سەبەبى – ولار زاڭسىز قايتا جابدىقتالعان.
الماتىدا جول-كولىك وقيعالارىنىڭ الدىن الۋ جانە ولاردىڭ سالدارىن ازايتۋ ماقساتىندا "ءقاۋىپسىز جول" رەسپۋبليكالىق جەدەل-الدىن الۋ ءىس-شاراسى باستالدى، - دەپ حابارلايدى aqshamnews.kz Polisia.kz-كە سىلتەمە جاساپ.
اتالعان شارانىڭ نەگىزگى ماقساتى – جول قوزعالىسى قاۋىپسىزدىگىن قامتاماسىز ەتۋ، قوعامدىق ءتارتىپتى ساقتاۋ جانە كولىك اپاتتارىنىڭ سانىن ازايتۋ. سونداي-اق جۇرگىزۋشىلەر اراسىندا پروفيلاكتيكالىق جۇمىستاردى كۇشەيتىپ، جول قوزعالىسى ەرەجەلەرىنىڭ ساقتالۋىن قاتاڭ باقىلاۋعا الۋ. "ءقاۋىپسىز جول" شەڭبەرىندە پوليسيا قىزمەتكەرلەرىنە جۇكتەلگەن باستى مىندەت – جول قوزعالىسى ەرەجەلەرىن بۇزۋ دەرەكتەرىن انىقتاۋ جانە ولاردىڭ الدىن الۋ.
ولاردىڭ قاتارىندا ماس كۇيىندە كولىك باسقارۋ، قاراما-قارسى قوزعالىس جولاعىنا شىعۋ، قاۋىپسىزدىك بەلدىگىن تاقپاۋ، كولىك جۇرگىزۋ كەزىندە تەلەفون پايدالانۋ سىندى ورەسكەل قۇقىق بۇزۋشىلىقتار بار. سونىمەن قاتار اپاتتىق جاعداي تۋدىرۋى مۇمكىن كولىك قۇرالدارىن انىقتاۋعا ەرەكشە نازار اۋدارىلادى.
جولاۋشىلار مەن جۇكتەردى اۆتوموبيل كولىگىمەن تاسىمالداۋ كەزىندەگى قاۋىپسىزدىك ماسەلەسى دە باستى نازاردا. وسى ماقساتتا پوليسيا قىزمەتكەرلەرى اۆتوپاركتەر مەن تۇراقتاردى ارالاپ، جۇرگىزۋشىلەرمەن ءتۇسىندىرۋ جۇمىستارىن جۇرگىزۋدە. سونداي-اق وقۋ ورىندارىندا ستۋدەنتتەرگە ارنالعان قاۋىپسىزدىك تاقىرىبىنداعى سەمينارلار وتكىزۋ جوسپارلانعان.
«تاڭەرتەڭ جۇرگىزىلگەن رەيد بارىسىندا قالاارالىق ەكى اۆتوبۋس جولدان شىعارىلدى. تەكسەرۋ بارىسىندا ولاردىڭ زاڭسىز قايتا جابدىقتالعانى انىقتالدى. بۇل ءبىزدىڭ تاجىريبەمىز كورسەتكەندەي، ورنى تولماس قايعىلى وقيعالارعا سەبەپ بولۋى مۇمكىن»، - دەدى الماتى قالالىق پد جەرگىلىكتى پوليسيا قىزمەتى باسقارماسى باسشىسىنىڭ ورىنباسارى تيمۋر نوعايبايەۆ.