قازاقستاندا ءبىر ايدان سوڭ ءبىلىم بەرۋدەگى جاڭا تەحنولوگيالار بويىنشا الەمدەگى ەڭ ءىرى كونفەرەنسيالاردىڭ ءبىرى – EdCrunch Glocal وتەدى. 8 جىل بۇرىن قۇرىلعان كونفەرەنسيا ەل تاۋەلسىزدىگىنىڭ 30 جىلدىعىن مەرەكەلەۋ قارساڭىندا الماتى قالاسىندا وتپەك، دەپ حابارلايدى almaty-akshamy.kz
ءىس-شاراعا ماسكەۋ، تەل-اۆيۆ پەن سينگاپۋردەگى جەرگىلىكتى ونلاين-ستۋديالاردىڭ سپيكەرلەرى قوسىلادى. وتكەن جىلى گيبريدتى (وفلاين جانە ونلاين) فورماتتا وتكىزىلگەن كونفەرەنسياعا 14000-نان استام ادام قاتىستى. مەملەكەتتىك ءبىلىم بەرۋ ۇيىمدارىنىڭ وكىلدەرى ءۇشىن قاتىسۋ ادەتتەگىدەي تەگىن بولادى.
كونفەرەنسيا باعدارلاماسى بەس بولىمنەن تۇرادى: ەرتە بالالىق شاق، 21 عاسىر مەكتەبى، سيفرلى ۋنيۆەرسيتەت، كورپوراتيۆتى وقىتۋ جانە EdTech.
2021 جىلدىڭ باستى تاقىرىبى – «جاڭا ءبىلىم بەرۋ تاجىريبەسىن جوبالاۋ» (Learning experience design). 25 ەلدەن كەلگەن 300-دەن استام سپيكەرلەر 150 ساراپتامالىق سەسسيا، پانەلدىك پىكىرتالاس جانە شەبەرلىك سىنىپتارىن وتكىزەدى. ولار پەداگوگيكالىق ديزاين سالاسىنداعى وزىق تاجىريبەلەرىمەن بولىسەدى، بىرەگەي يدەيالار مەن جاڭالىقتاردى كەڭ اۋديتورياعا جەتكىزۋ ءۇشىن ءبىلىم بەرۋ سالاسىنىڭ بولاشاعى مەن جاڭا تەحنولوگيالاردىڭ، وقىتۋ سالاسىنداعى عىلىمي جەتىستىكتەردىڭ اسەرىن تالقىلايتىن بولادى:
- الەمدىك بەستسەللەر «تابىستى ادامدى قالاي تاربيەلەۋ كەرەك» كىتابىنىڭ اۆتورى (100 مىڭ دانادان استام ساتىلىمى بار)، Google كەڭەسشىسى، ءۇش قىزدىڭ اناسى ەستەر ۆويدجيسكي بالانى كىشكەنتاي كەزىنەن جەتىستىككە قالاي جەتەلەۋگە بولاتىندىعى تۋرالى كەڭەس بەرەدى. ول ءوزىنىڭ پەداگوگيكالىق ءتاسىلىن بەسكە ءبولىپ قاراستىرادى: وز-وزىنە سەنۋ، ءوز-وزىن قۇرمەتتەۋ، دەربەستىك، ىنتىماقتاستىق، اقجۇرەكتىك.
- الەمگە ايگىلى نەيروبيولوگ، «وڭتايلى مازاسىزدىق» كىتابىنىڭ اۆتورى ۆەندي سۋزۋكي جاعىمسىز ەموسيالاردىڭ كۇشتى جاقتارىن قالاي قولدانۋ كەرەكتىگىن تالقىلايدى جانە مازاسىز سەزىمدەردى قالاي ونىمدىلىككە وزگەرتۋگە بولاتىندىعىن تۇسىندىرەدى.
- گارۆارد ۋنيۆەرسيتەتى جانىنداعى يننوۆاسيالىق ءبىلىم بەرۋ باعدارلامالارى ورتالىعىنىڭ عىلىمي قىزمەتكەرى توني ۆاگنەر يننوۆاتورلار بۋىنىن قالاي تاربيەلەۋ كەرەكتىگىن ايتىپ بەرەدى.
- LX Design پيونەرى، «ءبىلىم بەرۋ تاجىريبەسىن جوبالاۋ» تەرمينىنىڭ اۆتورى نيلس فلور ساندىق ءبىلىم بەرۋ سالاسى ءۇشىن ونىڭ ءمانى مەن ماڭىزدىلىعىن اشادى.
- الەمدەگى ەڭ ءىرى ءبىلىم بەرۋ ونلاين-پلاتفورماسى Coursera-نىڭ باس ديرەكتورى دجەفف مادجيونكالدا بولاشاقتاعى جۇمىس پەن قاجەت داعدىلار تاقىرىبىن كوتەرەتىن بولادى.
كونفەرەنسيانىڭ باعدارلامالىق ديرەكتورى جانە "ميسيس" عزتۋ ورتالىعىنىڭ ديرەكتورى نۋرلان كياسوۆتىڭ ايتۋىنشا، EdCrunch ماقساتى ءتيىمدى وقىتۋ ارقىلى اركىمگە ءوزىن-وزى دامىتۋعا قولداۋ كورسەتۋ بولىپ تابىلادى: «ءبىز مۇعالىمدەر مەن ساياساتكەرلەردەن باستاپ، كورنەكتى زەرتتەۋشىلەر مەن باعدارلاماشىلارعا دەيىنگى الەمنىڭ ۇزدىك ساراپشىلارىن بىرەگەي يدەيالارى مەن جاڭالىقتارىن كەڭ اۋديتورياعا جەتكىزۋگە شاقىرامىز. ەڭ كەرەمەت يدەيالار ۋنيۆەرسيتەت قابىرعاسىمەن، سىنىپ اياسىمەن نەمەسە كىتاپ سورەلەرىمەن عانا شەكتەلىپ قالماۋى كەرەك. ولاردى قولداپ، ءبولىسىپ، تالقىلاپ جانە قابىلداۋ مەن دامىتۋ قاجەت. ينۆەستورلار مەن قۇرىلتايشىلار، ساياساتكەرلر مەن فيلانتروپتار، وقىتۋشىلار، ستۋدەنتتەر جانە ءبىلىم بەرۋ تاجىريبەسىنە قىزىعۋشىلىق تانىتقاندار EdCrunch Glocal-دا بولۋى كەرەك».
كونفەرەنسيا قورىتىندىسى بويىنشا قاتىسۋشىلار ءارتۇرلى سالالاردا پراكتيكالىق تاجىريبە الىپ، كەلەسى سۇراقتارعا جاۋاپ تابا الادى: مەكتەپ جاسىنا دەيىنگى بالالارعا ارنالعان ەرتە دامۋ ادىستەمەسىن قالاي تاڭداۋ كەرەك، ولاردىڭ الۋان تۇرلىلىگىندە قالاي شاتاسىپ كەتپەۋگە بولادى؛ ساندىق تەحنولوگيالاردى باعىندىرۋ جولدارى مەن گادجەتتەردى بالالار قابىلەتتەرىنىڭ اكسەلەراتورىنا اينالدىرۋ؛ EdTech كومپانيالارىنىڭ ساپانى جوعالتپاستان بيزنەستى ماسشتابتاۋى؛ مەكتەپ جاسىنا دەيىنگى بالالاردان باستاپ، ۇزدىكسىز ءبىلىم دەڭگەيىنە دەيىنگى جوبالارعا ينۆەستيسيا تارتۋ جانە ولاردى ءارتۇرلى ءبىلىم بەرۋ جۇيەلەرىنە ءتيىمدى ەنگىزۋ جولدارى.
سونداي-اق سپيكەرلەر كەلەسى تاقىرىپتاردى تالقىلايتىن بولادى: داۋىستىق كومەكشىلەردەن باستاپ، جاساندى ينتەللەكتكە دەيىنگى ءبىلىم بەرۋدەگى جاڭا تەحنولوگيالاردىڭ الەۋەتى؛ پوستكوۆيدتىك كەزەڭدەگى مەكتەپ ءبىلىمىنىڭ ريەۆوليۋسيالىق فورماتتارى؛ نەيروبيولوگيانى ماكسيمالدى تيىمدىلىكتىڭ نەگىزى رەتىندە قاراستىرۋ؛ مەديا، ويىن-ساۋىق، سپورت سالالارىنداعى ءبىلىم بەرۋ كەڭەستەرى مەن EdTech-تەگى جاھاندىق جانە جەرگىلىكتى ترەندتەر.
EdCrunch Glocal شاراسىنىڭ ۇيىمداستىرۋشىلارى قازاقستان رەسپۋبليكاسى ءبىلىم جانە عىلىم مينيسترلىگىنىڭ قولداۋىمەن الماتى قالاسىنىڭ اكىمدىگى، نازاربايەۆ زياتكەرلىك مەكتەپتەرى. باس سەرىكتەستەر – «Altyn Qyran Foundation» قوعامدىق قورى، «الماتىكىتاپ باسپاسى» جانە «ءسابي» قايىرىمدىلىق قورى.
تىركەلۋ جانە قوسىمشا اقپارات: edcrunch.online
ايتا كەتەيىك، ءبىرىنشى EdCrunch كونفەرەنسياسى 2014 جىلى ماسكەۋدە «ميسيس» ۇزتۋ-دىڭ قولداۋىمەن ءوتتى. حەدلاينەرى Coursera نەگىزىن قالاۋشى دافنا كوللەر بولدى. ءىس-شاراعا 1 500 ادام قاتىستى. ءبىرىنشى كونفەرەنسيانىڭ كۇن ءتارتىبى سيفرلىق تەحنولوگيالار مەن جوعارى ءبىلىم بەرۋدەگى جاڭا تاسىلدەرگە باسا نازار اۋداردى. كەلەسى جىلدارى EdCrunch ءبىلىم بەرۋدىڭ باسقا دا دەڭگەيلەرىن (مەكتەپكە دەيىنگى، مەكتەپ، جوعارى، كورپوراتيۆتى جانە EdTech ستارتاپتارىنا ارنالعان باعىتتا) اۋقىمدى قامتىدى. بۇگىندە كونفەرەنسيا ارالاس فورماتتا: كوزبە-كوز جانە الەمنىڭ بىرنەشە ەلىنىڭ ونلاين-ستۋديالارىنىڭ قوسىلۋىمەن وتەدى.