قازاقستاندا العاش رەت 3D-تەحنولوگيانىڭ كومەگىمەن سىرقاتتىڭ جامباس سۇيەگىن قالپىنا كەلتىردى
استانالىق جەدەل جاردەم قىزمەتىنىڭ فەلدشەرى نۇرداۋلەت مەكەنبايعا الماتىداعى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ماماندارى «حوندروساركوما» دەگەن دياگنوز قويعان بولاتىن. وسى ارالىقتا وتاندىق ونكولوگتەر 23 جاستاعى ناۋقاستى الدىن الا ەرەكشە وپەراسيا جاساۋعا دايىندادى، دەپ حابارلايدى Almaty-akshamy.kz «ەگەمەن قازاقستان» گازەتىنە سىلتەمە جاساپ.
قازاقستاندا العاش رەت 3D-تەحنولوگيانىڭ كومەگىمەن سىرقاتتىڭ جامباس سۇيەگىن قالپىنا كەلتىردى. ءبىرىنشى وپەراسيا قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ سۇيەكتەر، جۇمساق تىندەر مەن مەلانوما ىسىكتەرى ورتالىعىندا جۇرگىزىلدى.
«ناۋقاسقا الدىمەن مۋلتيديسيپلينارلىق دارىگەرلەر توبى كەڭەس بەردى. بۇرىن مۇنداي دياگنوز قويىلعان كەزدە حيرۋرگتەر جامباس سۇيەكتەرىنىڭ زاقىمدالعان اۋماعىن الىپ تاستاۋعا ءماجبۇر ەدى. بۇل جامباس قۋىسىنىڭ تۇتاستىعىن بۇزىپ، ادامنىڭ ءجۇرىسىنىڭ وزگەرۋىنە، ناۋقاستىڭ ومىرتقاسىنىڭ قيسايۋىنا اكەلەدى. بۇل وپەراسيانىڭ ارتىقشىلىعى، ەمدەلۋشىنىڭ جاسىن ەسكەرە وتىرىپ، ونكوحيرۋرگتەر ىسىكتى الىپتاستاپ قانا قويماي، ناۋقاستىڭ ءومىر ساپاسىن دا ساقتاپ قالۋدى دا ماقسات تۇتتى»، - دەدى «قازوجرعزي» اق سۇيەكتەر، جۇمساق تىندەر مەن مەلانوما ىسىكتەرى ورتالىعىنىڭ باسشىسى، تاجىريبەلى ونكوحيرۋرگ عاني سەرىكبايەۆ.
جوبا تۇرىندەگى وپەراسيانى جاساۋ ءۇشىن قىتايلىق Koln 3D Technology كومپانياسىمەن قوسا گونكونگ ۋنيۆەرسيتەتىمەن بىرلەسىپ ۇزاق مەرزىمدى مەموراندۋم جاسالعان. وسى مامىلەدەن كەيىن ناۋقاستىڭ كت-دەرەكتەرى گونكونگقا جىبەرىلىپ، سول قالادا 3D-باسىپ شىعارۋ ارقىلى كوبالت-حروم قورىتپاسىنان ارنايى پروتەز جاسالعان.
وسىلايشا، ونكولوگياداعى العاشقى 3D وپەراسيا بيىل قىركۇيەك ايىندا جاسالدى. وپەراسيا بارىسىندا پاسيەنتتىڭ قىر-مىقىن سۇيەگىنىڭ قاناتى، سونداي-اق ىسىكتەن بۇلىنگەن جۇمساق تىندەر الىنىپ تاستالدى. 3 ساعاتقا جالعاسقان وپەراسيا كەزىندە كومپيۋتەرلىك جانە 3D-تەحنولوگيالار قولدانىلا وتىرىپ، جەكە مالىمەتتەر بويىنشا ارنايى جاسالعان جەكە ەندوپروتەزبەن جامباس سۇيەكتەرى قايتا قالپىنا كەلتىرىلدى.
«الماتىداعى ونكولوگيا ينستيتۋتىنا ءوز تاڭداۋىممەن كەلدىم. 2018 جىلدان بەرى وسى دەرت مازالاپ كەلەدى. ماماندار گيستولوگياعا تەكسەرگەننەن كەيىن وپەراسيا جاساتۋعا دايىنداپ، بۇل پروتەز كەز كەلگەن ادامعا قويىلا بەرمەيتىنىن جانە ەلىمىزدە ءبىرىنشى رەت جاسالاتىن كۇردەلى وپەراسيا ەكەنىن ايتتى. ارينە، ۋايىم دا بولدى، ءوزىم دە مەديسينا سالاسىندا جۇرگەندىكتەن، ەموسيالىق تۇرعىدا دايىندالۋ، مۇجىلمەۋ قاجەت ەكەنىن ىشتەي ءتۇيسىندىم. دارىگەرلەرگە ريزامىن، ولار وتانىڭ قانداي ادىسپەن جاسالاتىنى تۋرالى وتە جاقسى ءتۇسىندىردى. اسىرەسە ءبولىم مەڭگەرۋشىسى عاني امانگەلدى ۇلى مەن دارىگەرىم جانات ءومىرزاققىزىنا العىس ايتامىن. ەلگە جانى اشيتىن وسىنداي مىقتى ماماندار قاتارى كوبەيە بەرسە ەكەن دەپ تىلەيمىن. ولار وسىنداي ەرەكشە جاعدايدا ماعان مىقتى پسيحولوگيالىق كومەك كەرەك ەكەنىن دە جاقسى ءتۇسىنىپ، ۇلكەن قولداۋ كورسەتتى. ەڭ باستىسى، دەر كەزىندە ەمدەلگەنىمە قۋانامىن»، - دەدى نۇرداۋلەت.