بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ Telegram كانالىندا جازدى.
سوڭعى ۋاقىتتا كوپ قاباتتى ۇيلەر مەن الەۋمەتتىك وبەكتىلەردە رۇقساتسىز قۇرىلىس جۇرگىزۋ ماسەلەلەرى جيىلەپ كەتكەن. اتالعان كەمشىلىك - مەملەكەتتىڭ جانە جالپى ەل تۇرعىندارىنىڭ ورتاق ماسەلەسى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ۆەدومستۆو باسشىسىنىڭ پايىمداۋىنشا، جىل باسىنان بەرى قۇرىلىس نىساندارىندا جالپى سوماسى 169 ملن تەڭگەدەن استام 615 اكىمشىلىك قۇقىقبۇزۋشىلىق تىركەلگەن.
«ءبىز جەرگىلىكتى اتقارۋشى ورگانداردىڭ ساۋلەت، قالا قۇرىلىسى جانە قۇرىلىس قىزمەتى سالاسىنداعى جۇمىستارىن تۇراقتى نەگىزدە ءوز باقىلاۋىمىزدا ۇستايمىز. ماسەلەن، الماتى قالاسىندا تۇرعىن ءۇي كەشەندەرىنىڭ بىرىندە قۇرىلىس جۇمىستارى زاڭسىز جۇرگىزىلگەن. رۇقسات بەرەتىن قۇجاتتاردى ۋچاسكەنىڭ مەنشىك يەسى دە، قۇرىلىس سالۋشى دا ۇسىنباعان. قۇرىلىس سالۋشى پاتەرلەردى ساتىپ الۋ-ساتۋ شارتتارىن جاساسۋعا قۇقىعى بولماعانىنا قاراماستان، اتالعان تۇرعىن ءۇي كەشەنىندەگى پاتەرلەر ەركىن ساۋدالانعان. ءتىپتى، قۇرىلىس سالۋشىنىڭ ۇلەسكەرلەردەن اقشا تارتۋىنا رۇقسات بەرىلمەگەن»، – دەدى مينيستر.
وسىلايشا، بيىل 28 ناۋرىزدا الماتى قالا قۇرىلىسىن باقىلاۋ باسقارماسى كەيبىر عيماراتتاردا قۇرىلىس-مونتاجداۋ جۇمىستارىن توقتاتا تۇرۋ جانە انىقتالعان كەمشىلىكتەردى تۇزەتۋ تۋرالى ۇسىنىس بەردى. قازىرگى ۋاقىتتا قۇرىلىس جۇمىستارى توقتاتىلىپ، «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭ نورمالارىن بۇزعانى ءۇشىن قۇرىلىس سالۋشىعا قاتىستى حاتتاما تولتىرىلعان.
مينيستر سونىمەن بىرگە قاڭتار-ناۋرىز ايلارىندا يندۋستريا جانە ينفراقۇرىلىمدىق دامۋ مينيسترلىگىنىڭ جاۋاپتى كوميتەتى 32 تەكسەرۋ جۇرگىزىپ، ناتيجەسىندە 26 نۇسقاما بەرىلگەنىن، سونداي-اق، 18 لاۋازىمدى تۇلعا اكىمشىلىك جاۋاپكەرشىلىككە تارتىلعانىن حابارلادى.
ەندىگى كەزەكتە ق ر ييدم مەملەكەتتىك باقىلاۋ جانە وبەكتىلەردى پايدالانۋعا قابىلداۋ جۇيەسىن تولىعىمەن قايتا قارايدى. بۇل رەتتە باقىلاۋ مەحانيزمىن كۇشەيتۋ جوسپارلانىپ وتىر. ونىڭ ىشىندە، وبەكتىنىڭ پايدالانۋعا بەرۋ دايىندىعىن راستاۋ ءۇشىن نىسانداردى قابىلداۋ بارىسىندا مەملەكەتتىك ساۋلەت-قۇرىلىس باقىلاۋ ورگاندارىنى مىندەتتى تۇردە قاتىساتىن بولدى.