باعانىڭ نەگىزسىز وسۋىنە جول بەرمەۋ ءۇشىن وتاندىق تاۋار وندىرۋشىلەرمەن جۇمىس جۇرگىزىلۋدە.
الماتى اكىمى ەربولات دوسايەۆتىڭ توراعالىعىمەن مەملەكەتتىك ورگاندار مەن ازىق-تۇلىك ساۋدا نىساندارىنىڭ وكىلدەرىمەن جۇمىس كەڭەسى ءوتتى، دەپ حابارلايدى Almaty-akshamy.kz
الماتىنىڭ كاسىپكەرلىك جانە ينۆەستيسيالار باسقارماسىنىڭ مالىمەتىنشە، قازىرگى ۋاقىتتا ازىق-تۇلىك تاۋارلارىنىڭ باعاسىن تۇراقتاندىرۋ ماقساتىندا اۋداندىق اكىمدىكتەرمەن بىرلەسىپ، ساۋدا جەلىلەرىنىڭ، بازارلار مەن «ءۇي جانىنداعى» دۇكەندەردىڭ سورەلەرىندەگى باعالارعا كۇندەلىكتى مونيتورينگ جۇرگىزىلۋدە. سوڭعى اپتادا كوكونىس ونىمدەرىنە باعانىڭ شامالى اۋىتقۋىنان باسقا، ءامات باعاسىنىڭ كۇرت ءوسۋى بايقالمادى، بۇل ءونىمدى ساقتاۋ شىعىندارىمەن بايلانىستى.
باعانىڭ نەگىزسىز وسۋىنە جول بەرمەۋ ءۇشىن وتاندىق تاۋار وندىرۋشىلەرمەن جۇمىس جۇرگىزىلۋدە. ءتيىمدى تەتىكتەردىڭ ءبىرى «جەڭىلدەتىلگەن» زاەمدار بەرۋ باعدارلاماسى بولىپ تابىلادى، ونىڭ اياسىندا وندىرۋشىلەر مەن ساۋدا جەلىلەرىنە باعانى ۇزاق مەرزىمگە بەلگىلەۋ ءۇشىن پايىزسىز «اينالىمدى» قارىزدار بەرىلەدى. بۇگىندە وسى باعدارلاما اياسىندا جۇمىرتقا وندىرەتىن ءىرى «الساد قازاقستان» جشس-مەن (نارىق ۇلەسىنىڭ 30%-ىن الادى) كەلىسىم جاسالدى، 2024 جىلعى 31 قاڭتارعا دەيىن وتكىزۋ باعالارى بويىنشا ون جۇمىرتقانىڭ باعاسى 400 تەڭگە دەڭگەيىندە تىركەلدى. كەلىسىمنىڭ قولدانىسقا ەنۋىنەن باستاپ جۇمىرتقا باعاسىن تۇراقتاندىرۋ بويىنشا وڭ ناتيجە بايقالدى، ياعني ون جۇمىرتقانىڭ باعاسى 487-دەن 462 تەڭگەگە دەيىن تومەندەدى.
جەڭىلدەتىلگەن زاەمدار اعىمداعى جىلدىڭ ءساۋىر ايىنىڭ سوڭىنا دەيىن باعانى تۇراقتاندىرۋ ءۇشىن «ماگنۋم» (ءامات 19 اتاۋىنا 5،7 ملرد تەڭگە) جانە «تويمارت» (ءامات 12 اتاۋىنا 430،2 ملن تەڭگە) ساۋدا جەلىلەرىنە بەرىلدى. ءونىمدى الدىن الا ساتىپ الۋ ەسەبىنەن "ماگنۋم" جەلىسىندەگى بولشەك ساۋدا باعاسى ورتاشا قالالىق باعادان 10-15%-عا تومەن. مىسالى، «ماگنۋمدا» قانتتىڭ ءبىر كيلوسى 265 تەڭگە، ال ورتاشا نارىقتىق باعا 360 تگ/كگ-عا دەيىن جەتەدى. ەگىن جيناۋ ماۋسىمىندا فەرمەرلەردەن كوكونىستەردى تومەن باعامەن ساتىپ الۋ ەسەبىنەن ماۋسىمارالىق كەزەڭدە (2021 جىلعى قىركۇيەكتەن 2022 جىلعى ساۋىرگە دەيىن) سورەدەگى باعا نارىقتىق باعادان 30%-عا دەيىن تومەن دەڭگەيدە تىركەلدى.
كەڭەستىڭ جۇمىسىن قورىتىندىلاعان الماتى اكىمى ەربولات دوسايەۆ باسقا ساۋدا جەلىلەرىنىڭ وكىلدەرىن جەڭىلدەتىلگەن «اينالىم» قارىزدارىن بەرۋدىڭ قالالىق باعدارلاماسىنا بەلسەندى قاتىسۋعا شاقىردى، سونداي-اق ءىرى نارىق وكىلدەرىن باعانىڭ نەگىزسىز كوتەرىلۋىنە جول بەرمەۋ تۋرالى ەسكەرتتى.
«دەلدالدىق سىزبالاردى» تەكسەرۋ جونىندە كوميسسيا قۇرۋ تۋرالى شەشىم قابىلداندى. كوميسسيا اياسىندا ازىق-تۇلىك تاۋارلارىن وندىرۋشىلەر مەن جەتكىزۋشىلەرگە ساراپتاما جۇرگىزۋ، قايتا ساتىپ الۋشىلار تىزبەگىن انىقتاۋ جانە تىيۋ، ءامات باعالارىنا مونيتورينگتى كۇشەيتۋ، ساۋدا ۇستەمەسىنىڭ 15%-دان اسۋى انىقتالعان جاعدايدا ءتيىستى شارالار قابىلداۋ قاجەت»، - دەپ اتاپ ءوتتى ەربولات دوسايەۆ.
قالا باسشىسىنىڭ ايتۋىنشا، الماتى وبلىسىنداعى ارىپتەستەرمەن بىرلەسە وتىرىپ، «التىن وردا» ءىرى بازارىندا «دەلدالدىق سىزبالاردى» انىقتاۋ بويىنشا ءوءڭىرارالىق كوميسسيا قۇرىلادى، ول جەردەن مەگاپوليسكە 80%-عا دەيىن كوكونىس، جەمىس-جيدەك پەن ەت جەتكىزىلەدى. باستى مىندەت – ازىق-تۇلىك تاۋارلارىنىڭ باعاسىن ۇستاپ تۇرۋ جانە ينفلياسيالىق پروسەستەردى تومەندەتۋ جونىندەگى جۇمىستى كۇشەيتۋ.