ايلاردىڭ سۇلتانى رامازانعا دا جەتتىك. ال بۇل ايدا ورازا ۇستاۋ – دەنى ساۋ باليعات جاسىنا تولعان ءاربىر مۇسىلمانعا پارىز.
اۋىز بەكىتكەن مۇسىلمان سارەسىن ۇيىنەن ءىشىپ شىققانمەن، قالانىڭ قاربالاس شارۋاسىمەن، قاپتاعان كولىك كەپتەلىسىمەن اۋىزاشاردا ۇيىنە جەتە الماۋى دا مۇمكىن. نەمەسە ورازا تۇتقان جاقىندارىنا اۋىزاشار بەرۋگە نيەتتەنىپ، ءبىراق ۇيىندە قوناق كۇتۋگە ۋاقىتى، مۇرشاسى بولا بەرمەيتىندەر دە بار. وسىنداي كەزدە قوعامدىق تاماقتاندىرۋ ورىندارىنا جۇگىنۋگە تۋرا كەلەدى.
الماتىدا نە كوپ، كافە مەن رەستوران كوپ. الماتى اقشامى سايتىنىڭ ءتىلشىسى سولاردىڭ ءبىرشاماسىنا حابارلاسىپ، رامازان ايىنداعى اۋىزاشار باعاسىن بىلگەن ەدى. قالامىزدا تاماقتاناتىن ورىن كوپ بولعانىمەن، ولاردىڭ كەيبىرى ورازاعا ارناپ ءمازىر قۇرماپتى (ءبىز نەگىزىنەن ەۋروپا اسحاناسىن دايىندايتىندارعا ەمەس، شىعىس اسحاناسىنا ارنالعان ورىندارعا حابارلاستىق).
قالامىزدىڭ جىبەك جولى داڭعىلىندا ورنالاسقان «Pampooshka» اتالاتىن رەستوراندا رامازانعا ارنالعان سەت 3150 تەڭگەدەن باستالادى ەكەن. ءبىز حابارلاسقان ورىنداردىڭ ىشىندەگى ەڭ ارزانى وسى بولدى.
ال ياسساۋي كوشەسىندەگى «يفتار» لاگمانحاناسىنىڭ وكىلى اۋىزاشار باعاسى كىسى باسىنا 6-7 مىڭ تەڭگە دەپ جاۋاپ بەردى.
الماتىنىڭ بىرنەشە جەرىندە ورنالاسقان «تيۋبەتەيكا» شىعىس شايحاناسىنىڭ ابىلايحان داڭعىلىنداعى فيليالى ورازاعا ارناۋلى ءمازىرىمىز جوق، كۇندەلىكتى مەنيۋ بويىنشا تاپسىرىس قابىلدايمىز دەدى. بۇل جەردىڭ ورتاشا چەگى ادام باسىنا 10-12 مىڭ تەڭگە كولەمىندە.
اباي داڭعىلىنداعى «Qaimaq» رەستورانىنىڭ اۋىزاشار ءمازىرى تومەندەگىدەي، باعاسى كورسەتىلگەن.
اۋەزوۆ كوشەسىنىڭ بويىنداعى «Ipar» حالال اسحاناسىنىڭ ادمينيستراتورىنىڭ ايتۋىنشا، مۇنداعى باعا ادام باسىنا 5 مىڭ تەڭگەدەي بولادى ەكەن.
جەلتوقسان كوشەسىندە ورنالاسقان «سىدىق» رەستورانى وكىلىنىڭ ايتۋىنشا، ورتاق زالدا تاماق ءىشۋ ءۇشىن اۋىزاشار ءمازىرى ادام باسىنا 9800 تەڭگە ەكەن، نەمەسە كۇندەلىكتى مەنيۋدەن ساتىپ الۋعا دا بولادى.
يشتۆان قوڭىر كوشەسىندەگى «پانوراما» مەيرامحاناسى رامازانعا ارناپ 2 ءتۇرلى ءمازىر ازىرلەپتى.
«دوستىق» ىقشاماۋدانىنداعى «اۆات» مەيرامحاناسىندا اۋىزاشار باعاسى ادام باسىنا 7500 تەڭگە تۇرادى ەكەن.
ورازا تۇتۋشىنىڭ اۋىز اشۋ ۋاقىتى اقشام نامازىنىڭ ۋاقىتى، ياعني كۇننىڭ باتۋىمەن بايلانىستى. اۋىزاشار بەرۋ – ساۋاپتى ءىس. ءزايد يبن حاليد ءال-جۋھاينيدىڭ (ر.ا.) ريۋاياتى بويىنشا پايعامبارىمىز (س.ع.س.): «اۋزى بەرىك جاندى اۋىزاشارعا شاقىرىپ تاماق بەرگەن كىسى – ورازا ۇستاعان ادامنىڭ الاتىنىنداي ساۋاپ الادى. اۋزى بەرىك ادامنىڭ ساۋابىنان دا ەش نارسە كەمىمەيدى»، – دەگەن. (تيرميزي، ساۋم، 82؛ يبن ءماجا، سيام، 40).
تاعى ءبىر حاديسىندە پايعامبارىمىز (س.ع.س.): «ەگەر كىمدە-كىم رامازان ايىندا ادال تابىسىمەن اۋىزاشار بەرسە، پەرىشتەلەر رامازان ايىنىڭ سوڭىنا دەيىن وعان دۇعا جاسايدى»، – دەگەن. سوندا ريۋايات ەتۋشى: ۋا، راسۋلاللا! اۋىزاشارعا ەشتەڭە تاپپاسا نە ىستەيدى؟ – دەدى. – «ءبىر ءتىلىم نان بەرسىن» – دەدى. – «ول دا بولماسا شە؟» – «وندا قارا سۋ بەرسىن» – دەدى (ءات-تارعيب ءۋات تارحيب، 2/431.) ورازا تۇتقان كىسىگە ءبىر قۇرما نەمەسە ءبىر كەسە ءسۇت بەرگەن ادام دا اۋىزاشار بەرگەندەي ساۋاپقا يە بولادى.
رامازان ايى قۇتتى، ۇستاعان ورازالارىڭىز قابىل بولسىن!