الماتىدا اۋلالاردى، كوشەلەر مەن جولداردى جاپپاي تازالاۋ ۇيىمداستىرىلدى

200-دەن استام تەحنيكا مەن 700 جۇمىسشى جۇمىلدىرىلدى.

تۇرعىن ءۇي ساياساتى باسقارماسىنىڭ باسشىسى دانيار قىرىقبايەۆ الماتى قالاسىنىڭ تىنىس-تىرشىلىگىن قامتاماسىز ەتۋدى قالپىنا كەلتىرۋ جونىندەگى قالالىق شتابتىڭ وتىرىسى بارىسىندا سانيتارلىق تازارتۋ جونىندەگى كوممۋنالدىق قىزمەتتەر كومەندانتتىق ساعاتتان باسقا شتاتتىق رەجيمدە جۇمىس ىستەپ جاتقانىن مالىمدەدى، دەپ حابارلايدى Almaty-akshamy.kz

دانيار قىرىقبايەۆتىڭ ايتۋىنشا، 8 قاڭتاردان باستاپ قوقىس شىعارۋشى ۇيىمدار اۋلا اۋماقتارى مەن جەكە تۇرعىن ۇيلەردەن قاتتى تۇرمىستىق قالدىقتاردى شىعارۋ جۇمىستارىن باستادى. 200-دەن استام تەحنيكا مەن 700 جۇمىسشى جۇمىلدىرىلدى. اعىمداعى كەزەڭدە 10،5 مىڭ توننا قاتتى تۇرمىستىق قالدىقتار شىعارىلدى.

«9 قاڭتاردان باستاپ «الماتى تازالىق» مكك مەن مەردىگەر ۇيىمدار مەگاپوليستىڭ كوشە-جول جەلىسىن تازارتۋ بويىنشا جاپپاي جۇمىستار ۇيىمداستىردى، وعان 500-گە جۋىق ارنايى تەحنيكا مەن 1600 جول جۇمىسشىسى جۇمىلدىرىلدى. بۇگىندە 667 توننا قوقىس شىعارىلدى»، - دەدى سپيكەر.

سونداي-اق، 9 قاڭتاردان باستاپ قۇتقارۋ قىزمەتىنىڭ 93 جۇمىسشىسىنىڭ كۇشىمەن 45 بىرلىك ارنايى تەحنيكانى قولدانا وتىرىپ، تارتىپسىزدىك بارىسىندا زاقىمدانعان 100 بىرلىك اۆتوكولىك، سونداي-اق ءىرى كولەمدى قوقىس پەن قيراعان ەكوپوستتار شىعارىلدى.

دانيار قىرىقبايەۆ ءقازىر قالالىق كوممۋنالدىق قىزمەتتەر كومەندانتتىق ساعاتتان باسقا شتاتتىق رەجيمدە جۇمىس ىستەپ جاتقانىن اتاپ ءوتتى.