وتان قورعاۋشى كۇنىنە وراي وتەتىن مەرەكەلىك شارالار الماتىدا ءداستۇرلى تۇردە ءبىرىنشى قورعانىس ءمينيسترى، ۇلى وتان سوعىسىنىڭ ارداگەرى، ءبىرىنشى حالىق قاھارمانى ارميا گەنەرالى ساعادات نۇرماعامبەتوۆ تۇرعان ءۇيدىڭ جانىنا گۇل شوقتارىن قويۋدان باستالدى.
ءىس-شاراعا دەسانتتىق-شابۋىلداۋ اسكەرلەرىنىڭ قولباسشىسى – الماتى وڭىرلىك گارنيزونىنىڭ باستىعى گەنەرال-مايور الماز جۇماكەيەۆ، قازاقستان قارۋلى كۇشتەرىنىڭ ارداگەرلەرى، اسكەري وقۋ ورىندارىنىڭ كۋرسانتتارى جانە "جاس سارباز" رەسپۋبليكالىق اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
ساعادات نۇرماعامبەتوۆ تالاي سىننان وتكەنمەن، تاعدىرى جارقىن ادام. اتا-اناسىنان ەرتە ايىرىلىپ قالىپ، اعاسى ءساعيتتىڭ وتباسىندا تاربيەلەنەدى. ۇلى وتان سوعىسى باستالعان كەزدە ۇلكەن اعاسى ساعيت ءبىرىنشى بولىپ سوعىسقا اتتانىپ، كوپ ۇزاماي قازا تاپتى. ودان كەيىنگى شاقىرتۋ ساعاداتقا كەلدى. ول تۇرىكمەنستانداعى پۋلەمەت ۋچليششەسىن ءبىتىرىپ، 1942 جىلى مايدانعا جىبەرىلدى. سولتۇستىك كاۆكازدان بەرلينگە دەيىن جەتىپ، باتالون كومانديرى كەزىندە جەڭىستى قارسى الدى. ونىڭ باتالونى گەستاپو شتابىن باسىپ الۋ جانە رەيحستاگقا شابۋىل جاساۋ كەزىندە قاندى شايقاستارعا قاتىستى. 1945 جىلى ساعادات نۇرماعامبەتوۆ كەڭەس وداعىنىڭ باتىرى اتاعىنا يە بولدى.
ساعادات قوجاحمەت ۇلى نۇرماعامبەتوۆ ءومىر سۇرگەن ءۇيدىڭ جانىنداعى مەموريالدىق تاقتاعا گۇل شوقتارىن قويعاننان كەيىن گارنيزون اسكەري قىزمەتشىلەرى باتىردىڭ ەرلىگىنە قۇرمەت كورسەتىپ، سالتاناتتى مارشپەن ءجۇرىپ ءوتتى.
«قارۋلى كۇشتەرمەن بايلانىستى بارلىق مەرەكەلىك ءىس-شارالار ءارقاشان ساعادات قوجاحمەت ۇلى نۇرماعامبەتوۆتى ەسكە الۋدان باستالادى. بيىلعى جىل ەرەكشە. 25 مامىر – ونىڭ 100 جاس مەرەيتويى. ارميا گەنەرالى نۇرماعامبەتوۆتىڭ تاۋەلسىز قازاقستاننىڭ قارۋلى كۇشتەرىن قۇرۋداعى سىڭىرگەن ەڭبەگى زور، سوندىقتان ءبىز ونى جادىمىزدا ساقتاپ، قۇرمەتتەۋگە ءتيىسپىز»، – دەدى ەكس-قورعانىس ءمينيسترى گەنەرال-پولكوۆنيك الىبەك قاسىموۆ.
ساعادات قوجاحمەت ۇلىنىڭ نەمەرەسى ايجان نۇرماعامبەتوۆا اتاسى تۋرالى ەستەلىكتەرىن اڭگىمەلەپ، اتاسى ءۇشىن پارىز، ار-نامىس پەن ەرلىك جاي سوزدەر عانا ەمەس ەكەنىن ايتتى. بۇل قاسيەتتەر اتامنىڭ ۇستانىمى بولدى. ول تەك باعىنىستىلارعا عانا ەمەس، وزىنە دە قاتال، تالاپشىل بولدى دەدى.
ءىس-شارا ءارى قاراي 28 پانفيلوۆشى-گۆاردياشىلار ساياباعىندا جالعاستى، وندا الماتى وڭىرلىك گارنيزونىنىڭ باسشىلىعى مەن قارۋلى كۇشتەردىڭ ارداگەرلەرى ماڭگىلىك الاۋعا گۇل شوقتارىن قويىپ، گارنيزوننىڭ اسكەري قىزمەتشىلەرى سالتاناتتى مارشپەن ءوتتى.