ونىڭ ءوز بالالارىنا بەرەشەگى 5 ميلليون 144 مىڭ 362 تەڭگەنى قۇراعان
ۇكىم الماتىداعى كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا شىقتى. اليمەنت تولەمەيتىن قاسكوي ءبىر جىلعا باس بوستاندىعىنان ايىرىلدى، دەپ حابارلايدى Almaty-akshamy.kz.
الماتى قالالىق پوليسيا دەپارتامەنتىنىڭ مالىمەتىنشە، قىلمىستىق ءىستى انىقتاۋ باسقارماسى تەرگەگەن.
«ءىس بويىنشا، 1990 جىلى تۋعان چ.ەسىمدى ازامات، بەس جىل بويى ەكى كىشكەنتاي بالاسىنا اليمەنت تولەۋدەن جالتارىپ كەلگەن. ءوزىن قورعاۋ ءۇشىن ەر ادام رەسمي كىرىسى جوق ەكەنىن العا تارتتى. سوتقا دەيىنگى تەرگەۋمەن انىقتالعانداي، كۇدىكتىنىڭ كىرىسى بولعان، ول جاي عانا اليمەنتتەردى قاساقانا تولەمەگەن. ونىڭ ءوز بالالارىنا بەرەشەگى 5 ميلليون 144 مىڭ 362 تەڭگەنى قۇراعان. سوت ۇكىمىمەن چ.ەسىمدى ازامات سوت زالىندا قاماۋعا الىندى»، - دەدى، الماتى قالالىق پوليسيا دەپارتامەنتى باستىعىنىڭ ورىنباسارى، پوليسيا پولكوۆنيگى رۇستەم ءابدراحمانوۆ.