الماتىدا مەديسينالىق-الەۋمەتتىك مەكەمەلەردىڭ قىزمەتكەرلەرىنە 2015 جىلدان بەرى العاش رەت لاۋازىمدىق جالاقىسىنا 30% ۇستەمەاقى قوسىلادى، دەپ حابارلايدى aqshamnews.kz.
بۇل شەشىم ءماسليحاتتىڭ XXVIII سەسسياسىندا دەپۋتاتتار تاراپىنان قولداۋ تاپتى. قوسىمشا تولەمدەردى 1 632 قىزمەتكەر الادى، الايدا مەديسينا قىزمەتكەرلەرىنە بۇل وزگەرىس قاتىستى ەمەس.
الەۋمەتتىك قىزمەتكەرلەردىڭ جۇمىسى ماڭىزدى بولعانىمەن، ولاردىڭ جالاقىسى تومەن دەڭگەيدە قالىپ وتىر. ۇستەمەاقىنىڭ ەنگىزىلۋى قىزمەتكەرلەردىڭ ىنتاسىن ارتتىرىپ، الەۋمەتتىك مەكەمەلەردەگى كادر تۇراقتىلىعىن قامتاماسىز ەتەدى.باۋىرجان جاۋباسوۆ، الماتى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى: «جالاقىنىڭ تومەن بولۋىنا بايلانىستى الەۋمەتتىك قىزمەتكەرلەر اراسىندا بىلىكتى مامانداردىڭ كەتۋى بايقالادى. بۇعان كاسىبي كۇيزەلىس پەن جەكە سەكتورداعى جوعارى جالاقى باسەكەلەستىگى اسەر ەتەدى».
قازىرگى ۋاقىتتا الماتىدا 13 الەۋمەتتىك مەكەمە جۇمىس ىستەيدى. ولار ەرەكشە قاجەتتىلىگى بار ادامدارعا، جالعىزباستى قارتتارعا جانە ومىرىندە قيىندىق بولىپ جاتقان ازاماتتارعا كومەك كورسەتەدى.