قازاقتا جەتى اتانى ءبىلۋدىڭ ماڭىزى زور
الماتىدا العاش رەت «شەجىرە» جاس وتباسى فورۋمى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
«بالا دەگەن امانات. اماناتقا قيانات جاساماۋ كەرەك». وسىلاي دەگەن شاراعا قاتىسۋشىلار بالالاردى ءتىرى جەتىم ەتپەي، تولىق وتباسىندا ءوسىرۋ كەرەك. ال اجىراسقاندارى ءوز ۇرپاعىنان قول ۇزبەۋى قاجەت ەكەنىن ايتتى. سوندىقتان فورۋمدا وتباسى ينستيتۋتىن دۇرىس قالىپتاستىرۋدىڭ جولدارى تالقىلاندى. ايتا كەتەيىك، ەلىمىزدە وتكەن جىلى 48 مىڭنان اسا ادام اجىراسىپتى. ستاتيستيكانى باسا نازارعا العان ساراپشىلار جاڭادان وتاۋ قۇرعان وتباسىلاردى دەمەپ، ەرلى-زايىپتىلار اراسىنداعى ماسەلەلەردى قالاي شەشۋگە بولاتىنىن كورسەتتى.
«كۇيبەڭ تىرلىكتە كوپ نارسە ۇمىتىلىپ، «وتباسى كۇنى» مەرەكەسىنە ءمان دە بەرمەيمىز. ءبىراق ءومىردىڭ ءمانى – وسى جانۇيا ەكەنىن ۇمىتپاۋىمىز كەرەك. فورۋمداعى كەلگەندەردىڭ اراسىندا كوپبالالى، جالعىزباستى انالار، اجىراسقان اكەلەر بار. ولار ءوز باستارىنان وتكەن قيىندىقتاردى، ونى قالاي جەڭگەندەرىن ءبولىستى. جۇمىس ىستەپ، كاسىپ جۇرگىزىپ ءجۇرىپ تە جاقسى اتا-انا، اياۋلى جار بولۋعا بولادى. سونى تاجىريبە رەتىندە كورسەتكىمىز كەلدى. سولاردىڭ تاعدىرىن ەستىپ، ومىرىنەن ساباق الىپ، قاتەلىكتەرىن جاساماۋعا سەپ بولسىن دەگەن نيەت بار»، – دەدى «اكەلەر وداعى» رقب مۇشەسى ءاليحان مۇساتايەۆ.
فورۋمنىڭ «شەجىرە» دەپ اتالۋى بەكەر ەمەس. ويتكەنى قازاقتا جەتى اتانى ءبىلۋدىڭ ماڭىزى اسا زور. سوندىقتان باسقوسۋعا كەلۋشىلەرگە اتا تەكتى ايقىندايتىن تۋىندىلار كورسەتىلدى. جيىنعا قاتىسقاندار سوڭعى ۋاقىتتا شەجىرەگە قىزىعاتىنداردىڭ قاتارى ارتقانى قۋانتادى دەيدى.
«ءبىزدىڭ قازاقتا شەجىرە ارقىلى وتباسىلىق قۇندىلىق ساقتالعان. ول تۋعاننان باستاپ جەتى اتاسىن اينىتپاي كوبەيتۋ كەستەسىندەي مىندەتتى تۇردە قايتالاتىپ وتىرعان. گەنەتيكتەردىڭ ايتۋى بويىنشا، بۇل وتە مىقتى دۇنيە. تۇقىم قۋالايتىن اۋرۋ بولماۋى ۇشىنپروفيلاكتيكاسى رەتىندە جەتى اتاعا دەيىن قىز الىسپاۋ سالتىن ايتىپ ءجۇر. سوندىقتان شەجىرەنىڭ تۇبىنە كەلگەندە بۇل بىرىنشىدەن، اتا-بابامىزعا قۇرمەت. ەكىنشىدەن، قان تازالىعى»، – دەدى كاسىپكەر نۇرگۇل امىرە.