭ قاۋىپسىزدىگى. ويتكەنى كەشقۇرىم ۋاقىتتا مۇندا ماسكۇنەمدەر، ناشاقورلار جينالاتىن كورىنەدى. سوندىقتان جازعى دەمالىس كەزىندە بالالارىمىز ءبىر نارسەگە ارانداپ قالا ما دەپ اتا-انالار ۋايىمداپ وتىر.
№1 بالالار ءۇيى بىرنەشە جىل بۇرىن تاربيەلەنۋشىلەرى ازايعاندىقتان جابىلىپ، ورنىنا وتباسىن جانە بالالىقتى قورعاۋ ورتالىعى اشىلعان ەدى. كوپ ۇزاماي ول دا جۇمىسىن توقتاتتى. سودان بەرى مەكەمە بوس تۇر.
اۋماعى شامامەن 20 مىڭ شارشى مەتردى الىپ جاتقان بۇل عيماراتتىڭ قاڭىراپ بوس تۇرعانىنا دا 3 جىلداي ۋاقىت بولىپتى. الماتىدا بالاباقشا مەن مەكتەپ جەتىسپەيدى. وربيتا سەكىلدى ىقشام اۋدانداردا ءتىپتى قۇرىلىس جۇمىستارىن جۇرگىزەتىن بوس ورىن جوق. ال دايىن تۇرعان عيماراتتىڭ نە ءۇشىن قاراۋسىز قالعانىن تۇرعىندار تۇسىنە الماي الەك.
«عيمارات الماتى قالاسى قۇرىلىس باسقارماسىنىڭ بالانسىندا. جانە دە الماتى قالاسىنىڭ قۇرىلىس باسقارماسى 2021 جىلى جەلتوقسان ايىندا جوبالىق-سمەتالىق قۇجاتتاما دايىنداۋ جۇمىسى باستالدى. بۇگىنگى كۇندە وڭ شەشىم ەكسپەرتيزاسى الىندى. جانە دە جاقىن ارادا بيۋدجەتتىك ۇسىنىس قالالىق ءماسليحاتقا بەرىلەدى. اقشا بولىنگەن جاعدايدا كونكۋرستىق راسىمدەر جۇرەدى»، - دەيدى الماتى قالاسى قۇرىلىس باسقارماسى باسشىسىنىڭ ورىنباسارى ايدار نۇرعوجايەۆ.
اكىمدىك وكىلىنىڭ ايتۋىنشا بۇل جەردە 480 ورىندىق بالاباقشا بولادى. كونكۋرستىق راسىمدەر اياقتالسا قىركۇيەك ايىندا قۇرىلىس باستالىپ، كەلەسى جىلدىڭ سوڭىندا اياقتالادى دەپ وتىر.