الماتىدا ءتورت سۋبۇرقاق كەشەنىنىڭ قايتا جاڭارتىلۋى باستالدى، ولار الماتى اكىمدىگىنىڭ شىعىس جانە باتىس سۋبۇرقاقتارى، رەسپۋبليكا الاڭىنداعى سۋبۇرقاق جانە ع.مۇسرەپوۆ اتىنداعى تەاتر عيماراتى الدىنداعى سۋبۇرقاق.
جوبانىڭ ساراپتاماسى كورسەتكەندەي، بۇل نىسانداردىڭ تەحنيكالىق جاعدايى قاناعاتتانارلىقسىز. گيدرووقشاۋلاۋدىڭ توزۋى، ەسكىرگەن ناسوس قوندىرعىلارى مەن سۇزگىلەۋ جۇيەلەرى كەشەندى جاڭارتۋدى قاجەت ەتەدى.
مودەرنيزاسيا اياسىندا تەحنيكالىق عيماراتتاردىڭ قۇرىلىمدارىن كۇشەيتۋ، ينجەنەرلىك كوممۋنيكاسيانى، سۋ جابدىقتاۋدى، گيدرووقشاۋلاۋشى قاباتتى تولىق اۋىستىرۋ، ناسوس ستانسيالارىمەن جانە سۋ ءسۇزۋ جۇيەلەرىن جاڭارتۋ، اۆتوماتتاندىرىلعان باسقارۋدى ەنگىزۋ، سونداي-اق، جاقىن اۋماقتاردى كوركەيتۋ جوسپارلانعان.
سونىمەن قاتار، بۇرىككىشتەر، جارىقتاندىرۋ قۇرالدارى، سورعى قوندىرعىلارى، باسسەيندەر، جارىقتاندىرۋ، قۇبىرلار، گرانيت پليتالارى جانە باسقا دا ماڭىزدى ەلەمەنتتەر اۋىستىرىلادى.
قالا تۇرعىندارىنىڭ قاۋىپسىزدىگىن قامتاماسىز ەتۋ ءۇشىن سۋبۇرقاق كەشەندەرىندە ەلەكتر توگىنىڭ سوعۋ ءقاۋپىن بولدىرمايتىن تومەن ۆولتتى شامدار مەن قۇرعاق سورعى جابدىقتارى ورناتىلادى. سۋدى تازارتۋ بەلسەندى وتتەگى گەنەراتورىن قولدانۋ ارقىلى جۇزەگە اسىرىلادى، بۇل سۇيىق حلوردان باس تارتۋعا جانە پايدالانۋ شىعىندارىن ازايتۋعا مۇمكىندىك بەرەدى.
ايتا كەتۋ كەرەك، سۋبۇرقاقتاردى اۋقىمدى قايتا جاڭارتۋ العاش رەت جۇرگىزىلىپ وتىر. بۇرىن تەك كىشىگىرىم جوندەۋ جۇمىستارى عانا جاسالعان. جوبانىڭ اياسىندا تاريحي كەلبەتتى ساقتاۋ ەرەكشە نازاردا بولادى، بۇل جاڭارتىلعان نىسانداردىڭ ساۋلەتتىك قۇندىلىعىن ساقتاپ، قالا لاندشافتىندا ۇيلەسىمدى تۇردە ورنالاسۋىن قامتاماسىز ەتەدى.
قۇرىلىس-مونتاج جۇمىستارى ساۋىردە باستالىپ، 2025 جىلدىڭ قازان ايىندا اياقتالادى. قايتا جاڭارتۋدان كەيىن سۋبۇرقاقتار قالا تۇرعىندارى مەن قوناقتارى ءۇشىن اسەمدىك پەن دەمالىس ايماقتارىنا اينالادى.
تاريحي انىقتاما:
الماتى اكىمدىگىنىڭ شىعىس جانە باتىس سۋبۇرقاقتارى 1979 جىلى قازاق كسر كومپارتياسى ورتالىق كوميتەتىنىڭ ءبىرىنشى حاتشىسى د. ا. قونايەۆتىڭ باستاماسىمەن ءىرى ساۋلەت جوباسى اياسىندا سالىندى. ولاردى ازىرلەۋمەن ساۋلەتشى ق. مونتاحايەۆتىڭ باسشىلىعىمەن «المااتاعيپروگور» جوبالاۋ ينستيتۋتى اينالىستى. سۋبۇرقاقتار رەسپۋبليكا الاڭىنىڭ اينالاسىنداعى اكىمشىلىك عيماراتتار انسامبلىنە ۇيلەسىمدى تۇردە ورنالاسقان. 2010 جىلى سۋبۇرقاقتارعا كوسمەتيكالىق جوندەۋ جۇرگىزىلگەن، ءبىراق قازىرگى ۋاقىتقا دەيىن كۇردەلى جاڭارتۋ جۇمىستارى جۇرگىزىلمەگەن.
رەسپۋبليكا الاڭىنداعى سۋبۇرقاق 1979 جىلى سالىنعان جانە وسى الاڭنىڭ باستى ەلەمەنتى بولىپ تابىلادى. ونىڭ جوباسىن دا ارحيتەكتور ك. مونتاحايەۆ پەن «المااتاگيپروگور» ينستيتۋتى ازىرلەگەن. 2010 جىلى جوندەۋ جۇمىستارى جۇرگىزىلدى، ءبىراق ءقازىر قۇرىلىمدار مەن ينجەنەرلىك جۇيەلەردى تولىق جاڭارتۋ قاجەت.
ع.ءمۇسءىرەپوۆ اتىنداعى تەاتر عيماراتى الدىنداعى سۋبۇرقاق 1962 جىلى سالىنعان. جوبا اۆتورلارى ساۋلەتشىلەر ا.ا. لەپپيك، ن.ي. ريپينسكيي جانە ۆ.ز. كاسيەۆ. 2009 جىلى سۋبۇرقاق ءىشىنارا قالپىنا كەلتىرىلدى، ءبىراق بۇگىندە ول كۇردەلى جوندەۋدى قاجەت ەتەدى.