سونىڭ سالدارىنان 3 ادام قازا تاۋىپ، 55 ادام جاراقات العان.
الماتىدا جىل باسىنان بەرى اۆتوبۋس جۇرگىزۋشىلەرىنىڭ كىناسىنەن 170 جكو ورىن الدى، دەپ حابارلايدى Polisia.kz
«ءقاۋىپسىز جول» جەدەل الدىن الۋ ءىس-شاراسى اياسىندا جولاۋشىلار تاسىمالىمەن اينالىساتىن اۆتوكولىك كاسىپورىندارىنا، قالانىڭ جول جاعدايىندا اۆتوبۋستاردىڭ تەحنيكالىق جاعدايىنا، دۇرىس جۇمىس ىستەۋىنە مۇقيات تەكسەرۋ ۇيىمداستىرىلدى.
«وسىلايشا، ءبىز كولىك قۇرالىندا جولاۋشىلار مەن جۇكتى تاسىمالدايتىن جۇرگىزۋشىلەردىڭ كولىكتىك جانە ەڭبەك ءتارتىبىن جاقسارتۋ، تەحنيكالىق اقاۋى بار نەمەسە قايتا جابدىقتالعان جولاۋشىلار كولىگىن پايدالانۋ دەرەكتەرىنىڭ الدىن الۋ، سونداي-اق زاڭسىز جولاۋشىلار تاسىمالىنىڭ جولىن كەسۋ ماقساتىن كوزدەپ وتىرمىز. بۇل جۇمىسقا مۇددەلى مەملەكەتتىك ورگانداردىڭ دا، ازاماتتىق اليانستىڭ وكىلدەرى دە بارىنشا جۇمىلدىرىلعان»، – دەدى الماتى قالالىق پد اكىمشىلىك پوليسيا باسقارماسى باستىعىنىڭ ورىنباسارى بولاتبەك باياتانوۆ.
پوليسەيلەر قابىلدانعان شارالارعا قاراماستان، قوعامدىق كولىك جۇرگىزۋشىلەرى جول قوزعالىسى ەرەجەلەرىن ورەسكەل بۇزىپ، جول-كولىك وقيعالارىنا جول بەرىپ جاتقانىن اتاپ ءوتتى. تەك جىل باسىنان بەرى اۆتوبۋس جۇرگىزۋشىلەرىنىڭ كىناسىنەن 170 جول-كولىك وقيعاسى ورىن الىپ، سونىڭ سالدارىنان 3 ادام قازا تاۋىپ، 55 ادام جاراقات العان. سونىمەن قاتار، قوعامدىق كولىكتە جولاۋشىلاردىڭ قۇلاۋى وتە ءجيى كەزدەسەدى، ول نەگىزىنەن شۇعىل تەجەۋ نەمەسە كەرىسىنشە، كۇرت قوزعالۋ سالدارىنان ورىن الادى. 2021 جىلى اۆتوبۋستىڭ ىشىندە قۇلاعاننان 328 جولاۋشى زارداپ شەكتى. سونداي-اق، 2022 جىلدىڭ باسىنان بەرى پد-نىڭ الدىڭعى شەپتەگى بولىمشەلەرىنىڭ قىزمەتكەرلەرى قوعامدىق كولىك جۇرگىزۋشىلەرىنىڭ 286 جول ەرەجەسىن بۇزۋ دەرەگىن انىقتادى.
«الماتى قالاسىندا 21 اۆتوكاسىپورىن جۇمىس ىستەيدى، ولاردىڭ بالانسىندا 147 باعىت بويىنشا جولاۋشىلار تاسىمالىمەن اينالىساتىن 2200-دەن استام اۆتوبۋس پەن 160 تروللەيبۋس بار. قوعامدىق كولىكتەردىڭ قاتىسۋىمەن ورىن العان جول-كولىك وقيعالارىنىڭ جاعدايى ءالى دە الاڭداتادى. كەيبىر اۆتوبۋس جۇرگىزۋشىلەرىنىڭ كولىك ءتارتىبى وتە تومەن دەڭگەيدە قالىپ وتىر. اۆتوپاركتەردىڭ باسشىلىعى جۇرگىزۋشىلەرگە باقىلاۋ جۇرگىزبەيدى، جۇرگىزۋشى كۋالىگىنىڭ بار-جوعىن، سونداي-اق جەلىگە شىعار الدىندا تەحنيكالىق جاعدايىن تەكسەرمەيدى. ولار ەكولوگيالىق جانە تەحنيكالىق تالاپتارعا ساي كەلمەيتىن اۆتوبۋستاردى جەلىگە شىعارۋدى جالعاستىرۋدا»، – دەيدى ب. باياتانوۆ.
قازىرگى ۋاقىتتا الماتى جولدارىندا پاترۋلدىك پوليسيا جاساقتارىنىڭ تىعىزدىعى ارتتى. پروفيلاكتيكالىق جانە رەيدتىك ءىس-شارالار جالعاسۋدا