الماتىدا سۋرەتشى روزا بەكسۇلتانوۆانىڭ «شىعىس پاليتراسى» كورمەسى وتۋدە
روزا بەكسۇلتانوۆا ءوزىن بالالارعا رياسىز سۋرەت سالۋدى ۇيرەتەتىن ارت-تەراپيەۆت سۋرەتشىسى دەپ تانىستىردى. ول Almaty Gallery كوركەمسۋرەت گالەرەياسىندا ءوزىنىڭ العاشقى كورمەسىن ۇسىندى، دەپ حابارلايدى Almaty-akshamy.kz.
جاس قىلقالام شەبەرى ماماندىعى بويىنشا كوستيۋم سۋرەتشىسى بولعانىمەن، ۇستازدىق جولدى تاڭداعان. العاشىندا بالاباقشادا ساباق بەرىپ، كەيىن جۇبايىمەن بىرگە ستۋديا اشقان.
«مەن ارت-تەراپيا سالاسىندا 9 جىلدان استام ۋاقىت قىزمەت ەتىپ كەلەمىن. ستۋديا اشقانىما جەتى جىل تولدى. بۇل - مەنىڭ العاشقى جەكە كورمەم. مۇندا ۇسىنىلعان كارتينالار كوپ ەمەس، الايدا ءارقايسىسى ءمان-ماعىناعا تولى دۇنيە. تانىمال كارتينالاردىڭ ۇلتتىق ناقىشتا جاندانۋى دەسەم دە بولادى. سۋرەتتەردىڭ كوبىسىندە الەۋمەتتىك ماسەلەلەر كوتەرىلگەن جانە ونى ءار ادام ءارقالاي تۇسىنەدى. مەن تانىمال، ەلدىڭ نازارىندا جۇرگەن كارتينالاردى وزگەرتۋ ارقىلى قوعامنىڭ تۇيتكىلدى ماسەلەلەرىن كورسەتكىم كەلدى»، - دەدى روزا بەكسۇلتانوۆا.
سۋرەتشى ءوزىنىڭ العاشقى جەكە كورمەسىندە ماتيسس، كليمت، پيكاسسو، بوتتيچەللي، ۆان گوگ كارتينالارىن قايتا ءتىرىلتىپ، ولارعا قازاقي دەم بەرگەن.
كورمەنىڭ باستى كارتيناسى – ءماتيسستىڭ «بي» كارتيناسى نەگىزىندە سالىنعان «باستى ماماندىقتار» سۋرەتى. وندا اقشا ۇسىنىپ وتىرعان بالانى اينالا ونىڭ جاقىندارى: اناسى مەن اكەسى، اق حالاتتى ابزال جان، پوليسيا قىزمەتكەرى، ۇستازى بەينەلەنگەن. ياعني بالانىڭ ءوسىپ-ونۋىن، قاۋىپسىزدىگىن قامتاماسىز ەتۋ ءۇشىن كەرەك جاندار. الايدا ءبىزدىڭ قوعامنىڭ قازىرگى اششى شىندىعى – اقشاسىز قاراپايىم قاجەتتىلىكتەردى الۋدىڭ ءوزى قيىن. مۇنىڭ بارلىعى - سۋرەتشىنىڭ جەكە جانايقايى.
«بۇل كارتينانى جازاردا مەنى ۇرەي باسقانى راس. الايدا جۇبايىم مەن ۇيىمداستىرۋشىلاردىڭ ارقاسىندا كارتينا بۇگىنگى كورمەنىڭ تورىندە تۇر. پيكاسسونىڭ «ۇيقى» كارتيناسى جەلىسىندە سالىنعان سۋرەتتى «ءومىرىڭدى ەرتەڭگە قالدىرما» دەپ اتادىم. مەن ءۇشىن بۇل ءسوز تىركەسى – بۇگىنگى كورمەنىڭ ۇرانى. ەگەر ءومىرىڭىزدى وزگەرتكىڭىز كەلسە، قورىقپاڭىز، بۇگىننەن باستاڭىز، كەيىن ءبارى كەش، ويلاعانىڭىز ەش كەتۋى مۇمكىن»، - دەپ ءتۇسىندىردى اۆتور.
جاس سۋرەتشى ءۇشىن قازاقشا ويۋ-ورنەكتەرى بار كورپەشە جايىلعان ورىندىق بەينەلەنگەن «سەنىڭ جولىڭ» اتتى كارتينا بارىنەن ىستىق ەكەن. سەبەبى سۋرەتشى ءوزىنىڭ كىم ەكەنىن جانعا جىلىلىق سىيلايتىن وسى سۋرەت ارقىلى تۇسىنگەن.
«سۋرەتشىلەردىڭ كوبى ونەر جولىمەن جۇرۋدەن قورقادى، مەن وسى كەسكىندەمە بويىنشا جۇمىسىمدى اياقتاعاننان كەيىن سۋرەتشى بولۋ ناقتى ماقساتىم ەكەنىن ءتۇسىندىم. ىشتەي ءبىر ءوزىمدى ەندى ناعىز سۋرەتشىمىن دەپ ايتا الامىن دەگەن ويعا كەلدىم. مەن سۋرەت سالۋ كەزىندە اكريل مەن مايلى بوياۋدى قولدانامىن. مەنىڭ ءستيلىم – جارقىراعان تۇستەر مەن بوياۋلار، قالىپتاسقان ستاندارتتان اۋىتقۋ. مەنى ەتنيكا شابىتتاندىرادى، ۇلتتىق تاقىرىپتى وتە جاقسى كورەمىن»، - دەپ قورىتىندىلادى سۋرەتشى روزا بەكسۇلتانوۆا.
روزا بەكسۇلتانوۆانىڭ «شىعىس پاليتراسى» كورمەسى Almaty Gallery-دە 18 ساۋىرگە دەيىن جالعاسادى.