الماتىدا «وڭتۇستىك» وڭىرلىك قولباسشىلىعىنا قاراستى اسكەري بولىمدەردىڭ تاربيە جانە الەۋمەتتىك-قۇقىقتىق جۇمىستار بولىمشەسى (توپ) باستىقتارى مەن باتالون كومانديرلەرى ورىنباسارلارىنىڭ جانە اسكەري بولىمدەردەگى اسكەري قوعامدىق ۇيىمدار ءتوراعالارىنىڭ ءۇش كۇندىك پراكتيكالىق دايىندىعى ءوتتى.
القالى جيىنعا ۇلتتىق ۇلاننىڭ الماتى، شىمكەنت، تالدىقورعان، قىزىلوردا جانە تاراز قالالارىنان كەلگەن 50-گە جۋىق تاربيەشىسى مەن اسكەري قوعامدىق ۇيىمداردىڭ ءتوراعالارى قاتىستى. جيىنعا باسشىلىق جاساعان «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك نيازتاي الكەشيەۆ اسكەردەگى جەكە قۇرامنىڭ تاربيە جۇمىسىن زاماناۋي دەڭگەيگە كوتەرۋ ءۇشىن ءبىرقاتار ماڭىزدى ماسەلەلەرگە باسا ءمان بەرۋگە شاقىردى.
اۋقىمدى شارا بارىسىندا وڭىرلىك قولباسشىلىقتاعى زاڭدىلىق پەن اسكەري ءتارتىپتىڭ جاعدايى، ونى نىعايتۋداعى اسكەري قوعامدىق ۇيىمداردىڭ مىندەتتەرى تۋرالى ءسوز قوزعالدى. سونىڭ ىشىندە ايەلدەر كەڭەسى، كەلىسىمشارت بويىنشا اسكەري قىزمەتشىلەر كەڭەسى، ارداگەرلەر كەڭەسى سياقتى ۇيىمدار جۇمىستارىنىڭ ماڭىزى، ءبولىمنىڭ جالپى حال-احۋالىنا تيگىزەر اسەرى مەن جەكە قۇرامدى تاربيەلەۋدەگى ءرولى ەرەكشە اتالىپ ءوتتى.
– ءبىزدىڭ باستى ماقساتىمىز – اسكەرلەردە تاربيە جۇمىسىن ۇيىمداستىرۋ ماسەلەلەرىن جەتىلدىرۋ، قازىرگى تالاپقا ساي وڭتايلى مۇمكىندىكتەرىن تالقىلاۋ جانە تاربيە جۇمىستارى بويىنشا جاقسى ويلارى بولسا سونىمەن ءبولىسىپ، بىر-بىرىمىزبەن پىكىر الماسۋ. سونداي-اق اسكەري قوعامدىق ۇيىمداردىڭ جۇمىستارىن ساراپتاۋ، – دەيدى وڭتۇستىك ءوڭىرىنىڭ باس تاربيەشىسى پولكوۆنيك نيازتاي الكەشيەۆ.
تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى پودپولكوۆنيك ارمان سەيتوۆ بولىمدەر مەن بولىنىستەردە بەرىك اسكەري ءتارتىپتى، زاڭدىلىق پەن قۇقىقتىق ءتارتىپتى ۇستانۋدا، ءوز قىزمەتتىك مىندەتتەرىن ۇلگىلى ورىنداۋعا اسكەري قىزمەتشىلەردى جۇمىلدىرۋداعى اسكەري قوعامدىق ۇيىمداردىڭ جۇمىسىن قالاي جۇزەگە اسىرۋ كەرەكتىگىن جەتكىزدى. سونىمەن قاتار ءار وفيسەر باسشىلىق قۇجاتتاردى قانشالىقتى مەڭگەرگەندىگى تەكسەرىلىپ، جاۋىنگەرلىك دايارلىقتىڭ نەگىزگى پاندەرى بويىنشا سىناقتار تاپسىردى.
اسكەر ارداگەرى زاپاستاعى پولكوۆنيك سابىرجان سۇلەيمەنوۆ «اسكەري بولىمدەردىڭ ارداگەرلەر كەڭەسىمەن تالىمگەرلىك جۇمىستى ۇيىمداستىرۋ ماسەلەسى» تۋرالى اسكەري تاربيەشىلەرمەن كەڭىنەن تالقىلاپ، تۇجىرىمدى ويىن ورتاعا سالدى. ال «وڭتۇستىك» وڭىرلىك قولباسشىلىعى ارداگەرلەر كەڭەسى ءتوراعاسىنىڭ ورىنباسارى زاپاستاعى پودپولكوۆنيك رافايل ابدىكەيەۆ پەن 5571 اسكەري بولىمىندەگى ارداگەرلەر كەڭەسىنىڭ ءتوراعاسى زاپاستاعى مايور بەرىك الماعامبەتوۆ «اسكەري قىزمەتشىلەردىڭ الەۋمەتتىك وسال وتباسىلارىمەن اسكەري قوعامدىق ۇيىمدار جۇمىسىنىڭ ەرەكشەلىگى جانە وتباسىلىق-تۇرمىستىق ماسەلەلەردى شەشۋ جولدارى» تاقىرىبىندا ساباق وتكىزىپ، تاجىريبەلەرىمەن ءبولىستى.
جيىنعا قاتىسۋشى وفيسەرلەرمەن ءۇش كۇن بويى ادىستەمەلىك ساباقتار، سەمينارلار، دارىستەر جانە جاۋىنگەرلىك قىزمەت پەن وقۋدىڭ ۇزدىكتەرىن قۇرمەتتەۋ كەشى سەكىلدى ساباقتار وتكىزىلدى. قازاقستان رەسپۋبليكاسىنىڭ ورتالىق مەملەكەتتىك مۇراجايىندا تانىمدىق ساباق تا ۇيىمداستىرىلدى.