الماتىدا اۆتوبۋس اپاتىنا كىنالى جۇرگىزۋشىگە قاتىستى سوت ۇكىمى شىقتى

الماتىدا ادام ولىمىنە اكەپ سوققان جول اپاتىنا كىنالى № 98 اۆتوبۋس جۇرگىزۋشىسىنە قاتىستى سوت ۇكىمى شىقتى، دەپ حابارلايدى Almaty-akshamy.kz.

الماتى قالاسى المالى اۋداندىق سوتىندا ق ر قىلمىستىق كودەكسىنىڭ 345-بابىنىڭ 3-بولىگى (ابايسىزدا ادام ولىمىنە اكەپ سوقتىرعان جول قوزعالىسى ەرەجەلەرىن بۇزۋى) بويىنشا ا.-عا قاتىستى قىلمىستىق ءىس قارالدى.

سوت انىقتاعانداي، 2022 جىلى 8 قاراشا كۇنى ساعات 14:00 شاماسىندا سوتتالۋشى ا.، ابىلاي حان كوشەسىنىڭ بويىمەن وڭتۇستىك باعىتتا No98 اۆتوبۋستى باسقارىپ، ابىلاي حان جانە تولە بي كوشەلەرىنىڭ قيىلىسىندا جول قوزعالىسى ەرەجەسىن ەلەمەي، باعدارشامنىڭ تىيىم سالىنعان قىزىل تۇسىنە ءوتىپ، تولە بي كوشەسىمەن كەلە جاتقان №201 اۆتوبۋسپەن سوقتىعىسقان.

جول-كولىك وقيعاسىنىڭ سالدارىنان No98 اۆتوبۋستىڭ جولاۋشىلارى دالاعا ۇشىپ كەتتى، جابىرلەنۋشى ي. اۆتوبۋس استىندا قالىپ، العان جاراقاتىنان قايتىس بولدى. ەكى ادام ك. جانە ش. ءارتۇرلى دەنە جاراقاتىن الدى.

سوت وتىرىسىندا سوتتالۋشى كىناسىن مويىنداعان جوق، ءوزىن اقتاۋدى سۇرادى. سوت ايىپتالۋشىنىڭ 3 كىشكەنتاي بالاسى بارىن جانە كىناسىن جەڭىلدەتەتىن جاعدايلاردى ەسكەرىپ، ونى ەكى جارىم جىلعا باس بوستاندىعىنان ايىردى. سونىمەن قاتار ا. 5 جىلعا كولىك قۇرالىن باسقارۋ قۇقىعىنان ايىرىلدى. بۇدان بولەك، ش. جانە ك.-نىڭ پايداسىنا مورالدىق شىعىن رەتىندە 2 ملن تەڭگە، ش.-نىڭ پايداسىنا 323 885 تەڭگە ماتەريالدىق شىعىن ءوندىرىلدى.

سوت ۇكىم زاڭدى كۇشىنە ەنگەن جوق.