الماتى، الماتى جانە جەتىسۋ وبلىستارىنان اسكەري مىندەتتىلەر قاتىساتىن كەزەكتى اسكەري جيىندار راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ وقۋ ورتالىعىندا ءوتىپ جاتىر. جيىنعا بارلىعى 120-عا جۋىق ادام شاقىرىلىپ، ولار ءبىر اي ىشىندە 15 اسكەري ماماندىقتى مەڭگەرەتىن بولادى، دەپ حابارلايدى aqshamnews.kz
جيىننىڭ نەگىزگى ماقساتى – اسكەري دايىندىقتى ارتتىرۋ جانە قورعانىس كۇشتەرىنە قاجەتتى اسكەري ماماندانعان كادرلاردى دايارلاۋ. سونداي-اق، اسكەري-وقىتىلعان مامانداردىڭ رەزەرۆىن قالىپتاستىرۋ كوزدەلگەن. بۇل تۋرالى وقۋ ورنىنىڭ باستىعى، گەنەرال-مايور قايرات داۋتوۆ اتاپ ءوتتى:
– جيىننىڭ ماقساتى – ەلدىڭ قاۋىپسىزدىگى مەن قورعانىس قابىلەتتىلىگىن قامتاماسىز ەتۋ ءۇشىن كادرلىق رەسۋرستاردى دايىنداۋ جانە تولىقتىرۋ، – دەدى ول.
ءبىر اي ىشىندە قاتىسۋشىلار وزدەرىنىڭ اسكەري ماماندىقتارى بويىنشا تەوريالىق جانە پراكتيكالىق دايىندىقتان وتەدى. دارىستەر مەن تاجىريبەلىك ساباقتاردى اسكەري وقۋ ورنىنىڭ پروفەسسور-وقىتۋشىلارى جۇرگىزەدى. اسىرەسە، پراكتيكالىق ساباقتارعا ەرەكشە كوڭىل ءبولىنىپ، قاتىسۋشىلاردىڭ كاسىبي شەبەرلىگىن ارتتىرۋعا مۇمكىندىك بەرەدى.
جيىنعا قاتىسۋشىلاردىڭ ءبىرى – حالىق قاھارمانى، كەڭەس وداعىنىڭ باتىرى مۋردين ءتالىپوۆتىڭ نەمەرەسى ياشار پولوتوۆ. ول اتا جولىن قۋىپ، ەل قورعاۋعا ءاردايىم دايىن ەكەنىن جەتكىزدى:
– مەن اسكەري ينستيتۋتتىڭ اسكەري كافەدراسىندا موتوجاياۋ اسكەر ۆزۆودىنىڭ كومانديرى ماماندىعى بويىنشا وقىعان ەدىم، سول ۋاقىتتان بەرى 21 جىل ءوتتى. ءقازىر س-300 راديولوكاسيالىق بارلاۋ كەشەنىنىڭ باسشىسى رەتىندە دايىندىقتان ءوتىپ جاتىرمىن. جيىنعا شاقىرىلعانىما قۋانىشتىمىن، ويتكەنى بۇل مەنىڭ قابىلەتتەرىمدى شىڭداپ قانا قويماي، جاڭا داعدىلاردى ۇيرەنۋگە مۇمكىندىك بەرەدى، – دەدى پولوتوۆ.
اسكەري مىندەتتىلەردىڭ بارلىعى اسكەري وقۋ ورنى پوليگونىندا ورنالاسقان شاتىرلى قالاشىقتا تۇرىپ جاتىر، ولارعا تاماقتانۋ جانە قاجەتتى جابدىقتارمەن قامتاماسىز ەتۋ ۇيىمداستىرىلعان. جيىن سوڭىندا ءاربىر قاتىسۋشى سىناق تاپسىرىپ، ونىڭ ناتيجەسى بويىنشا اسكەري جيىننان وتكەنىن راستايتىن سەرتيفيكات جانە جەكە مىنەزدەمە الادى. وسى قۇجاتتار نەگىزىندە جەرگىلىكتى اسكەري باسقارۋ ورگاندارى ولارعا كەزەكتى اسكەري شەن بەرۋ تۋرالى شەشىم قابىلدايدى.
ايتا كەتەيىك، راديوەلەكترونيكا جانە بايلانىس اسكەري-ينجەنەرلىك ينستيتۋتى 2018 جىلدان باستاپ اسكەري مىندەتتىلەر ءۇشىن جيىندار وتكىزىپ كەلەدى. وسى ۋاقىت ىشىندە قازاقستان رەسپۋبليكاسىنىڭ اۋە قورعانىس كۇشتەرىنە 600-گە جۋىق مامان دايارلانعان.