الماتىدا جىل باسىنان بەرى اۆتوبۋستاردا بيلەتسىز جۇرگەن 270 جولاۋشى انىقتالعان. ولارعا قانداي شارا قولدانىلادى؟ قوعامدىق كولىكتەگى قاۋىپسىزدىك قانداي؟ مەتروعا قانشا ادام مىنەدى؟ بۇل سۇراقتاردىڭ جاۋابىن ءبىلۋ ءۇشىن اqshamnews.kz الماتى قالالىق موبيلدىلىك باسقارماسىنا ارنايى ساۋال جولدادى.
ۆەدومستۆو مالىمەتىنشە، 2025 جىلدىڭ باسىنان بەرى "الماتىەلەكتركولىك" ج ش س باقىلاۋ-تەكسەرۋ قىزمەتى قوعامدىق كولىكتە 270 بيلەتسىز جولاۋشىنى انىقتادى.
ولارعا قانداي جازا قولدانىلدى؟
- 200 ادامعا قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 622-بابى (قوعامدىق كولىكتە بيلەتسىز جول ءجۇرۋ) بويىنشا اكىمشىلىك حاتتاما تولتىرىلىپ،
- 70 جولاۋشىعا پروفيلاكتيكالىق نۇسقاۋلىق جۇرگىزىلدى.
"باقىلاۋ ءىس-شارالارى قوعامدىق كولىكتە جولاقىسىن تولەۋ مادەنيەتىن قالىپتاستىرۋعا جانە زاڭبۇزۋشىلىقتاردى ازايتۋعا باعىتتالعان. مۇنداي تەكسەرۋلەر تۇراقتى تۇردە جالعاسادى"، - دەلىنگەن جاۋاپتا.
الايدا ۆەدومستۆو وكىلدەرى قانداي جاعدايدا حاتتاما تولتىرىلىپ، قانداي جاعدايدا نۇسقاۋلىق جۇرگىزىلەتىنىن تۇسىندىرمەدى.
جاڭا ورتالىق كولىك ساپاسىن قالاي باقىلايدى؟
2025 جىلى الماتى اكىمدىگىنىڭ باستاماسىمەن "الماتى قالاسىنىڭ جول قوزعالىسىن ۇيىمداستىرۋ ورتالىعى" ج ش س قۇرىلعان. ءقازىر بۇل ورتالىق قوعامدىق كولىكتە بيلەتسىز جولاۋشىلاردى انىقتاۋ ءىسىن جۇيەلى ۇيىمداستىرۋ ماسەلەسىن قاراستىرىپ وتىر. سونىمەن قاتار، ورتالىق اۆتوبۋس پاركتەرىنىڭ ساپا كريتەرييلەرىن قاداعالايدى. اتاپ ايتقاندا:
-
اۆتوبۋستاردىڭ تەحنيكالىق جاعدايى؛
-
جۇرگىزۋشىلەردىڭ بىلىكتىلىگى؛
-
جول قوزعالىسى ەرەجەلەرىن ساقتاۋ دەڭگەيى؛
-
قاۋىپسىزدىك قۇرالدارىنىڭ بولۋى مەن جارامدىلىعى (قاۋىپسىزدىك بەلدىكتەرى، ورتسوندىرگىش، اۆاريالىق شىعۋلار)؛
-
ناۆيگاسيالىق جابدىقتاردىڭ جۇمىس ىستەۋى.
قوعامدىق كولىكتەردە نە بولۋعا ءتيىس؟
بۇگىندە الماتىدا 2500-گە جۋىق كونديسيونەرمەن جابدىقتالعان اۆتوبۋس قاتىنايدى.
"ءاربىر اۆتوبۋستا العاشقى مەديسينالىق كومەك قوبديشاسى بولۋى مىندەتتى. ونىڭ بار-جوعى مەن جارامدىلىعىن كولىكتىك باقىلاۋ ينسپەكسياسى مەن پوليسيا دەپارتامەنتى بىرلەسىپ تەكسەرىپ وتىرادى"، - دەپ جاۋاپ بەردى ۆەدومستۆو وكىلدەرى.
سونىمەن قاتار، اۆتوبۋس جۇرگىزۋشىلەرى ءۇشىن جول قوزعالىسى قاۋىپسىزدىگى جانە العاشقى مەديسينالىق كومەك كورسەتۋ بويىنشا جۇيەلى تۇردە نۇسقاۋلىقتار وتكىزىلەدى.
جاڭا كولىك جوبالارى
قالادا كولىك ينفراقۇرىلىمىن دامىتۋ ماقساتىندا جاڭا مەترو ستانسيالارى مەن BRT (جۇردەك اۆتوبۋس كولىگى) جەلىسى سالىنىپ جاتىر. رايىمبەك داڭعىلىندا BRT قۇرىلىسى بەلسەندى جۇرگىزىلەدى.
سونداي-اق، ەكولوگيالىق كولىكتى دامىتۋ ماقساتىندا ديزەل اۆتوبۋستاردى گاز جانە ەلەكتر ەنەرگياسىمەن جۇرەتىن اۆتوبۋستارعا اۋىستىرۋ جۇمىستارى جالعاسىپ جاتىر.
2024 جىلى "الماتىەلەكتركولىك" 600 گاز جانە 100 ەلەكتراۆتوبۋستاردى ساتىپ الدى. جەكەمەنشىك پاركتەر دە جىل اياعىنا دەيىن ەكولوگيالىق اۆتوبۋستاردى الۋدى جوسپارلاپ وتىر.
الماتىدا قانشا مارشرۋت سۋبسيديالانادى؟
ءقازىر الماتىدا 206 الەۋمەتتىك ماڭىزى بار مارشرۋت مەملەكەت تاراپىنان سۋبسيديالانادى. بيىلعا ارنالعان سۋبسيديا كولەمى شامامەن 140 ميلليارد تەڭگە بولدى.
اۆتوبۋس پاركتەرىنىڭ جاعدايى
كوممۋنالدىق اۆتوبۋس پاركتەرىندە جۇرگىزۋشىلەر مەن قىزمەتكەرلەرگە ارنالعان جاتاقحانا مەن دەمالىس ورىندارى قاراستىرىلعان. بۇل عيماراتتار زامان تالاپتارىنا ساي جابدىقتالعان.