الماتىدا العاش رەت ۇرلانعان تەحنيكالاردى انىقتايتىن سايت ىسكە قوسىلدى

جوبانى قالالىق پروكۋراتۋرا مەن «اتامەكەن» كاسىپكەرلەر پالاتاسى جۇزەگە اسىرعان

الماتىدا العاش رەت ۇرلانعان تەحنيكالاردى انىقتايتىن سايت ىسكە قوسىلدى. جوبانى قالالىق پروكۋراتۋرا مەن «اتامەكەن» كاسىپكەرلەر پالاتاسى جۇزەگە اسىرعان، دەپ حابارلايدى Almaty-akshamy.kz Almaty.tv-گە سىلتەمە جاساپ.

ەلىمىزدە العاش رەت ۇرلانعان.كز پلاتفورماسى ىسكە قوسىلدى. بۇگىن الماتى قالاسى پروكۋرورلارى مەن اتامەكەن كاسىپكەرلەر پالاتاسى سايتتى رەسمي تۇردە تانىستىردى.

سايتقا سوڭعى جىلدارى قالا اۋماعىندا قولدى بولىپ، پوليسياعا ارىزدانعانداردىڭ 100 مىڭنان اسا قۇرىلعىسى ەنگەن. ونىڭ اراسىندا كومپيۋتەر، تەلەفون، ەلەكتروندى ساعات سياقتى تەحنيكالار بار.

«قازىرگى تاڭدا سايتتاردان قولما-قول ساتىپ الادى. ساتىپ الاردا، تاۋاردى الدىن الا تەكسەرۋگە بولادى. سوندا ۇرلانعان زاتتىڭ ساتىلىپ كەتپەۋىنە كەدەرگى بولا الادى»، – دەدى قالالىق پروكۋراتۋرانىڭ رەسمي وكىلى نۇرسۇلتان جيدەلباي.

ماماندار بۇل قاراپايىم تۇتىنۋشىعا عانا ەمەس، تاۋاردى قايتا ساتاتىن كاسىپكەرلەرگە دە پايدالى دەگەن سەنىمدە. ويتكەنى ساۋداگەرلەر قولدانىلعان تەحنيكالاردىڭ ۇرلانعانىن وزدەرى دە بىلمەي، باستارى ءجيى داۋعا قالاتىن كورىنەدى.

«ۇرلانعان تەلەفوندار كوپ كەلەدى. ساتىپ تا ۇلگەرمەيمىز كەيدە. پوليسيا قىزمەتكەرلەرى كەلىپ تەلەفونلارىمىزدى الىپ كەتەدى. اقشاسىز دا، تەلەفونسىز دا قالامىز. بىزگە وتە ءتيىمدى بولدى بۇل پروگرامما»، – دەدى كاسىپكەر يليار اسانوۆ.

جوبانى جاساۋشىلار الماتىمەن شەكتەلىپ قالماي بۇل باعدارلامانى ەل اۋماعىنا دا تاراتۋدى جوسپارلاپ وتىر. سايتتى وزگە دە اقپاراتتىق بازالارمەن بىرىكتىرۋ دە كوزدەلگەن.