حالىقارالىق اۋەجايدا الەم چەمپيونى ەفرەيتور نۇرقوجا قايپانوۆتى ارميانىڭ ورتالىق سپورت كلۋبىنىڭ باسشىلىعى، ارىپتەستەرى مەن دوستارى قارسى الدى.
سپورتشى وليمپيادالىق ەمەس سالماق دارەجەسىندە كۇرەس تۇرلەرى بويىنشا الەم چەمپيوناتى وتكەن البانيادان ۇشىپ كەلدى، وندا ول ارىپتەسى كىشى سەرجانت ءجاميلا باقبەرگەنوۆامەن بىرگە ەل نامىسىن قورعادى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
ەركىن كۇرەستەن قازاقستان كومانداسى كوشباسشىلارىنىڭ ءبىرى ەفرەيتور نۇرقوجا قايپانوۆ 70 كەلىگە دەيىنگى سالماق دارەجەسىندە چەمپيون اتاندى.
قازاقستاندىق بالۋان نۇرقوجا قايپانوۆ قىزىلوردا وبلىسى ارال قالاسىنىڭ تۋماسى. 2021 جىلى اوسك روتاسىندا مەرزىمدى اسكەري قىزمەت اتقاردى. قازىرگى ۋاقىتتا الماتىداعى ارميا ورتالىق سپورت كلۋبى فيليالى وقۋ-جاتتىقتىرۋ ورتالىعى شتاتتىق كوماندالاردى دايارلاۋ ءبولىمى ەركىن كۇرەس كومانداسى بولىمشەسىنىڭ سپورتشى-نۇسقاۋشىسى بولىپ قىزمەت ەتەدى.
ءقازىر نۇرقوجا قايپانوۆتىڭ قورجىنىندا ازيا چەمپيوناتىنىڭ ەكى "التىنى" جانە "كۇمىسى"، الەم چەمپيوناتىنىڭ "التىنى" مەن "كۇمىسى" بار. ايتا كەتەيىك، نۇرقوجا ەركىن كۇرەستەن قازاقستاندىق ەكىنشى الەم چەمپيونى.
كىشى سەرجانت ءجاميلا باقبەرگەنوۆا 72 كەلىگە دەيىنگى سالماق دارەجەسىندە التىنعا تالاستا جاپونيادان كەلگەن سپورتشى امي يشييگە ەسە جىبەرىپ، "كۇمىسكە" يە بولدى. بۇل سپورتشىنىڭ كۇرەستەن الەم چەمپيوناتتارىنان العان ءتورتىنشى مەدالى.