اۋلانعان جانۋارلاردى تاسىمالداۋ مامانداندىرىلعان اۆتوكولىكپەن جۇزەگە اسىرىلادى.
ءقازىر قاڭعىباس جانۋارلاردى اۋلاۋ گۋماندى جۇرگىزىلەدى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى كاسىپكەرلىك جانە ينۆەستيسيالار باسقارماسى باسشىسىنىڭ ورىنباسارى ەرلان وماروۆ مالىمدەدى، دەپ حابارلايدى Almaty-akshamy.kz.
بۇل ادام مەن جانۋارلارعا ورتاق اسا ءقاۋىپتى جۇقپالى اۋرۋلاردىڭ تارالۋىنا، سونداي-اق ادامدارعا اگرەسسيۆتى يتتەردىڭ شابۋىل جاساۋىنا جول بەرمەۋ ماقساتىندا جاسالىنۋدا. سونىمەن قاتار، اۋلاۋدىڭ ارقاسىندا قاراۋسىز جانە قاڭعىباس جانۋارلاردىڭ سانىن رەتتەۋ بويىنشا جۇيەلى جۇمىستار جۇرگىزىلۋدە.
ەرلان وماروۆ وسى جۇمىستىڭ نەگىزگى وپەراتورى الماتى قالاسى اكىمدىگىنە قاراستى كاسىپورىن – الماتى قالاسى كاسىپكەرلىك جانە ينۆەستيسيالار باسقارماسىنىڭ شجق "قالالىق ۆەتەريناريالىق قىزمەت" كمك بولىپ تابىلاتىنىن حابارلادى.
“كاسىپورىننىڭ 6 كەزەكشى بريگاداسى كۇندەلىكتى قاراۋسىز جانە قاڭعىباس جانۋارلاردى اۋلاۋ جۇمىستارىن جۇرگىزەدى. 2022 جىلدىڭ ناۋرىز ايىنا دەيىن اۋلانعان جانۋارلار يەلەرى تابىلعانعا دەيىن جانە جاڭا يەلەرىنە بەرىلگەنگە دەيىن 3 تاۋلىك بويى قاراۋدا بولعان. ق ر ۆەتەريناريا سالاسىنداعى زاڭناماسىنا سايكەس، كەرەكسىز دەپ تابىلعان جانۋارلار دارى-دارمەكپەن ۇيىقتاتىلعان. 2022 جىلدىڭ 2 ناۋرىزىنان باستاپ قازاقستان رەسپۋبليكاسىنىڭ «جانۋارلارعا جاۋاپكەرشىلىكپەن قاراۋ تۋرالى» زاڭىنىڭ قابىلدانۋىنا بايلانىستى، قاڭعىباس جانە قاراۋسىز قالعان جانۋارلاردىڭ سانىن رەتتەۋ ءتارتىبى ايتارلىقتاي وزگەردى"، - دەدى ەرلان وماروۆ.
جاڭا ەرەجەگە سايكەس، اسا ءقاۋىپتى جۇقپالى اۋرۋلارى جانە اگرەسسيا بەلگىلەرى بار جانۋارلاردى قوسپاعاندا، اۋلانعان جانۋارلاردى جانسىزداندىرۋ تىيىم سالىنادى.
جانۋارلاردى اۋلاۋ جۇمىستارى ولاردىڭ جينالۋ ورىندارىنىڭ مونيتورينگى ناتيجەلەرى بويىنشا جانە ازاماتتاردىڭ وتىنىشتەرى بويىنشا اۋلاۋ قىزمەتىنىڭ باسشىسى بەكىتكەن كەستەسىنە سايكەس جۇرگىزىلەدى.
"اۋلاۋ جانۋارعا جاراقات الۋدى جانە مەرتىگۋدى بولدىرمايتىن گۋماندى تاسىلدەرمەن جۇزەگە اسىرىلادى. ادام مەن جانۋاردىڭ ومىرىنە نەمەسە دەنساۋلىعىنا ناقتى قاتەر تونگەن جاعدايلاردى قوسپاعاندا، بالالاردىڭ قاتىسۋىمەن جانۋارلاردى اۋلاۋعا جول بەرىلمەيدى. اۋلاۋ جانۋارلارعا زيان كەلتىرمەيتىن قۇرالدارمەن، وقشاۋلانعان تۇزاقتاردى، تورلاردى، گەلدىك وقشاۋلاعىشى بار ىلمەكتەردى قولدانا وتىرىپ جۇزەگە اسىرىلادى"، - دەپ ءتۇسىندىردى ەرلان وماروۆ.
بريفينگ بارىسىندا وكق سپيكەرى اۋلاۋعا قوعامدىق ورىنداردا (كوشەلەردە، اۋلا اۋماقتارىندا، ساياباقتاردا، سكۆەرلەردە، قاراۋسىز قالعان عيماراتتاردا، قالا شەتىندە، ساياجاي القاپتارىندا جانە باسقا جەرلەردە) يەسىنىڭ قاراۋىنسىز جۇرگەن قاراۋسىز قالعان جانە قاڭعىباس جانۋارلار جاتاتىنىن حابارلادى.
ول ۆەتقىزمەتتىڭ قىزمەتكەرلەرى جاڭا مامانداندىرىلعان فورمامەن جانە ءتيىستى ۇلگىدەگى بەيدجبەن قامتاماسىز ەتىلگەندىگىن ايتتى. اۋلانعان جانۋارلاردى تاسىمالداۋ مامانداندىرىلعان اۆتوكولىكپەن جۇزەگە اسىرىلادى.
“اۋلانعان قاڭعىباس جانە قاراۋسىز قالعان جانۋارلار ۋاقىتشا ۇستاۋ پۋنكتىنە اكەلىنەدى. اۋلانعان جانۋارلاردى قابىلداۋ، جانۋاردى ەسەپكە الۋدى قاتاڭ تۇردە ۆەتەرينارلىق دارىگەر جۇرگىزەدى. ۆەتەرينارلىق دارىگەر جانۋارلاردىڭ جاراقاتتارى بار جوعىن انىقتاۋ ءۇشىن كلينيكالىق تەكسەرۋ جۇرگىزەدى، تاڭبانىڭ، تاتۋيروۆكانىڭ، ميكروچيپتىڭ بولۋىن سكانەرلەيدى”، - دەپ جالعاستىردى ەرلان وماروۆ.
جانۋاردا چيپ تابىلعان جاعدايدا PetControl دەرەكتەر بازاسىنان (PetControl - ءۇي جانۋارلارىن ەسەپكە الاتىن اقپاراتتىق جۇيەسى) قاراپ، جانۋاردىڭ قايتارىلۋىن قامتاماسىز ەتۋ ءۇشىن جانۋاردىڭ يەسىمەن حابارلاسادى. سونداي-اق، جاراقات پەن زاعيپتىقتى انىقتاۋ ءۇشىن ۆەتەرينارلىق مامان كلينيكالىق تەكسەرۋدەن وتەدى. تابىلعان جاعدايدا العاشقى ۆەتەريناريالىق كومەك كورسەتىلەدى.
اۋلانعان جانۋارلارعا اسا ءقاۋىپتى اۋرۋلارعا (وبا، ميكروسپوريا، تريحوفيتيا) دياگنوستيكالىق زەرتتەۋلەر جۇرگىزىلەدى. وڭ ناتيجە بەرگەن جانۋار، كورسەتىلگەن زاڭعا سايكەس، دارى-دارمەكپەن جانسىزداندىرىلادى.
كورسەتىلگەن پروسەدۋرالاردان باسقا، ۇستالعان يتتەرگە كينولوگيالىق ساراپتاما جۇرگىزىلۋدە. اسا ءقاۋىپتى اۋرۋلارى مەن اگرەسسيا بەلگىلەرى انىقتالماعان جانۋارلار ۆاكسيناسيالاۋ، زارارسىزداندىرۋ، تاڭبالاۋ جاسالعاننان كەيىن ءۇشىنشى تۇلعالارعا بەرىلەتىن نەمەسە اۋلانعان ورىندارىنا جىبەرىلەتىن بولادى.
اۋلانعان مالدى زارارسىزداندىرۋ جانە وپەراسيادان كەيىنگى كۇتىم تالاپتارىن ەسكەرە وتىرىپ، ءتيىستى حيرۋرگيالىق قۇرال-جابدىقتاردى، ۆەتەرينارلىق پرەپاراتتاردى جانە قورشاۋلارى بار مودۋلدىك بلوكتاردى ساتىپ الۋعا قوسىمشا قاراجات ءبولىندى.
ءوزارا ءىس-قيمىلدى ۇيلەستىرۋدى جاقسارتۋ ءۇشىن اعىمداعى جىلدىڭ 20 شىلدەسىندە الماتى وبلىسىنىڭ اكىمدىگىمەن ىنتىماقتاستىق تۋرالى مەموراندۋمعا قول قويىلدى.