قالاداعى 25 كىتاپحانا مەن بىرنەشە مۋزەيدە ەلوردا كۇنىنە ارنالعان ءىس-شارالار وتەدى.
قازاقستاندا 6 شىلدەدە مەملەكەتتىك مەرەكە — استانا كۇنى اتاپ وتىلەدى. وسى كۇنگە وراي وتەتىن ءىس-شارالار تۋرالى قالالىق مادەنيەت باسقارماسى باسشىسىنىڭ ورىنباسارى دانيار الييەۆ پەن قازاقستان حالقى اسسامبلەياسى الماتى قالاسى بويىنشا ءتوراعاسىنىڭ ورىنباسارى نۇريا نيازوۆا ايتىپ بەردى، دەپ حابارلايدى Almaty-akshamy.kz.
سپيكەرلەردىڭ ايتۋىنشا، بيىل كارانتينگە بايلانىستى كوپتەگەن ءىس-شارا ونلاين رەجيمدە وتەدى.
مىسالى، 6 شىلدەدە س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىندە «استانا اجارى» كورمەسى (ونلاين) وتەدى.
سول كۇنى مۋلتيمەديالىق ءداستۇرلى مۋزىكا ورتالىعىندا «ەل تىرەگى – ەلوردا» سەمينارى (ونلاين) وتەدى. سەميناردا نۇر-سۇلتان قالاسىنىڭ تاريحى، مادەنيەتى، دامۋى، سونداي-اق ق ر تۇڭعىش پرەزيدەنتى – ەلباسى ن. ءا. نازاربايەۆتىڭ ءومىرى مەن جۇمىسى تۋرالى ايتىلادى.
«6 شىلدەدە ساعات 10.00-دە وفلاين رەجيمىندە «ەر توستىك» سپەكتاكلىنىڭ پرەمەراسى وتەدى. ال، كەشكى ساعات 18.00-دە Qazaq راديوسىنىڭ «ارمان الەمى» مەرەكەلىك راديوسپەكتاكلى وتەدى»، – دەدى الماتى مادەنيەت باسقارماسى باسشىسىنىڭ ورىنباسارى دانيار الييەۆ.
ونىڭ ايتۋىنشا، الماتىداعى 25 كىتاپحانا مەن بىرنەشە مۋزەيدە ەلوردا كۇنىنە ارنالعان ءىس-شارالار وتەدى. سونىمەن قاتار ءىس-شارالاردىڭ ءبىر بولىگى دومبىرا كۇنىنە ارنالادى جانە قازاقستاندىق ەسترادا جۇلدىزدارى قاتىسادى. باعدارلامالار وتاندىق تەلەارنالاردا كورسەتىلەدى.
سونداي-اق، قازاقستان حالقى اسسامبلەياسىنىڭ الماتى قالاسى بويىنشا ءتوراعاسىنىڭ ورىنباسارى نۇريا نيازوۆا تۇرعىنداردى كەلە جاتقان مەرەكەمەن قۇتتىقتادى. ول مەرەكەنى ىندەتكە بايلانىستى ۇيدە، جاقىن ادامدار اراسىندا اتاپ ءوتۋ كەرەك ەكەنىن ايتتى.
«رۋحى ءبىر حالىقپىز، ءبىز بىرگە كەز كەلگەن سىناقتى جەڭەمىز، وزىڭىزگە جانە جاقىندارىڭىزعا قامقور بولىڭىز. بۇل قۇتتىقتاۋلاردى قازاقستان حالقى اسسامبلەياسى اتىنان جولدايمىن»، – دەدى نۇريا نيازوۆا.
قحا وكىلى الماتى جاستارىنىڭ ەلىمىزدە اسسامبلەيا قۇرۋ تۋرالى باستاما كوتەرگەن قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ جاريالاعان جوبالاردى قۋانا جۇزەگە اسىرىپ جاتقانىن اتاپ ءوتتى.
ايتا كەتەرلىگى، الماتىدا 37 قالالىق جانە 19 رەسپۋبليكالىق ەتنومادەني بىرلەستىك جۇمىس ىستەيدى. ولاردىڭ بارلىعى جىل سايىن قازاقستان رەسپۋبليكاسىنىڭ استانا كۇنىن اتاپ وتەدى. بيىل قازاقستان حالقى اسسامبلەياسى بارلىق ءىس-شارالاردى ونلاين فورماتتا وتكىزەدى.