№4 قالالىق كلينيكالىق اۋرۋحانادا حالىقارالىق شەبەرلىك سىنىبى ءوتتى، وندا تراۆماتولوگتار مەن ورتوپەدتەر تولىق اۆتوماتتاندىرىلعان ورتوپەديالىق جۇيەمەن وتا جاساۋ داعدىلارىن جەتىلدىردى.
بۇل شەبەرلىك سىنىبى بارىسىندا تىزە بۋىنىنىڭ پاتولوگياسى بار ءتورت ناۋقاسقا روبوت كومەگىمەن ەندوپروتەزدەۋ وتالارى جاسالدى. روبوت جۇيەسى تىزە بۋىندارىن ستەرەوتاكتيكالىق قۇرىلعى رەتىندە قولدانىپ، ناۋقاستاردىڭ مرت جانە كت سۋرەتتەرىن پايدالانا وتىرىپ، حيرۋرگتارعا وتا الدىنداعى دايىندىقتى جوسپارلاۋعا جانە وپەراسيا بارىسىندا اناليتيكالىق اقپارات بەرۋگە كومەكتەستى.
بولىمشە مەڭگەرۋشىسى ماناربەك اۋباكىروۆ روبوت كومەگىمەن العاشقى وتالاردىڭ ءبىرىن ءساتتى جاسادى.
«ءبىز تىزە بۋىنىنىڭ 3-4 دارەجەلى دەفورماسيالىق گونارتروزىمەن 10 جىلدان استام ۋاقىت بويى اۋىرىپ جۇرگەن ناۋقاسقا وپەراسيا جاسادىق. 3 نەمەسە 4 دارەجەلى گونارتروزدى ەمدەۋدىڭ ەڭ ءتيىمدى جولى – حيرۋرگيالىق ارالاسۋ. وتا الدىندا تىزە بۋىنىنىڭ كومپيۋتەرلىك توموگرافياسى جاسالىپ، ونىڭ دەرەكتەرى جۇيەگە جۇكتەلدى. روبوت ءبىز ءۇشىن دەفورماسيانى، يمپلانت ولشەمىن ەسەپتەپ، وتا كەزىندە جۇيە تاپسىرمانى ءوز بەتىمەن ورىندادى. روبوت ميلليمەترلىك دالدىكپەن وتالىق ايماقتى كەسىپ، ادام فاكتورىن تولىعىمەن جويدى. بۇل جوعارى دەڭگەيدەگى مامانداندىرىلعان تەحنولوگيا بولعاندىقتان، ناۋقاس تەزىرەك قالپىنا كەلەدى، وتادان كەيىنگى اۋىرسىنۋ ازايىپ، جاراقات از بولادى»، – دەدى ماناربەك اۋباكىروۆ.
№4 قالالىق كلينيكالىق اۋرۋحانا – جەدەل جانە جوسپارلى حيرۋرگيالىق، تراۆماتولوگيالىق، نەيروحيرۋرگيالىق جانە كارديوحيرۋرگيالىق كومەكتىڭ تولىق سيكلىمەن قامتاماسىز ەتەتىن مامانداندىرىلعان ورتالىق. قازىرگى تاڭدا اۋرۋحانادا ريەۆيزيالىق ەندوپروتەزدەۋ بويىنشا شەبەرلىك سىنىبى دا وتۋدە، وندا جۇقپالى اسقىنۋلار ماسەلەلەرى تالقىلانۋدا. بۇل اۋرۋحانا ءىرى بۋىنداردى اۋىستىرۋ سالاسىنىڭ فلاگمانى بولىپ تابىلادى. جىل سايىن مۇندا 2 مىڭعا جۋىق بۋىن اۋىستىرۋ وتالارى جاسالادى.
سونداي-اق، س.د. اسفەندياروۆ اتىنداعى قازۇمۋ تراۆماتولوگيا جانە ورتوپەديا كافەدراسىنىڭ پروفەسسورلىق-وقىتۋشىلىق قۇرامى مەن اۋرۋحانانىڭ جەتەكشى دارىگەرلەرى شەبەرلىك سىنىبىنىڭ نەگىزگى سپيكەرلەرى بولدى.
ايتا كەتۋ كەرەك، بۇعان دەيىن ءتورتىنشى قالالىق اۋرۋحانادا جارتىلاي اۆتوماتتى جۇيەسى بار روبوت سىناقتان وتكەن بولاتىن.