الماتىدا بالالار بايقاۋىن ۇيىمداستىرۋشى الاياقتىق جاسادى دەگەن كۇدىكپەن ۇستالدى.
الماتى قالالىق پوليسيا دەپارتامەنتى كامەلەتكە تولماعان بالالاردىڭ اتا-انالارىنان حالىقارالىق بايقاۋعا قاتىسۋ سىلتاۋىمەن اقشا جيناۋ دەرەگى بويىنشا سوتقا دەيىنگى تەرگەۋ جۇمىستارىن باستادى، دەپ حابارلايدى aqshamnews.kz Polisia.kz-كە سىلتەمە جاساپ.
الدىن الا مالىمەتتەرگە سايكەس، 2024 جىلدىڭ جەلتوقسان ايىندا جاريالانعان ءىس-شارانىڭ ۇيىمداستىرۋشىسى شەتەلدىك بايقاۋعا قاتىسۋدى ۇسىنىپ، اتا-انالاردان قارجىنى ەسەپشوتتار ارقىلى جيناعان. الايدا ۋادەلەرگە قاراماستان، بايقاۋ وتكىزىلمەگەن، بالالار شەتەلگە شىقپاعان جانە قارجى قايتارىلماعان. قازىرگى تاڭدا ەلدىڭ بىرنەشە وڭىرىنەن ازاماتتاردان ارىزدار تىركەلدى. ماتەريالدىق شىعىن كولەمى انىقتالۋ ۇستىندە.
كۇدىكتى ۇستالىپ، ۋاقىتشا ۇستاۋ يزولياتورىنا قامالدى. كەشەندى تەرگەۋ امالدارى جۇرگىزىلۋدە. پوليسيا ازاماتتاردى كامەلەتكە تولماعانداردىڭ ساپارلارىنا قاتىستى كەلىسىمدەر جاساسقاندا قىراعىلىق تانىتۋعا جانە قانداي دا ءبىر ۇسىنىستىڭ زاڭدىلىعىنا كۇمان تۋىنداعان جاعدايدا پوليسياعا جۇگىنۋگە شاقىرادى.