سايىس تۇڭعىش پرەزيدەنت كۇنى مەن ەل تاۋەلسىزدىگىنىڭ 30 جىلدىعىنا وراي ۇيىمداستىرىلدى
فەستيۆال قالالىق «سپورتتىق الماتى» باعدارلاماسى اياسىندا وتكىزىلدى جانە وعان جەتى مەن 17 جاس ارالىعىندا مىڭداعان جاس سپورتشى قاتىستى، دەپ حابارلايدى Almaty-akshamy.kz.
ولاردىڭ بارلىعى اۋەسقوي جەكپە-جەكپەن اينالىسادى. فەستيۆال بارىسىندا كاراتە-دو شوتوكان، پەنچاك سيلات، قويان-قولتىق ۇرىس، مۋايتاي جانە دجيۋ-دجيتسۋ فۋل كونتاكت تۇرلەرىنەن جارىستار وتكىزىلدى. سايىسقا قالالىق سپورت كلۋبتارىنىڭ 7-17 جاسقا دەيىنگى 1500-گە جۋىق سپورتشى قاتىستى.
«ءبىز جاس سپورتشىلاردىڭ كۇشىن تەك جاتتىعۋ زالىندا عانا ەمەس، وسىنداي ۇلكەن سايىستا تەكسەرۋدى ءجون كوردىك»،-دەيدى «سپورتتىق الماتى» قالالىق باعدارلاماسىنىڭ جەتەكشىسى ەرجان مۋحامانوۆ.
سونىمەن قاتار ول مۇنداي تۋرنيرلەر بالالار مەن جاسوسپىرىمدەردىڭ مىنەزىن قالىپتاستىرىپ، الدىنا ماقسات قويۋعا كومەكتەسەتىنىن جەتكىزدى. وعان قوسا جاستاردىڭ سپورت شەبەرلىگىن دامىتىپ، سالاۋاتتى ءومىر سالتىن ناسيحاتتاي تۇسەدى.
ە. مۋحامانوۆ اتالعان شارانىڭ تۇڭعىش پرەزيدەنت كۇنى مەن ەل تاۋەلسىزدىگىنىڭ 30 جىلدىعىنا وراي وتكىزىلگەنىن اتاپ ءوتتى.
«تاۋەلسىزدىكتىڭ ارقاسىندا ءبىز دۇنيەجۇزىلىك سپورت كەڭىستىگىنە شىعا الدىق، جەتەكشى سپورتتىق تەحنولوگيا مەن وقىتۋ باعدارلامالارىمەن تانىستىق. ونىڭ بارلىعى دەنە تاربيەسى مەن سپورتتى دامىتۋعا ءوز سەپتىگىن تيگىزىپ جاتىر»،-دەدى ول.
ءسوز اراسىندا ول الماتى اكىمدىگى تاراپىنان سپورتتى دامىتۋ جۇمىستارى كوپتەپ جۇرگىزىلىپ جاتقانىن جەتكىزدى.
«ءبىز وتكىزگەن جەكپە-جەك فەستيۆالى كوپتەگەن شارانىڭ ءبىرى عانا. جىل باسىنان بەرى «سپورتتىق الماتى» باعدارلاماسى اياسىندا كوپتەگەن سپورتتىق شارا ءوتتى. جوبا باعدارلاماسىندا – ۆەلوشەرۋ، تاۋعا ورمەلەۋ، مەكتەپتىك سپورتتىق بۇقارالىق شارالار بار»،-دەپ قورىتىندىلادى ەرجان مۋحامانوۆ.
سپورتتىق ءىس-شارانى الماتى قالاسىنىڭ سپورت باسقارماسى الماتى قالاسىنىڭ جاۋىنگەرلىك ونەر اسسوسياسياسىنىڭ قولداۋىمەن وتكىزدى.
