«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە قاراستىرىلعان. 1411 ءنومىرى ارقىلى Call-ورتالىقتان پورتالدى پايدالانۋ بويىنشا كەڭەس الۋعا بولادى.
اعىمداعى جىلدىڭ باسىنان باستاپ 113 مىڭنان استام مۇگەدەكتىگى بار ادام الەۋمەتتىك قىزمەتتەر پورتالى ارقىلى وڭالتۋدىڭ تەحنيكالىق قۇرالدارىن، 6 مىڭنان استامى ىمداۋ ءتىلى قىزمەتتەرىن، 31 مىڭنان استامى جەكە كومەكشىنىڭ قىزمەتتەرىن، 36 مىڭعا جۋىعى ساناتورلىق-كۋرورتتىق ەمدەۋ الدى جانە 122 مىڭنان استام ادام كەپىلدىك بەرىلگەن الەۋمەتتىك توپتامالارعا تاپسىرىس رەسىمدەدى، دەپ حابارلايدى Almaty-akshamy.kz ق ر ەڭبەك جانە الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە جەتكىزۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وڭالتۋدىڭ تەحنيكالىق قۇرالدارىن جەتكىزۋ نەمەسە ءوز بەتىنشە اكەتۋ ارقىلى الۋعا بولادى.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق، سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق كرەسلو-اربالار بەرۋدى قامتيدى.
بۇگىنگى كۇنى پورتالدا ارناۋلى الەۋمەتتىك قىزمەت كورسەتەتىن 859 مەديسينالىق-الەۋمەتتىك مەكەمە، 127 وتق جەتكىزۋشى، جەكە كومەكشى قىزمەتتەرىن ۇسىناتىن 13 مىڭنان استام جەتكىزۋشى، ىمداۋ ءتىلى قىزمەتتەرىن ۇسىناتىن 250 جەتكىزۋشى، ساناتورلىق-كۋرورتتىق ەمدەۋ ۇسىناتىن 66 جەتكىزۋشى، كەپىلدىك بەرىلگەن الەۋمەتتىك توپتاما ۇسىناتىن 135 جەتكىزۋشى تىركەلگەن.
2020 جىلعى 29 جەلتوقساننان باستاپ ەلەكتروندىق ۇكىمەت پورتالىندا (eGov.kz) مۇگەدەكتىگى بار ادامدارعا ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك قىزمەتتەرىن كورسەتۋگە ەلەكتروندىق ءوتىنىم بەرۋ مۇمكىندىگى ىسكە اسىرىلدى. وسى كەزەڭدە ەلەكتروندىق ۇكىمەت پورتالى ارقىلى وڭالتۋ قۇرالدارىمەن جانە قىزمەتتەرىمەن قامتاماسىز ەتۋگە 110،5 مىڭنان استام قۇجات رەسىمدەلدى.