الماتىدا «Ashyq» كوشباسشىسى زاڭسىز اكىمشىلىك جاۋاپقا تارتىلعان، دەپ حابارلايدى almaty-akshamy.kz
الماتى قالالىق پروكۋراتۋراسىنىڭ مالىمەتىنشە، بوستاندىق اۋدانىنىڭ سانيتارلىق-ەپيدەميولوگيالىق باقىلاۋ باسقارماسى «Kim Chi» كافەسىنىڭ يەسىن كارانتيندىك شەكتەۋلەر جاعدايىندا جۇمىس رەجيمىن بۇزعانى ءۇشىن نەگىزسىز اكىمشىلىك جاۋاپقا تارتتى (ق ر اقبتك-نىڭ 425-بابىنىڭ 1-بولىگى بويىنشا).
مونيتورينگ توبى مەكەمە ساعات 20:00-دەن كەيىن جۇمىس ىستەگەنىن انىقتادى، وسىعان بايلانىستى كاسىپكەرگە 670 910 تەڭگە نەمەسە 230 اەك مولشەرىندە ايىپپۇل سالىندى.
«الماتى قالاسىنىڭ پروكۋراتۋراسى اكىمشىلىك ءىستى تەكسەرگەن كەزدە كافەنىڭ «Ashyq» كوشباسشىسى مارتەبەسىن العانىن جانە ونىڭ جۇمىس رەجيمى ساعات 22:00-گە دەيىن ۇزارتىلعانىن انىقتادى»، - دەپ حابارلادى ۆەدومستۆودان.
پروكۋرورلىق قاداعالاۋ اكتىسى بويىنشا اكىمشىلىك جاۋاپقا تارتۋ تۋرالى قاۋلىنىڭ كۇشى جويىلدى، كاسىپكەر زاڭسىز سالىنعان ايىپپۇل تولەۋدەن بوساتىلدى.