الماتىدا 6-10 قىركۇيەك ارالىعىندا VIII حالىقارالىق BAIQONYR كينوفەستيۆالى وتەدى، دەپ حابارلايدى Almaty-akshamy.kz.
ونىڭ باستى ميسسياسى - جاس تالانتتى كينەماتوگرافيستەردى قولداۋ.
ءار جىلدارى قازاقستاننان جانە جەر الەمنىڭ تۇكپىر-تۇكپىرىنەن: تبيليسيدەن ياكۋتياعا، تاشكەنتتەن ليسسابونعا دەيىن 85 كينەماتوگرافيست BAIQONYR-دىڭ لاۋرەاتتارى اتانعان. بيىلعى جىلى وتكەن قازاقستان كينوسىنشىلارى قاۋىمداستىعىنىڭ ۇلتتىق سىيلىعىنىڭ جەڭىمپازدارىن ماراپاتتاۋ راسىمىندە BAIQONYR-دىڭ پرەزيدەنتى ءانۋار كەنجەبايەۆ "فەستيۆال قوزعالىسىنا قوسقان ۇلەسى ءۇشىن" ارنايى سىيلىعىنىڭ يەگەرى بولدى. بۇل فەستيۆال بەدەلىنىڭ ءوسۋىنىڭ جارقىن كورسەتكىشى. فەستيۆالدىڭ تاعى ءبىر ەرەكشەلىگى - وسى جىلدار ىشىندە كينوفەستيۆال مەملەكەتتىڭ قارجىلىق قولداۋىنسىز وتكىزىلىپ كەلەدى.
6 قىركۇيەكتە فەستيۆال دارحان تولەگەنوۆتىڭ "اعايىندىلار" فيلمىمەن اشىلادى. بۇل شىعارماشىلىق جولىن "بايقوڭىردان" باستاعان رەجيسسەردىڭ تولىقمەتراجدى دەبيۋتى. كارتينا شەتەلدىك فەستيۆالداردا بىرنەشە ماراپاتتارعا يە بولدى، ولاردىڭ ىشىندەگى ەڭ ماڭىزدىسى – گەرمانياداعى بەدەلدى Oldenburg International Film Festival قازىلار القاسىنىڭ ارنايى جۇلدەسى. تۋىندى وسى جىلدىڭ كۇزىندە پروكاتقا شىعادى دەپ كۇتىلۋدە.
"دارحان تولەگەنوۆتىڭ "اعايىندىلار" فيلمىنەن باسقا، بىزدە ميحايل كۋلۋناكوۆتىڭ "سوقپاق" ءفيلمىنىڭ كونكۋرستان تىس كورسەتىلىمى بولادى. ەكى رەجيسسەر دە كەزىندە ءبىزدىڭ قىسقامەتراجدى فيلمدەر بايقاۋىنا قاتىسقان. ەندى بىزگە تولىقمەتراجدى دەبيۋتتەرىمەن قايتا ورالىپ وتىر. مەنىڭ ويىمشا، بۇل وتە جاقسى بەلگى"، - دەيدى Baiqonyr كينوفەستيۆالىنىڭ باعدارلامالىق ديرەكتورى ەرجان جۇمابەكوۆ.
بيىلعى جىلى سونىمەن بىرگە BAIQONYR اياسىندا جەكە انيماسيالىق كينوفەستيۆال – ALMATY ANIMATION FESTIVAL وتەدى.
كورەرمەندەر "ارمان" كينوورتالىعىندا كورەتىن جالپى كونكۋرستىق باعدارلاما كەلەسىدەي:
* BAIQONYR فەستيۆالى، ونىڭ ىشىندە حالىقارالىق كوركەم جانە دەرەكتى قىسقامەتراجدى فيلمدەر بايقاۋى (6 ەلدەن 18 فيلم) جانە ۇلتتىق كوركەم جانە دەرەكتى قىسقامەتراجدى فيلمدەر بايقاۋى (20 فيلم)؛
* ALMATY ANIMATION FESTIVAL فەستيۆالى، ونىڭ ىشىندە نەگىزگى بايقاۋ (21 فيلم، 4 ەل، سونداي-اق رەسەي، فرانسيا جانە كانادا بىرلەسىپ شىعارعان فيلم) جانە حالىقارالىق ستۋدەنتتىك انيماسيالىق فيلمدەر بايقاۋى (23 تۋىندى).
كونكۋرستان تىس باعدارلاما دا قىزىقتى بولادى دەپ كۇتىلۋدە. كينوفەستيۆال اياسىندا تمد ەلدەرىنىڭ كينوتانۋشىلارى مەن سىنشىلارىنىڭ II فورۋمى وتەدى، ونىڭ جۇمىسىنا ءارتۇرلى ەلدەردەن 20-دان استام مامان قاتىسادى. ءبىلىم بەرۋ باعدارلاماسى كەڭىنەن ۇسىنىلعان: تانىمال شەبەرلەردىڭ دارىستەرى، كينويندۋستريانىڭ وزەكتى ماسەلەلەرى بويىنشا دوڭگەلەك ۇستەلدەر، جاڭا جوبالاردىڭ تۇساۋكەسەرلەرى.
كونكۋرستان تىس باعدارلامانىڭ ماڭىزدى وقيعاسى 8 قىركۇيەكتە وتەتىن كورەي انيماسيالىق كينو كۇنى بولماق. ول كورەي-قازاق انيماسياسىنىڭ ۇلكەن ارنايى جوباسى اياسىندا وتكىزىلەدى. كورەي تاراپىنان سەرىكتەس پۋچحونداعى حالىقارالىق انيماسيا فەستيۆالى (BIAF).
ءىس-شاراعا وڭتۇستىك كورەيادان انيماسيالىق رەجيسسەرلەر لي سون گان مەن يم چەرين كەلەدى. ولار ءوز جۇمىستارىن ۇسىنىپ، كورەرمەندەردىڭ سۇراقتارىنا جاۋاپ بەرەدى. سونىمەن قاتار، چەرين ءدارىس وقيدى، ال لي سون گان قازاقستاندىق جاس اۆتورلارعا شەبەرلىك ساباعىن وتكىزەدى.
كينورەجيسسەرلارمەن بىرگە K-pop مۋزىكاسىنىڭ ءوسىپ كەلە جاتقان جۇلدىزى پەك ا ون-دە كەلەدى، ول فيلمدەردىڭ بىرىندە باستى كەيىپكەردى دىبىستاعان. K-pop جانرىنىڭ جانكۇيەرلەرىن ۇلكەن توسىن سىي كۇتىپ تۇر – ولار پەك ا ءوننىڭ ەكى ءانىن جاندى داۋىستا تىڭداي الادى.
فەستيۆال ءداستۇرلى تۇردە تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىق قورىنىڭ قولداۋىمەن وتكىزىلەدى.
فەستيۆالدىڭ اقپاراتتىق سەرىكتەستەرى: «حابار» اگەنتتىگى، «الماتى» تەلەكانالى، «ەلدوراديو» جانە «جۋلدىز» راديوستانسيالارى، «ەگەمەن قازاقستان»، «كازاحستانسكايا پراۆدا»، «انتەننا كازاحستان»، «ۆرەميا» باسىلىمدارى، Orda.kz، Baribar.kz، 365info، Global.news.kz، BAQ.kz، QAZ365.kz، PRO Production ينتەرنەت-پورتالدارى جانە JAS ONER جۋرنالى.