قازاقستان استاناسى كۇنىنە جانە تاۋەلسىزدىككە تارتۋ رەتىندە الماتىلىق بالالار ءۇشىن 725 ورىندى ەكى مەكتەپتىڭ جاڭا كورپۋسى، 120 ورىندى ءتورت مەملەكەتتىك بالاباقشا، سونداي-اق بىرنەشە جەكەمەنشىك ءبىلىم بەرۋ مەكەمەلەرى اشىلدى.
الماتىدا ورتا ءبىلىمنىڭ قولجەتىمدىلىگىن قامتاماسىز ەتۋ ءۇشىن قالا اكىمى باقىتجان ساعىنتايەۆتىڭ تاپسىرماسى بويىنشا مەملەكەتتىك جانە جەكەمەنشىك مەكتەپتەردىڭ قۇرىلىسى جۇرگىزىلۋدە. سونداي-اق جۇمىس ىستەپ تۇرعان ءبىلىم بەرۋ نىساندارىنا جاڭا كورپۋستار سالىنىپ، بىرنەشە مەكەمەدە سەيسميكالىق شارالار كۇشەيتىلدى. بۇل جىل سوڭىنا دەيىن 21 مىڭنان استام جاڭا وقۋشى ورنىن اشۋعا مۇمكىندىك بەرەدى.
استانا كۇنىنە وراي بوستاندىق اۋدانى وربيتا-1 ىقشاماۋدانىندا 600 ورىندى №60 گيمنازيا عيماراتىنىڭ جاڭا كورپۋسى اشىلدى. گيمنازيانىڭ جوبالىق قۋاتى 1700 وقۋشى ورنىن قۇرايدى.
گيمنازيادا كەڭەيتۋدىڭ ارقاسىندا قوسىمشا كابينەتتەر پايدا بولدى جانە ەكى اۋىسىمدى وقىتۋ ماسەلەسى شەشىلەدى.
الاتاۋ اۋدانىندا جۇمىس ىستەپ تۇرعان №166 ليسەي عيماراتىنا جاپسارلاس 125 ورىندىق جاڭا قوسىمشا قۇرىلىس ورنى اشىلدى. جاڭا عيماراتقا دەيىن وقۋ ورنىندا 360 ورىن بولدى، ءقازىر 485 ورىندى قۇرايدى.
الماتى قالاسىندا استانا كۇنىنە وراي ەكى جەكەمەنشىك مەكتەپ اشىلدى. ولار - بوستاندىق اۋدانى، باعاناشىل ىقشاماۋدانىندا 60 ورىندىق "COSMO PRIMARY SHOOL" باستاۋىش مەكتەبى جانە قالانىڭ اۋەزوۆ اۋدانىندا 130 ورىندى "اۆس School" جەكە مەكتەبىنىڭ اشىلۋى ءوتتى.
الماتىدا قالا اكىمى باقىتجان ساعىنتايەۆتىڭ تاپسىرماسى بويىنشا بالاباقشاداعى ورىن تاپشىلىعىن تومەندەتۋ بويىنشا جۇيەلى جۇمىستار جۇرگىزىلۋدە.
استانا كۇنى قارساڭىندا الماتى قالاسى، ناۋرىزباي اۋدانى، اقجار ىقشاماۋدانىندا مەملەكەتتىك تىلدە وقىتاتىن №194 بالاباقشانىڭ اشىلۋى ءوتتى.
بالاباقشانىڭ جوبالىق قۋاتى 120 بالانى قۇرايدى. سونداي-اق 40 جاڭا جۇمىس ورنى قۇرىلدى.
الماتى قالاسى ناۋرىزباي اۋدانى، تاۋسامالى ىقشاماۋدانىندا 40 جاڭا جۇمىس ورنىن قۇرۋمەن 120 بالاعا ەسەپتەلگەن №193 جاڭا مەملەكەتتىك بالاباقشا اشىلدى.
الماتى قالاسىندا مەكتەپكە دەيىنگى ءبىلىم بەرۋ عيماراتتارىن سالۋعا بوس جەر ۋچاسكەلەرىنىڭ جەتىسپەۋىنەن، اكىمدىك جالپى ءبىلىم بەرەتىن مەكتەپتەردىڭ اۋماقتارىندا جاڭا بالاباقشا سالۋ تۋرالى شەشىم قابىلدادى. بۇل بالاباقشالارداعى ورىن جەتىسپەۋشىلىگى ماسەلەسىن شەشۋگە، ءار بالاعا ءۇيدىڭ جانىنداعى مەكتەپكە بارۋعا ءارى دوستارىمەن سەرۋەندەۋگە مۇمكىندىك بەرەدى.
ناۋرىزباي اۋدانى، تاۋسامالى ىقشاماۋدانىندا №186 مەن №187 جالپى ءبىلىم بەرەتىن مەكتەپتەردىڭ اۋماعىندا ءارقايسىسى 120 ورىندىق ەكى جاڭا بالاباقشا اشىلدى.
تۇركسىب اۋدانىندا مەملەكەتتىك ءبىلىم بەرۋ بويىنشا 68 بالاعا ارنالعان "ادەل" جەكە مەنشىك بالاباقشاسى اشىلدى.
"ءبىز جەكە مەنشىك بالاباقشادا بالالارعا ءبىلىم مەن تاربيە بەرۋگە مەملەكەتتىك قولداۋ الدىق. ءقازىر جاڭا وقۋ جىلىنا توپتار جينايمىز. بالالاردى ەكى جاستان باستاپ قابىلدايمىز. بۇل ورىس بالاباقشاسى، ءبىراق بالالارعا قازاق ءتىلى مەن اعىلشىن تىلدەرىن دە ۇيرەتەمىز. مەملەكەتتىك باعدارلامالاردان باسقا ءبىلىم بەرۋ جوبالارى دا بار"، – دەدى بالاباقشا قۇرىلتايشىسى لاريسا لي.
الماتى قالاسى بوستاندىق اۋدانىندا تاعى ءبىر "ALGABAS-3" جەكە مەنشىك بالاباقشاسىنىڭ اشىلۋى ءوتتى.
بالاباقشانىڭ جوبالىق قۋاتى 160 بالانى قۇرايدى. سونداي-اق 35 جاڭا جۇمىس ورنى اشىلدى. اتالعان بالاباقشا مەملەكەتتىك تاپسىرىس بويىنشا جۇمىس ىستەۋدى جوسپارلادى.
2021 جىلدىڭ باسىنان بەرى الماتىدا 1،7 مىڭ ورىندىق 30-عا جۋىق جەكەمەنشىك ۇيىمدارى اشىلدى. جىل سوڭىنا دەيىن تاعى دا 5 مىڭ ورىندىق 35 جەكە بالاباقشا اشۋ جوسپارلانۋدا. مەملەكەتتىك تاپسىرىس 20 441 ورىنعا 397 مەكتەپكە دەيىنگى ۇيىمعا ورنالاستىرىلدى.