بۇل – كۇزدە ەلىمىزدە وتەتىن 5ء-شى دۇنيەجۇزىلىك كوشپەندىلەر ويىنىنا ارنالعان العاشقى وقۋ-جاتتىعۋ جيىنى.
ۇلتتىق سپورت قاۋىمداستىعىنىڭ اسىق اتۋ فەدەراسياسى الماتىدا وقۋ-جاتتىعۋ جيىنىن وتكىزىپ جاتىر، دەپ حابارلايدى اlmaty-akshamy.kz.
ەلىمىزدىڭ بىرنەشە وڭىرىنەن كەلگەن ۇلتتىق قۇراما ساپىنداعى اسىقشىلار 12 كۇن بويى اسىق اتۋ مەن بەس اسىقتان شەبەرلىكتەرىن شىڭدايدى.
بۇل – كۇزدە ەلىمىزدە وتەتىن 5ء-شى دۇنيەجۇزىلىك كوشپەندىلەر ويىنىنا ارنالعان العاشقى وقۋ-جاتتىعۋ جيىنى. ورتالىق ارميا سپورت كلۋبىنىڭ بازاسىندا ءوتىپ جاتقان جاتتىعۋعا 37 سپورتشى كەلسە، ونىڭ – 26-سى اسىقشى جىگىتتەر، 11ء-ى – بەساسىقشى قىزدار.
ۇلتتىق قۇرامانىڭ باس باپكەرى جومارت سابىرجان ۇلىنىڭ ايتۋىنشا، مۇندا اسىقشىلاردىڭ الاڭسىز جاتتىعۋ جاساۋىنا بارلىق جاعداي جاسالعان.
العاشقى 12 كۇندىك وقۋ-جاتتىعۋ جيىنىمىز وتە ءساتتى باستالدى. الدىمىزدا ءالى شىمكەنت، كوكشەتاۋ قالالارى مەن شولپان-اتا (قىرعىزستان) جانە انتاليادا (تۇركيا) وتەتىن ءتورت جيىن بار. دۇنيەجۇزىلىك كوشپەندىلەر ويىندارىندا قۇرامامىز ەل نامىسىن ابىرويمەن قورعاپ، اسىق اتۋ مەن بەس اسىقتان توپ جارادى دەپ سەنەمىز. ءدۇبىرلى دودادا قىرعىزدىڭ وردو ويىنىنان دا سىنعا تۇسەمىز. سوندىقتان شولپان-اتادا وردو ويىنىنان وقۋ-جاتتىعۋ جيىنى وتەدى، – دەدى جومارت سابىرجان ۇلى.
ءوز كەزەگىندە اسىق اتۋدان پاۆلودار وبلىسىنىڭ اعا جاتتىقتىرۋشىسى، الەم جانە ەۋرازيا كۋبوگىنىڭ جەڭىمپازى، «التىن تۇعىر» يەگەرى قاليبەك قۋان ۇلى كۇن وتكەن سايىن قۇراما مۇشەلەرىنىڭ شەبەرلىكتەرى شىڭدالىپ كەلە جاتقانىن العا تارتتى.
مىناۋ مىقتى دەپ ەشقايسىسىن ءبولىپ-جارا المايمىز. ءبارىنىڭ دەڭگەيى بىردەي. فيزيكالىق دايىندىقتارى جوعارى. سپورتشىلاردى پسيحولوگيالىق تۇرعىدان دا دايىنداپ جاتىرمىز. ماقساتىمىز – الەم كۋبوگى، الەم جانە ازيا چەمپيوناتى مەن كوشپەندىلەر ويىندارىندا ۇزدىك ونەر كورسەتۋ، – دەدى باپكەر.
ءدۇبىرلى دوداعا دايىندىقتارىن پىسىقتاپ جاتقانداردىڭ قاتارىندا اقمولا وبلىسىنان كەلگەن بەساسىقشى كوگەرشىن دۋمان دا بار. ول – بۇگىندە كوكشەتاۋ جوعارى مەديسينالىق كوللەدجىنىڭ ءتورتىنشى كۋرس ستۋدەنتى. بۇعان دەيىن الەم جانە قازاقستان كۋبوگىنىڭ يەگەرى، ەۋرازيا كۋبوگىنىڭ كۇمىس جۇلدەگەرى اتانىپ ۇلگەرگەن كوگەرشىننىڭ بەساسىقپەن اينالىسقانىنا بەس جىل بولعان. ول بولاشاعىن ۇلتتىق سپورتپەن بايلانىستىرىپ، بەساسىقتان باپكەر بولۋدى كوزدەپ وتىر.
وسى وقۋ-جاتتىعۋ جيىنىنىڭ قورىتىندىسى بويىنشا باس باپكەردىڭ شەشىمىمەن ءدۇبىرلى دودالاردا ەل نامىسىن قورعايتىن اسىقشىلار بەلگىلى بولادى.