مەملەكەت تاراپىنان 5 جارىم ميلليارد تەڭگە ءبولىنىپتى
بيىل الماتىدا Artsport پلاتفورماسى ارقىلى 56 مىڭ بالا شىعارماشىلىق باعىتتاعى ۇيىرمەگە جازىلعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇل كورسەتكىش وتكەن جىلمەن سالىستىرعاندا 2 ەسە كوپ. وعان مەملەكەت تاراپىنان 5 جارىم ميلليارد تەڭگە ءبولىنىپتى.
ۇلان ادىلبايەۆ جارتى جىل بۇرىن مەملەكەتتىك باعدارلامانىڭ كومەگىمەن ءوزىنىڭ ورتالىعىن اشىپ، ءقازىر يگىلىگىن كورىپ وتىر. ول بالالارعا اكتەرلىك شەبەرلىك، ۆيدەو-مونتاج جانە فوتوشوپ جاساۋدى تەگىن ۇيرەتەدى. جانە 3 ادامدى جۇمىسپەن قامتىپ وتىر.
«وسى مەكتەپتە وقىپ جۇرگەنىمە 3 اي بولدى. وسى ۋاقىت ارالىعىندا اكتەرلىك شەبەرلىك، ۆيدەو، فوتو، سمم كوپ نارسە ۇيرەندىم. Artsport باعدارلاماسى ماعان ۇنايدى»، – دەدى قاتىسۋشى ءابىلقايىر ۇدجىقۇلوۆ.
«اپتاسىنا 4 رەت كەلەمىن. 2 كۇندى اكتەرلىك شەبەرلىك ساعاتىنا ارناسام، قالعان كۇندەرى فوتو، ۆيدەو جاساپ ۇيرەنەمىن. جاقسى جوبا»، – دەدى قاتىسۋشى باتىرلان ماناپ.
بۇل ورتالىققا Artsport پلاتفورماسى ارقىلى 100-دەن استام بالا تىركەلگەن. ياعني 6-دان 17 جاسقا دەيىنگى ارالىقتا بالا قالاعان ۇيىرمەگە تەگىن قاتىسا الادى. ەڭ باستىسى ناتيجە بار دەيدى ۇستازدارى. اكتەرلىك شەبەرلىكتى ۇيرەنىپ جۇرگەن بالدىرعاندار جاقىندا عانا رەسپۋبليكالىق كونكۋرستا باس جۇلدە الىپتى. سوندىقتان اتا-انالار قاۋىمى بۇل جوبانىڭ اقىلى سەكسيالارعا قاراعاندا ۇتىمدى تۇستارى كوبىرەك دەيدى.
«بالام وسى ۇيىرمەگە كەلەدى. اسەل 11 جاستا. بىلتىردان باستاپ وسىنداي ۇيىرمەلەردى ەستىپ، سوعان كەلىپ جاتىرمىز. ءوزى تەلەفونمەن ۆيدەو، فوتو جاساعاندى جاقسى كورەدى»، – دەدى اتا-انا تىلەۋجان قۇسايىنوۆا.
ۇلان ادىلبايەۆتىڭ ايتۋىنشا، ءقازىر ۇيىرمەگە ونلاين تىركەلۋ ۋاقىتشا جابىق. سوعان قاراماستان بالالاردى قابىلداپ، بارىنشا ۇيرەتىپ جاتىرمىز دەيدى.
«ءقازىر سوڭعى 1-2 ايدىڭ كولەمىندە ءبىزدىڭ سايتىمىز جابىق. باسقا بالالاردى قابىلداي الماي جاتىرمىز. تىركەي المايمىز باعدارلاماعا. ءبىراق ءبىز كەلگەن بالالاردى سايت اشىلىپ قالادى-اۋ دەگەن ۇمىتپەن ءوزىمىز تىركەپ، وقىتىپ جاتىرمىز»، – دەدى ۇيىمداستىرۋشى ۇلان ادىلبايەۆ.
ايتا كەتەيىك، وتكەن جىلى شىعارماشىلىق باعىتتاعى ۇيىرمەلەرگە 628 ميلليون تەڭگە ءبولىنىپ، 30 مىڭعا جۋىق بالا تەگىن سەكسيالارعا جازىلعان ەدى.