الماتىدا ءازىربايجان مەن ارمەنيا كەلىسسوزى وتەدى

بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى.

قازاقستان ءازىربايجان مەن ارمەنياعا كەلىسسوز الاڭىن ۇسىنادى، دەپ حابارلايدى Almaty-akshamy.kz

رەسمي وكىلدىڭ ايتۋىنشا، پرەزيدەنت قاسىم-جومارت توقايەۆ باكۋگە دە، ەريەۆانعا دا جاساعان ساپارىندا ەكى ەل اراسىندا بەرىك، ۇزاق مەرزىمدى بەيبىتشىلىكتى تەز ارادا ورناتۋدىڭ ماڭىزىن اتاپ وتكەن. وسىعان بايلانىستى قازاقستاننىڭ كەلىسسوز وتكىزۋ ءۇشىن الاڭ ۇسىنۋى ەكى مەملەكەتكە كومەكتەسكىسى كەلەتىنىن كورسەتەدى.

«شىنىندا دا وسىنداي كەلىسسوزدى الماتىدا وتكىزۋ جوسپارلانىپ وتىر. ءبىز ءازىربايجان مەن ارمەنياداعى ارىپتەستەرىمىزبەن بايلانىستامىز. الداعى كەلىسسوزدەر تەك ەكى تاراپ اراسىندا جۇرگىزىلەدى. استانانىڭ دەلدالدىعى تۋرالى ءسوز جوق ەكەنىن اتاپ وتكىم كەلەدى. ءبىز تەك Good office دەپ اتالاتىن ىزگى نيەت قىزمەتىن كورسەتەمىز. كولىسسوزدىڭ وتەتىن كۇنى نەمەسە باسقا اقپارات قوسىمشا حابارلانادى»، - دەدى ايبەك سمادياروۆ سىم-دە وتكەن باسپا ءسوز ءماسليحاتىندا.

رەسمي وكىل كەلىسسوزدى وتكىزۋگە بيۋدجەت قارجىسى كوپ جۇمسالمايتىنىن دا اتاپ ءوتتى.

«بۇل اۋقىمدى شارا ەمەس. قازاقستان قانداي دا ءبىر شىعىندى وتەۋى مۇمكىن. الايدا قوس تاراپ مامىلەگە كەلىپ جاتسا، ونىڭ پايداسى تۇتاس ايماققا تيەدى» - دەدى ول.