“التىن جاس” باعدارلاماسىن 2024 جىلدان 2028 جىلعا دەيىن ىسكە اسىرۋ جوسپارلانعان. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ ايتىپ بەردى، دەپ حابارلايدى اlmaty-akshamy.kz.
باعدارلاماعا الماتى قالاسىندا تۇراتىن جانە تىركەلگەن زەينەتكەرلىك جاسقا تولعان زەينەتكەرلەر، سونداي-اق مەنشىك فورمالارىنىڭ تۇرىنە قاراماستان الماتى قالاسىنىڭ جۇمىس بەرۋشىلەرى قاتىسادى.
"زەينەتكەرلىك جاستاعى ادامداردىڭ جالاقىسى جۇمىس بەرۋشىلەردىڭ قاراجاتى ەسەبىنەن بەلگىلەنگەن جالاقى مولشەرىنىڭ كەمىندە 50% جانە جەرگىلىكتى بيۋدجەت قاراجاتىنان 50% مولشەرىندە سۋبسيديالاۋ، ءبىراق 1 ەتج نەمەسە 85 مىڭ تەڭگەدەن اسپايتىن مولشەردە جۇرگىزىلەتىن بولادى"، – دەدى باۋىرجان جاۋباسوۆ.
باعدارلاماعا قاتىسۋ مەرزىمى ەڭبەك قاتىناستارىن مەرزىمىنەن بۇرىن توقتاتۋ مۇمكىندىگىمەن 36 ايدان اسپايدى.
باعدارلاما 2024 جىلدان 2028 جىلعا دەيىنگى كەزەڭگە ارنالعان.
باعدارلاماعا 2024 جىلى كەمىندە 500 ادام، 2025 جىلى – 1000، 2026 جىلى – 1500 ادام قامتىلادى. 2024 جىلعى 1 مامىرداعى جاعداي بويىنشا الماتى قالاسىندا 2 249 370 ادام تۇرادى، ونىڭ 247 844-ى زەينەتكەرلەر، بۇل حالىق سانىنىڭ 11%-ى.
زەينەت جاسىنداعى ادامدار ءۇشىن جۇمىس ورىندارىن قۇرۋ قاجەتتىلىگىن ءبىلۋ ماقساتىندا جۇمىس بەرۋشىلەر مەن زەينەتكەرلەر اراسىندا ساۋالناما جۇرگىزىلدى. زەينەت جاسىنا تولعان 1 076 الماتى تۇرعىنى قاتىسقان ساۋالناما قورىتىندىسى بويىنشا 80 جاسقا دەيىنگى 48% (نەمەسە 519 ادام) ەڭبەك قىزمەتىن جالعاستىرۋعا نيەتتى ەكەنىن جەتكىزگەن.
"جۇمىستى جالعاستىرۋدىڭ نەگىزگى سەبەپتەرى قوعامعا پايدالى بولۋعا دەگەن ۇمتىلىس (15%)، جۇمىس ورنىندا تالىمگەرلىك قىزمەتتى جۇرگىزۋ قاجەتتىلىگى (40%) جانە قوسىمشا تابىس تابۋ (45%) بولىپ تابىلادى"، – دەپ ناقتىلادى ب.جاۋباسوۆ.
مونيتورينگ قورىتىندىسى بويىنشا ۆەدومستۆولىق باعىنىشتى ۇيىمدار مەن جەكە كاسىپورىندار اراسىندا 1 753 ادامنىڭ جۇمىسقا ورنالاسۋ قاجەتتىلىگى انىقتالدى.
وكق سپيكەرى زەينەتكەرلىك جاستاعى ادامداردى جۇمىسقا ورنالاستىرۋدا ەڭ كوپ قاجەتتىلىك دەنساۋلىق ساقتاۋ، ءبىلىم بەرۋ جانە ونەركاسىپ سالالارىندا ەكەنىن، ونىڭ 47%-ى دارىگەر، ورتا جانە كىشى مەديسينالىق پەرسونال، پەداگوگ، تاربيەشى، ينجەنەر، ەلەكتريك، مونتەر، ارماتۋراشى، گاز-ەلەكتر دانەكەرلەۋشى، ماشينيست، ەكونوميست، بۋحگالتەر، كاسسير ت.ب. سياقتى بىلىكتى ماماندىقتار ەكەنىن اتاپ ءوتتى.
سونىمەن قاتار، الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى ەۋروپا مەن ازيانىڭ كەيبىر دامىعان ەلدەرىنىڭ (گەرمانيا مەن جاپونيا) حالىقارالىق تاجىريبەسىن زەرتتەدى. زەرتتەۋ بۇل باعدارلامالاردىڭ ىسكە اسىرۋ وڭ ديناميكاسىن كورسەتتى. مىسالى، جاپونيادا زەينەتكە شىققان ءاربىر ەكىنشى ادام ەڭبەك قىزمەتىن جالعاستىرۋدا ەكەن. وسىعان بايلانىستى، 2021 جىلعى ساۋىردەن باستاپ زاڭنامالىق نەگىزدە مىندەتتەمە ەنگىزىلدى، ونىڭ شەڭبەرىندە كومپانيالار 70 جاسقا دەيىنگى ەڭبەك قىزمەتىنە مۇمكىندىك بەرەتىن جۇيەنى ىسكە اسىرادى. وسى جۇيە شەڭبەرىندە بيزنەس يەلەرى 70 جاسقا دەيىنگى قارتتاردى جۇمىسپەن قامتىپ قانا قويماي، وسى ساناتتاعى كادرلاردىڭ اينالىمىنا تالداۋ جۇرگىزۋگە مىندەتتى.
گەرمانيادا 2014 جىلدان باستاپ "ميني" زەينەتكەرلەردى جۇمىسپەن قامتۋ فورماتى ىسكە اسىرىلعان. ول بويىنشا ۋاقىتشا جانە تۇراقتى سيپاتتاعى جۇمىسقا ايىنا 450 ەۆرو مولشەرىندە ەڭ تومەنگى جالاقى بەرىلۋدە.
وسىلايشا، جۇمىس بەرۋشىنىڭ وسى باعدارلاما اياسىندا بولسىن نەمەسە ءوز ىقتيارىمەن بولسىن زەينەتكەرلەردى جۇمىسقا ورنالاستىرۋعا مۇددەلى بولۋى قامتاماسىز ەتىلدى.
باعدارلامانى ىسكە اسىرۋ كەلەسى الگوريتم بويىنشا، قارجىلاندىرۋ ءليميتىن نەگىزگە الا وتىرىپ، الماتى قالاسىنىڭ ەڭبەك ۇتقىرلىعى ورتالىعى (مانساپتىق ورتالىق) ارقىلى جۇزەگە اسىرىلادى:
- جۇمىس بەرۋشى ەلەكتروندىق پوشتا ارقىلى جۇمىس ورنىنىڭ بوس ورنىن كورسەتە وتىرىپ، ءوتىنىم بەرەدى a.jas@almaty.gov.kz جانە ونى ەلەكتروندىق ەڭبەك بيرجاسىنىڭ ونلاين سەرۆيسىنە ورنالاستىرادى Enbek.kz "زەينەتكەر ءۇشىن" دەگەن بەلگىمەن؛
- بەرىلگەن وتىنىمدەر نەگىزىندە الماتى قالاسىنىڭ ەڭبەك ۇتقىرلىعى ورتالىعى ماماندىعى، سانى، ۇزاقتىعى جانە جۇمىس كەستەسى، ايىنا ەڭبەكاقى مولشەرى كورسەتىلەتىن ۇيىمداردىڭ تىزبەسىن جاسايدى؛
- زەينەتكەرلىك جاستاعى ادام الماتى قالاسىنىڭ مانساپ ورتالىعىنا جۇمىسقا ورنالاسۋ تۋرالى وتىنىشپەن جۇگىنەدى (دوستىق داڭعىلى، 85، 2 قابات، كاب. 201 ا) نەمەسە ەلەكتروندىق پوشتا ارقىلى a.jas@almaty.gov.kz؛
- مانساپ ورتالىعىنىڭ قىزمەتكەرى تۇيىندەمە جاساۋعا جانە قولايلى جۇمىس ورنىن تاڭداۋعا كومەك كورسەتەدى جانە اڭگىمەلەسۋگە جولداما بەرەدى؛
- جولداما بەرىلگەننەن كەيىن زەينەتكەر جۇمىس بەرۋشىمەن اڭگىمەلەسۋدەن وتەدى، ول ءساتتى وتكەن كەزدە قازاقستان رەسپۋبليكاسىنىڭ ەڭبەك كودەكسىنە سايكەس ەڭبەك شارتى جاسالادى؛
- جۇمىس بەرۋشى الماتى قالاسىنىڭ ەڭبەك ۇتقىرلىعى ورتالىعىنا جۇمىسقا قابىلداۋ تۋرالى بۇيرىقتى جانە باعدارلاماعا قاتىسۋشىنىڭ ەڭبەك شارتىنىڭ كوشىرمەسىن ۇسىنادى.