الماتىدا العاش رەت دۇنيەجۇزىلىك ستوماتولوگتار فەدەراسياسىنىڭ ەۋروپالىق سەكسياسىنىڭ پلەنارلىق وتىرىسى ءوتتى.
فورۋمعا 48 ەلدەن 110 دەلەگات قاتىستى. بۇل سالالىق جيىن ەۋروپا مەن ورتالىق ازيا ەلدەرىندەگى ستوماتولوگيا سالاسىنىڭ دامۋ ماسەلەلەرىن تالقىلايتىن ماڭىزدى الاڭعا اينالدى.
قاتىسۋشىلار اۋىز قۋىسى اۋرۋلارىن دياگنوستيكالاۋ مەن ەمدەۋدە يننوۆاسيالىق تەحنولوگيالاردى قولدانۋ، كلينيكالىق پراكتيكانىڭ ءتۇرلى اسپەكتىلەرى، كۇردەلى جاعدايلاردا جاسالاتىن حيرۋرگيالىق ارالاسۋلار مەن پروفيلاكتيكا شارالارىنىڭ زاماناۋي تاسىلدەرىن تالقىلادى.
جيىننىڭ اشىلۋىندا ق ر دەنساۋلىق ساقتاۋ ءمينيسترى اقمارال ءالنازاروۆا قۇتتىقتاۋ ءسوز سويلەدى. ول ستوماتولوگيانىڭ قوعامدىق دەنساۋلىقتى قالىپتاستىرۋداعى ماڭىزدى ءرولىن اتاپ ءوتتى.
«ستوماتولوگيالىق مارتەبە – اعزانىڭ جالپى جاعدايىنىڭ نەگىزگى كورسەتكىشتەرىنىڭ ءبىرى بولىپ تابىلادى جانە سوماتولوگيالىق سىرقاتتانۋشىلىقتى ازايتۋعا باعىتتالعان شارالار جۇيەسىن ازىرلەۋ – ۇلت دەنساۋلىعىن جاقسارتۋ باعدارلامالارىنىڭ اجىراماس بولىگى بولىپ تابىلادى»، – دەپ اتاپ ءوتتى ۆەدومستۆو باسشىسى.
مينيستر بارلىق ستوماتولوگ دارىگەرلەردى، ەڭ الدىمەن، پروفيلاكتيكالىق شارالار ارقىلى اۋرۋ دەڭگەيىن تومەندەتۋ ءۇشىن كۇش بىرىكتىرۋگە شاقىردى.
وتكەن جىلدان باستاپ رەسپۋبليكادا مەكتەپ جاسىنداعى بالالاردىڭ اراسىندا ستوماتولوگيالىق اۋرۋلاردىڭ جۇيەلى پروفيلاكتيكاسىنا باعىتتالعان باعدارلاما ىسكە قوسىلدى. ماقساتى – ەرتە كەزەڭدە اۋرۋلاردى انىقتاۋ جانە ديناميكالىق باقىلاۋ ارقىلى ستوماتولوگيالىق اۋرۋلاردىڭ تارالۋىن 10%-عا ازايتۋ، سونىمەن قاتار، بالالار ءۇشىن ستوماتولوگيالىق كومەكتىڭ قولجەتىمدىلىگىن 80%-عا دەيىن ارتتىرۋ.
قازاقستاندا ستوماتولوگيا – شەتەلدىڭ الىس-جاقىن ەلدەرىنەن مەديسينالىق تۋريستەردى تارتاتىن ەڭ قارقىندى دامىپ جاتقان مەديسينالىق سالالاردىڭ ءبىرى.
بۇگىندە قازاقستانعا ءتىس ەمدەۋ، پارودونت تىندەرىن قالپىنا كەلتىرۋ، دەنتالدىق يمپلانتاتتاۋ جانە پروتەزدەۋ ءۇشىن اقش، گەرمانيا، يران، رەسەي جانە تمد ەلدەرى سياقتى 37 ەلدىڭ ازاماتتارى كەلۋدە، بۇل – ەلىمىزدەگى ستوماتولوگيالىق كومەكتىڭ جوعارى ساپاسىنىڭ ايقىن دالەلى.