الماتىدا الەۋمەتتىك نىساندار قاي جەردە بوي كوتەرەدى؟

الماتى قالاسىنىڭ تاريحي ورتالىعىنىڭ شەكاراسىن بەلگىلەۋ ماسەلەلەرى باسقارمانىڭ ەرەكشە باقىلاۋىندا.

وڭىرلىك كوممۋنيكاسيالار قىزمەتىنىڭ ونلاين بريفينگىندە الماتى قالالىق جەر قاتىناستارى باسقارماسىنىڭ باسشىسى ارداق سامامبەتوۆ اتقارىلىپ جاتقان شارالارعا توقتالدى، دەپ حابارلايدى Almaty-akshamy.kz.

ارداق سامامبەتوۆ جۋرناليستەرگە قالا اكىمىنىڭ تاپسىرمالارى قالاي ورىندالىپ جاتقاندىعىن ايتتى.

 «نۇكتەلى قۇرىلىس سالۋعا جول بەرمەۋ ماقساتىندا تاريحي ورتالىقتىڭ شەكاراسى بەلگىلەندى، ونىڭ شەگىندە مەملەكەت مۇقتاجى ءۇشىن الىپ قويۋعا جانە ساتىپ الۋعا جاتاتىن 7 ۋچاسكە انىقتالدى. ولاردىڭ ورنىندا اباتتاندىرۋ، كوگالداندىرۋ جۇمىستارى جۇرگىزىلەدى. قازىرگى ۋاقىتتا 4 جەر تەلىمى ساتىپ الىندى»، - دەپ مالىمدەدى ا.سامامبەتوۆ.

 ماسەلەن، ەمحانا سالۋ ماقساتىندا ليەۆيتان كوشەسىنىڭ وڭتۇستىگىنەن، گاگارين داڭعىلىنىڭ باتىسىنان جەر ۋچاسكەسى تاركىلەندى. سونىمەن قاتار، حالىقتى ساپالى مەديسينالىق قىزمەتپەن قامتاماسىز ەتۋ ءۇشىن ءال-فارابي داڭعىلىنىڭ وڭتۇستىگىنە قاراي جانە سىرعابەكوۆ كوشەسىنىڭ شىعىسىنا قاراي 500 كەلۋشىگە ارنالعان ەمحانا سالۋ ءۇشىن 1،3 گەكتار جەر تەلىمى ءبولىندى.

 سونىمەن قاتار، شااج، ءال-فارابي داڭعىلى، ساين كوشەسى، جاندوسوۆ كوشەسىنىڭ وڭتۇستىگىنە قاراي اۋىل شارۋاشىلىعى ماقساتىنداعى جەر تەلىمدەرىن بولۋگە جانە تاۋ بوكتەرىندە از قاباتتى ۇيلەر سالۋعا تىيىم سالدى.

 وكق بريفينگىندە مەملەكەتتىك جەر قورىن ۇلعايتۋ ماقساتىندا جالپى اۋدانى 19،54 گەكتار 22 جەر ۋچاسكەسى رەزەرۆكە قويىلعانى بەلگىلى بولدى.

 2022 جىلدىڭ سوڭىنا دەيىن سەيفۋللين داڭعىلى مەن جانسۇگىروۆ كوشەسىنىڭ قيىلىسىندا كولىك ايىرىعىن سالۋ، سونداي-اق ساين كوشەسىن رىسقۇلوۆ داڭعىلىنان موڭكە بي كوشەسىنە دەيىن تەسۋ جانە اباي داڭعىلىن قالا شەكاراسىنا دەيىن تەسۋ (اباي ساياجايلارى) جوباسى بويىنشا جەر تەلىمدەرىن ساتىپ الۋدى اياقتاۋ جوسپارلانۋدا.

كەلەسى جىلى جقب مەدەۋ اۋدانىندا رىسقۇلوۆ داڭعىلى بويىنداعى اينالمالى ەستاكادا قۇرىلىسىن سالۋ، ياسساۋي كوشەسىنەن قالا شەكاراسىنا دەيىن تولە بي كوشەسىن ۇزارتۋ، ف. وڭعارسىنوۆا كوشەسىنەن قالا شەكاراسىنا دەيىن رىسقۇلوۆ داڭعىلىن ۇزارتۋ، مومىش ۇلى كوشەسىنەن قالا شەكاراسىنا دەيىن جۇبانوۆ كوشەسىن ۇزارتۋ جانە مەتروپوليتەن سالۋ («قالقامان» ستانسياسى) جوبالارى بويىنشا جەر تەلىمدەرىن ساتىپ الۋدى اياقتاۋدى جوسپارلاپ وتىر.