مەدەۋ اۋدانىنىڭ بالالارى ءداستۇرلى ءان، شاحمات، ۆوكال، سۋرەت سالۋ مەن دومبىرا ۇيىرمەلەرىنە تەگىن قاتىسا الادى.
قالا اكىمى باقىتجان ساعىنتايەۆتىڭ تاپسىرماسى بويىنشا بالالار مەن جاسوسپىرىمدەردى جان-جاقتى دامىتۋ ءۇشىن مەگاپوليستە قوسىمشا ءبىلىم بەرۋ جۇيەسى ىسكە قوسىلدى. سونداي-اق الماتىدا مەملەكەتتىك شىعارماشىلىق تاپسىرىستى جان باسىنا نورماتيۆتىك قارجىلاندىرۋ جوباسى ىسكە قوسىلادى. بۇل 4 جاستان 17 جاسقا دەيىنگى بالالارعا سپورتتىق سەكسيالار مەن شىعارماشىلىق ۇيىرمەلەرگە تەگىن قاتىسۋعا مۇمكىندىك بەرەدى.
استانا كۇنىنە وراي مەدەۋ اۋدانى، قونايەۆ كوشەسى، 25 مەكەنجايىندا "جاس تالانت" الەۋمەتتىك ونەر ورتالىعىنىڭ سالتاناتتى اشىلۋى ءوتتى.
جاڭا ءبىلىم بەرۋ ورتالىعى كۇنىنە 30 بالانى قابىلدايدى.
جوبانى جۇزەگە اسىرۋ ءۇشىن ت.ق.جۇرگەنوۆ اتىنداعى قازاق ۇلتتىق ونەر اكادەمياسىنىڭ جاس ماماندارى قىزمەت اتقارادى. ولار "ەڭبەك" مەملەكەتتىك باعدارلاماسى بويىنشا ورتالىققا جۇمىسقا ورنالاسىپ، ساباق بەرەدى.
بيىل بارلىعى 4،2 مىڭنان استام بالا مەن ءجاسوسپىرىمدى تەگىن ۇيىرمەلەرمەن قامتۋ جوسپاردا بار. جان باسىنا قارجىلاندىرۋ اياسىندا تەگىن سپورت سەكسيالارىمەن 4،5 مىڭ ادام قامتىلادى.