الماتىدا اشىق اسپان استىندا تاعى ءبىر ەرەكشە ارت نىساندار توپتاماسى پايدا بولدى

ونى ءابىلحان قاستەيەۆ اتىنداعى مەملەكەتتىك ونەر مۋزەيىنىڭ الدىنان كورۋگە بولادى.

دارىندى سۋرەتشى، ءمۇسىنشى ساكەن نارىنوۆ «تەكشەنىڭ التى كۇيى» كوركەم تۋىندىسىندا كۇردەلى مەتالل كونسترۋكسيالارى ارقىلى ادامنىڭ سەزىمدەرىن، ەموسياسى مەن كوڭىل-كۇيىن وتە ءدال بەينەلەگەن، دەپ حابارلايدى Almaty-akshamy.kz 24.kz-كە سىلتەمە جاساپ. 

ماسەلەن، سۋرەتشى «قىسىم» دەپ اتاعان مىنا تەكشە شيرىققان كوڭىل كۇيدى ءدوپ باسادى. سۋرەتشى بۇل جۇمىستارىن پاندەميا كەزىندە جاساپ، قايتىس بولاردان بۇرىن مۋزەي قورىنا تاپسىرعان. ەرەكشە تۋىندىلارمەن تانىسقان شەتەلدىك قوناقتار وسى كورمەنى ءوز ەلدەرىندە وتكىزۋ تۋرالى ۇسىنىستارىن ايتتى. «ارت نىساندار سۋرەتشىنىڭ بىرەگەي شىعارماشىلىعىنا تەرەڭىرەك ۇڭىلۋگە مۇمكىندىك بەرەدى»، - دەيدى مۋزەي قىزمەتكەرلەرى.

«بۇل شىعارمالاردىڭ ءارقايسىسى ادامنىڭ بەلگىلى ءبىر كوڭىل-كۇيىن، جان-دۇنيەسىن بەينەلەيدى. ال الۋان ەموسيانى وتە كۇردەلى ماتەريال ارقىلى كورسەتۋ سۋرەتشىنىڭ شەبەرلىگى دەر ەدىم.  مەتالل ارقىلى شىعارماشىلىق ويدى ءدال بەرۋدى، ونى جاساۋدى ەلەستەتۋ قيىن، ءبىراق سۋرەتشى وعان قول جەتكىزدى. وسى جۇمىستار ارقىلى كورنەكتى شەبەر، ساۋلەتشى جانە ءمۇسىنشى ساكەن نارىنوۆتىڭ شىعارماشىلىعىمەن كەڭ اۋديتوريانى تانىستىرۋ مۇمكىندىگىنە يە بولعانىمىز ءبىز ءۇشىن وتە ماڭىزدى»، - دەيدى كورمە كۋراتورى ەكاتەرينا رەزنيكوۆا.