الەۋمەتتىك ماڭىزى بار ازىق-تۇلىك تاۋارلارىنا باعانىڭ نەگىزسىز وسۋىنە جول بەرمەۋ جانە بەلگىلەنگەن ساۋدا ۇستەمەسىن ساقتاۋ ماقساتىندا الماتى قالاسى اكىمدىگى Magnum، Small جانە Toimart ءىرى ساۋدا جەلىلەرىمەن باعانى تۇراقتاندىرۋ جونىندە مەموراندۋمعا قول قويدى.
قۇجات اياسىندا ساۋدا جەلىلەرى بيىلعى جىلدىڭ سوڭىنا دەيىن الەۋمەتتىك ماڭىزى بار ازىق-تۇلىك تاۋارلارىنا ساۋدا ۇستەمەسىن 15%-دان اسىرماي، باعانى تۇراقتى دەڭگەيدە ۇستاپ تۇرۋعا دايىن ەكەنىن راستادى.
مەموراندۋمعا قول قويۋدىڭ باستى ماقساتى – باعا تۇراقتىلىعىن قامتاماسىز ەتۋ، تۇرعىنداردى قولداۋ جانە ءبىرىنشى قاجەتتىلىكتەگى ونىمدەردىڭ الىپساتارلىق جولمەن قىمباتتاۋىنا جول بەرمەۋ.
الماتى قالاسىنىڭ كاسىپكەرلىك جانە ينۆەستيسيالار باسقارماسى وڭىرلىك جەتكىزىلىمدەردى دامىتۋ جانە وتاندىق وندىرۋشىلەردى قولداۋ باعىتىندا جۇيەلى جۇمىس جۇرگىزىپ كەلەدى. بۇل شارالار تاۋارلىق قور قالىپتاستىرۋعا جانە قالا نارىعىن ازىق-تۇلىك ونىمدەرىمەن ۇزدىكسىز قامتاماسىز ەتۋگە مۇمكىندىك بەرەدى.
باعانى تۇراقتاندىرۋ ماقساتىندا وتاندىق وندىرۋشىلەردىڭ ونىمدەرىن تىكەلەي جەتكىزۋ ۇيىمداستىرىلعان. ءقازىر ولاردىڭ ونىمدەرى ءىرى ساۋدا جەلىلەرىنىڭ سورەلەرىنە قويىلعان:
– «الاتاۋ-كۋس» اق، «وتان گرين فۋد» ج ش س جانە «ناۋرىز اگرو» ج ش س وندىرەتىن قۇس ەتى؛
– «سارى-بۇلاق» ءجشس-نىڭ ءى ساناتتاعى جۇمىرتقاسى؛
– «اسىل ءدان» ءجشس-نىڭ كۇرىشى؛
– «كايستينۆەست» ءجشس-نىڭ قانتى.