ىسكە اسىرىلعان جوبالار مەن بايقاۋلاردىڭ ناتيجەلەرى بويىنشا جىل قورىتىندىسى شىعارىلدى
2022 جىلدىڭ 27 جەلتوقسانىندا ساعات 11.00-دە قازاقستان رەسپۋبليكاسى مەملەكەتتىك ورتالىق مۋزەيىندە ەلىمىزدەگى بالالار جىلىنىڭ اياقتالۋىنا ارنالعان «ۇلى دالا ۇرپاقتارى» اتتى ءىس-شارا وتەدى، دەپ حابارلايدى Almaty-akshamy.kz.
جىل بويى ق ر ورتالىق مۋزەيى بالالاردى ۇلتتىق قۇندىلىقتارعا باۋلۋعا جانە تاريحي مۇرانى زەرتتەۋگە باعىتتالعان ءىس-شارالاردى جۇزەگە اسىردى، كوپتەگەن رەسپۋبليكالىق كورمەلەر، كونكۋرستار، بالالار فەستيۆالدەرى مەن مەرەكەلەرىن وتكىزدى. ورتالىق مۋزەيدىڭ مادەني-بىلىم بەرۋ جۇمىسىندا ەرەكشە بالالاردى قولداۋعا ارنالعان ينكليۋزيۆتى ءبىلىم بەرۋ باعدارلامالارى جانە وقۋشىلاردى عىلىمي زەرتتەۋلەرگە، جوبالىق جۇمىستارعا تارتۋ ماقساتىندا بايقاۋلار ەرەكشە ورىن الدى. ىسكە اسىرىلعان جوبالار مەن بايقاۋلاردىڭ ناتيجەلەرى بويىنشا جىل قورىتىندىسى شىعارىلدى.
ءىس-شارا باعدارلاماسىندا:
- «مەنىڭ قالامداعى مۋزەي» I رەسپۋبليكالىق عىلىمي جوبالار بايقاۋىنىڭ جەڭىمپازدارىن كەلەسى نوميناسيالار بويىنشا ماراپاتتاۋ:
1. ۇلت ۇستازى ا. بايتۇرسىنوۆ اتىنداعى نوميناسياسى؛
2. «مۋزەي قورىنداعى مەملەكەت جانە قوعام قايراتكەرلەرىنىڭ جانە باسقا دا جەكەلەگەن تاريحي تۇلعالاردىڭ مادەني-مۇراسىنىڭ ۇرپاق تاربيەسىندە الاتىن ورنى»؛
3. «مۋزەي جادىگەرى-رۋحاني قۇندىلىق»؛
4. «مۋزەي قىزمەتىنىڭ ماڭىزى مەن ءمانى (مۋزەيدە قىزمەت اتقارعان جانە اتقاراتىن تۇلعالار)».
- الماتى قالاسى مەن الماتى وبلىسىنىڭ جالپى ءبىلىم بەرەتىن مەكتەپتەرى مەن مەكتەپ-ينتەرناتتارى اراسىنداعى ۇلتتىق ويىندار بويىنشا «مۋزەي كۋبوگى» سپارتاكياداسىنىڭ جەڭىمپازدارىن نوميناسيالار بويىنشا ماراپاتتاۋ: «اسىق اتۋ»، «بەس اسىق»، «توعىز قۇمالاق»، «ارقان تارتۋ».
- «جاس ەكسكۋرسيا جۇرگىزۋشىسى» ۇيىرمەسىنىڭ جەڭىمپازدارى مەن مۇشەلەرىنە سەرتيفيكاتتار تاپسىرىلادى.
- مۋزەيدىڭ ينكليۋزيۆتى باعدارلامالارىن ىسكە اسىرۋ اياسىندا ەرەكشە ءبىلىم بەرۋ قاجەتتىلىكتەرى بار بالالاردىڭ قولدان جاسالعان بۇيىمدارى (سۋرەتتەر مەن قولدان جاسالعان زاتتار) ۇسىنىلاتىن «ءومىر اعاشى - شىعارماشىلىق اعاشى» شىعارماشىلىق بۇرىشىنىڭ اشىلۋى.
- بالالار كوۆوركينگ ورتالىعىندا ەرەكشە بالالارعا ارنالعان «مەنىڭ وتانىم – قازاقستان» مۋزەي ساباعى.
- «ۇلى دالا ۇرپاقتارى» رەسپۋبليكالىق بالالار شىعارماشىلىق كورمەسىمەن تانىستىرۋ.
- بالالار مۋزىكالىق توپتارىنىڭ قاتىسۋىمەن كونسەرتتىك باعدارلاما.