الماتىدا جاقىن ماڭداعى ۇيلەردىڭ تۇرعىنى ءۇشىن اقىلى تۇراققا ابونەمەنت ەنگىزۋ ماسەلەسى قاراستىرىلىپ جاتىر، دەپ حابارلايدى almaty-akshamy.kz
الماتىنىڭ كولىك جۇيەسىن دامىتۋدىڭ ماڭىزدى باعىتىنىڭ ءبىرى اقىلى تۇراق ايماعىن كەڭەيتۋ ارقىلى رەتسىز تۇراققا قارسى كۇرەس.
قالالىق موبيلدىلىك باسقارماسى اتاپ وتكەندەي، تۇراق كەڭىستىگىن دامىتۋ جوسپارى بۇكىل قالا ءۇشىن ءبىرىڭعاي تۇراق تيپولوگياسىن جانە اشىق تاريفتىك جۇيەنى ەنگىزۋدى كوزدەيدى.
حالىقارالىق تاجىريبەگە سايكەس «الماتى پاركينگ» كوممۋنالدىق كاسىپورنى جاقىن ماڭداعى ۇيلەردىڭ تۇرعىندارى ءۇشىن ابونەمەنتتى ەنگىزۋ تەتىگىن ازىرلەپ جاتىر.
«جەرگىلىكتى تۇرعىندار باسىمدىققا يە بولادى، ولار ءۇشىن تۇراق ورىندارىن قايتا ۇيىمداستىرۋ، اسىرەسە الماتى ورتالىعىنىڭ رەزيدەنتتەرىنە تاپتىرماس نارسە. جەرگىلىكتى تۇرعىندار ارنايى رۇقسات الادى. اۆتوكولىكتى اۆتوتۇراق ايماعىندا (ءۇيدىڭ اينالاسىنداعى بىرنەشە بلوك) ابونەمەنت بويىنشا قويۋعا بولادى. ابونەمەنت ساتىپ العان اۆتوكولىك جۇرگىزۋشىسى تۇراققا ساعاتتىق تولەم تولەمەيدى»، - دەدى «الماتى پاركينگ» باسشىسى ۆلاديمير ني.
ونىڭ ايتۋىنشا، جەڭىلدىكتى ساناتتارعا جاتاتىن ادامدار ءۇشىن ارنايى رەجيم قاراستىرىلادى. اتاپ ايتقاندا، ۇوس قاتىسۋشىلارى مەن مۇگەدەكتەرى، باسقا مەملەكەت اۋماعىنداعى ۇرىس قيمىلدارىنىڭ ارداگەرلەرى، I جانە II توپتاعى مۇگەدەكتەر، سەمەي يادرولىق پوليگونىنداعى سىناقتار سالدارىنان زارداپ شەككەن مۇگەدەك بالانىڭ زاڭدى وكىلدەرى، كوپبالالى انالار، سونداي-اق قىزمەتتىك مىندەتىن اتقارىپ جۇرگەن مەملەكەتتىك اۆتوكولىك جۇرگىزۋشىلەرى.
«ولار تەگىن تۇراققا رۇقسات الادى دەپ جوسپارلانىپ وتىر. سونىمەن قاتار، موتوسيكلدەر مەن ەلەكتروموبيلدەردىڭ يەلەرى ءۇشىن 50 پايىزدىق جەڭىلدىك قاراستىرىلعان»، - دەدى ۆلاديمير ني.
الدىن الا جوسپار بويىنشا ابونەمەنت 3، 6 نەمەسە 12 ايعا ارنالادى. بيىل تامىز-قىركۇيەك ايىندا ەنگىزىلەدى دەپ بولجانىپ وتىر.
ايتا كەتەتىن نارسە، اقىلى اۆتوتۇراق پەن ايىپپۇلدان تۇسەتىن تۇسىمدەر كولىك جۇيەسىن دامىتۋعا جانە قوعامدىق كەڭىستىكتەردى اباتتاندىرۋعا باعىتتالادى.