4 ماۋسىم — قازاقستان رەسپۋبليكاسىنىڭ مەملەكەتتىك رامىزدەر كۇنى. بۇل — تۋ، ەلتاڭبا جانە ءانۇران سياقتى ۇلتتىق بولمىسىمىزدى بەينەلەيتىن قۇندىلىقتارعا قۇرمەت كورسەتەتىن ماڭىزدى داتا. الايدا سوڭعى جىلدارى رامىزدەردى قورلاۋ دەرەكتەرى جيىلەپ، قوعامدا الاڭداۋشىلىق تۋعىزىپ وتىر. ەلدى ءدۇر سىلكىندىرگەن قانداي جايتتار بولعان ەدى؟ اqshamnews.kz ءتىلشىسىنىڭ ماتەريالىمەن ەسكە ءتۇسىرىپ كورەيىك.
قوقىستان تابىلعان رامىزدەر
2022 جىلعى 26 ماۋسىمدا الماتى قالاسىندا مەملەكەتتىك تۋ قوقىس سالىنعان جۇك كولىگىنە تيەلىپ تۇرعانى تۇسىرىلگەن ۆيدەو الەۋمەتتىك جەلىنى ءدۇر سىلكىندىردى. وقيعا جەتىسۋ اۋدانىنداعى سەنبىلىك كەزىندە بولعان. ايماقتى تازالاۋشىلار قوقىس قابىنىڭ ورنىنا مەملەكەتتىك تۋدى پايدالانعان.
جاعداي جەلى قولدانۋشىلارىنىڭ نارازىلىعىن تۋدىرىپ، كىنالىلەر جاۋاپقا تارتىلعان بولاتىن.
سۋرەت: اشىق دەرەككوز
ءدال سول جىلى 1 شىلدەدە پاۆلوداردا قۇرىلىس قالدىقتارىنىڭ اراسىنان ەكى ەلتاڭبا تابىلدى. قوقىس جاشىگى اليۋمينيي زاۋىتىنان 10 شاقىرىم جەردە ورنالاسقان.
بۇل وقيعا دا قوعامدىق رەزونانس تۋدىرىپ، قۇقىق قورعاۋ ورگاندارى ق ر قك-نىڭ 372-بابى بويىنشا (مەملەكەتتىك رامىزدەردى قورلاۋ) ءىس قوزعادى. ءتارتىپ بۇزۋشىلارعا 2000 اەك (قازىرگى ەسەپپەن 7 ميلليون تەڭگەدەن استام قاراجات) كولەمىندە ايىپپۇل سالدى.
سۋرەت: اشىق دەرەككوز
2023 جىلعى 7 قازاندا اتىراۋ وبلىسىندا شەتەلدىك كومپانيا بازاسىندا ۇيىلگەن قوقىستىڭ اراسىنان تاعى دا مەملەكەتتىك تۋ تابىلدى. اۋماقتاعى جۇمىسشىلار ونى قوقىستان جيناپ العان. وبلىستىق پوليسيا دەپارتامەنتى قاجەتتى شارالاردى قابىلدادى.
سۋرەت: اشىق دەرەككوز
تانىمال جۇلدىزدار دا تۋعا ءتىل تيگىزدى
2022 جىلى 25 مامىردا الماتىداعى بالۋان شولاق اتىنداعى سپورت سارايىندا "يرينا كايراتوۆنا" توبى مەن Shiza-نىڭ كونسەرتىندە شۋلى وقيعا بولعان ەدى. كەيىن الەۋمەتتىك جەلىلەردە تاراعان ۆيدەودا رەپەر جولشييەۆتىڭ (Shiza - ەسك.) قازاقستان تۋىن قولىنا وراپ، ساحنادا بەيادەپ سوزدەر ايتقانى قازنەتتە تاراپ كەتكەن بولاتىن.
بۇل وقيعا قوعامدا ۇلكەن داۋعا ۇلاستى. وعان سول كەزدەگى ق ر مادەنيەت جانە اقپارات ءمينيسترى داۋرەن ابايەۆ پەن مەملەكەتتىك حاتشى ەرلان قارين دە پىكىر ءبىلدىردى. ال دەپۋتاتتار وسى داۋدان كەيىن مەملەكەتتىك رامىزدەردى قورلاعاندارعا قولدانىلاتىن جازانى كۇشەيتۋدى ۇسىنعان ەدى.
ءانشى ارتىنشا ارەكەتى ءۇشىن كوپشىلىكتەن كەشىرىم سۇرعان بولاتىن.
تۋدى "شۇبەرەككە" تەڭەگەندەر مەن ارابشا جازعانداردىڭ ءىسى
2024 جىلى 14 ساۋىردە تۇركىستاندىق ازامات كولىكتىڭ الدىڭعى تەرەزەسىنە ىلىنگەن تۋدى ۆيدەوعا ءتۇسىرىپ، ونى "شۇبەرەك" دەپ اتاپ، TikTok جەلىسىنە جازبا جۇكتەدى. بەينەجازبادا ايتىلعان سوزدەر مەن ارەكەتتەر ساراپتاماعا جىبەرىلىپ، ناتيجەسىندە ازاماتتىڭ ءىسى "مەملەكەتتىك ءرامىزدى قورلاۋ" دەپ تانىلىپ، جاعداي سوتقا جەتتى.
سوت شەشىمىمەن ول ءبىر جىلعا باس بوستاندىعىن شەكتەۋ جانە 100 ساعاتتىق ءماجبۇرلى جۇمىس جازاسىنا كەسىلدى.
سونداي-اق، 2025 جىلدىڭ 25 ناۋرىزىندا اتىراۋدا نيكاب كيگەن ءتورت قىز مۇز ايدىنىندا قازاقستان تۋىنىڭ ۇستىنە ارابشا "شاحادا" جازۋىن جانە قىلىش بەينەسىن قوسىپ سۋرەتكە تۇسكەن ەدى. بۇل ارەكەت تە شۋعا اينالىپ، پوليسيا دەرەۋ ۇقك-مەن بىرلەسىپ تەرگەۋ جۇرگىزدى، كۇدىكتىلەر انىقتالدى.
كەيىن فوتوداعى ەكى قىزدىڭ كامەلەتكە تولماعانى انىقتالىپ، ولاردىڭ اتا-انالارىنا ايىپپۇل سالىنعان ەدى.
مەملەكەتتىك رامىزدەردى قورلاعاندارعا قانداي جازا قاراستىرىلعان؟
قازاقستان رەسپۋبليكاسىنىڭ قىلمىستىق كودەكسىنىڭ 372-بابىنا سايكەس، مەملەكەتتىك رامىزدەردى قورلاۋ — قىلمىستىق قۇقىق بۇزۋشىلىققا جاتادى. بۇل باپ قازاقستان رەسپۋبليكاسىنىڭ تۋىن، ەلتاڭباسىن نەمەسە ءانۇرانىن كوپشىلىك الدىندا قورلاۋ ارەكەتتەرىنە قاتىستى قولدانىلادى.
قورلاۋ دەپ – رامىزدەردى جىرتىپ، ءبۇلدىرۋ، قوقىسقا تاستاۋ، مازاق ەتۋ، ادەيى ادەپسىز ارەكەت جاساۋ، ولاردى ورىنسىز ماقساتتا پايدالانۋ سياقتى ارەكەتتەردى سانايمىز.
قولدانىلاتىن جازا تۇرلەرى:
-
ايىپپۇل – 2000 ايلىق ەسەپتىك كورسەتكىشكە دەيىن (2025 جىلعى ەسەپ بويىنشا بۇل شامامەن 7 ميلليون تەڭگە)؛
-
تۇزەۋ جۇمىستارى – سوت بەلگىلەگەن مەرزىمگە دەيىن؛
-
قوعامدىق جۇمىستارعا تارتۋ – 120 ساعاتقا دەيىن؛
-
باس بوستاندىعىن شەكتەۋ نەمەسە باس بوستاندىعىنان ايىرۋ – ءبىر جىلعا دەيىن.
سونىمەن قاتار، ىس-ارەكەتتىڭ سيپاتىنا بايلانىستى سوت قوسىمشا جازالار تاعايىنداۋى مۇمكىن (مىسالى، بەلگىلى ءبىر قىزمەتپەن اينالىسۋ قۇقىعىنان ايىرۋ).
بۇل باپ — تەك سيمۆولدى ەمەس، ەلدىڭ ەگەمەندىگى مەن ۇلتتىق قادىر-قاسيەتىن قورعاۋعا ارنالعان. سوندىقتان قازاقستان زاڭناماسى مۇنداي ارەكەتتەرگە توزىمسىزدىكپەن قارايدى.