الماتىدا ناۋرىز مەرەكەسىندە ەڭ ءىرى حور ابايدىڭ شىعارمالارىن ورىندايدى جانە مەرەكەلىك كونسەرتتەر مەن قويىلىمدار بولادى
ناۋرىز مەيرامى جانە اباي قۇنانباي ۇلىنىڭ 180 جىلدىعى اياسىندا الماتىدا ۇلى ويشىل جانە اقىننىڭ شىعارمالارى ەڭ اۋقىيدى حورمەن ورىندالادى. 22 ناۋرىز كۇنى ساعات 9:00-دە اباي داڭعىلى بويىندا، اباي اتىنداعى الاڭنان باستاپ نازاربايەۆ داڭعىلىنا دەيىن 5000-نان استام ادام جينالادى. ولاردىڭ قاتارىندا تانىمال سوليستەر، ب. بايقاداموۆ اتىنداعى مەملەكەتتىك حور كاپەللاسىنىڭ ارتيستەرى، پ. چايكوۆسكيي اتىنداعى الماتى مۋزىكالىق كوللەدجىنىڭ ستۋدەنتتەرى، قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى، سونداي-اق قالا تۇرعىندارى مەن قوناقتارى بولادى.
ساعات 9:30-دا حور ۇلى اقىن اباي قۇنانباي ۇلىنىڭ «كوزىمنىڭ قاراسى»، «جەلسىز تۇندە جارىق اي» جانە «ايتتىم سالەم، قالامقاس» شىعارمالارىن قوسىلىپ شىرقايدى.
بۇل سيمۆوليكالىق پەرفورمانس ناۋرىز مەرەكەسىنىڭ – جاڭارۋ، ۇيلەسىم جانە رۋحاني بىرلىكتىڭ بەلگىسى بولماق. مىڭداعان ادامنىڭ داۋسى ءبىر تولقىندا ۇندەسىپ، قالانى ۇلتتىق مۇرا مەن مادەني ۇلىلىقتىڭ رۋحىمەن تولتىرادى.
سونداي-اق، 22 ناۋرىز كۇنى ساعات 10:30-دان 21:00-گە دەيىن اباي الاڭىندا «جاڭا عاسىر» تەاترى ارتيستەرىنىڭ قويىلىمدارى، تانىمال انشىلەردىڭ ءان شاشۋى جانە ءتۇرلى ءىس-شارالار وتەدى. رەسپۋبليكا سارايىنىڭ الدىنداعى ساحنادا «Steppe sons» توبى، ءجاميليا سەركەبايەۆا، «Tumar» توبى، «ۇلى دالا قىزدارى» توبى، نۇرجان تاجىكەنوۆ، «جۇمىر قىلىش» توبى، «ILIGAI» توبى، «مۋزارت Life» دۋەتى، «Aldaspan» توبى، سونداي-اق بيبىگۇل قيلىمحان، دياس مۇراتحان، ساندۋعاش ستامعازييەۆا، تىلەك بازاروۆ، مارال اناربەك، قايراتبەك بەكتۇرسىن، «الاتاۋ» ءداستۇرلى ونەر تەاترىنىڭ ارتيستەرى جانە باسقا دا تانىمال ارتيستەر ونەر كورسەتەدى.