الماتىداعى "پاراسات" الەۋمەتتىك قىزمەتتەر ورتالىعىندا قالانىڭ الەۋمەتتىك قىزمەت كورسەتۋ ورتالىقتارى جۇيەسىندە تۇڭعىش رەت تىگىن جانە توقىما شەبەرحاناسى اشىلدى. جوبا وزگە الەۋمەتتىك ورتالىقتاردا ازىرگە بالاماسى جوق بىرەگەي باستاما بولىپ وتىر.
الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆتىڭ ايتۋىنشا، شەبەرحانا ەرەكشە قاجەتتىلىگى بار ازاماتتاردىڭ ەڭبەك ارقىلى وڭالۋىنا، الەۋمەتتىك بەيىمدەلۋىنە جانە كاسىبي تۇرعىدا قالىپتاسۋىنا جاعداي جاساۋ ماقساتىندا قۇرىلعان.
ءىس-شارا اياسىندا قاتىسۋشىلارعا تىگىن جانە توقىما شەبەرحاناسىنىڭ جۇمىسى تانىستىرىلىپ، زاماناۋي جابدىقتار كورسەتىلدى. سونىمەن قاتار قولمەن جانە ماشينامەن تىگۋ، توقىما ماتەريالدارىمەن جۇمىس ىستەۋ، توقۋ بويىنشا تاجىريبەلىك وقۋ ساباقتارى وتكىزىلدى. بۇل ساباقتار قىزمەت الۋشىلاردىڭ ەڭبەك جانە تۇرمىستىق داعدىسىن دامىتۋعا، باستاپقى كاسىبي قابىلەتىن قالىپتاستىرۋعا باعىتتالعان. ءىس-شاراعا 50 ادام قاتىستى.
ەسكە سالا كەتەيىك، "پاراسات" الەۋمەتتىك قىزمەت ورتالىعى" كمم ەرەكشە قاجەتتىلىگى بار بالالارعا جانە 18 جاستان اسقان ەرەكشە قاجەتتىلىگى بار ادامدارعا جارتىلاي ستاسيونارلىق كۇندىزگى جاعدايدا جانە ۇيدە ارناۋلى الەۋمەتتىك قىزمەت كورسەتەدى. ورتالىق بەيىندى مامانداردىڭ قاتىسۋىمەن كەشەندى وڭالتۋ جانە بەيىمدەۋ كومەگى كورسەتىلەدى.
ورتالىقتىڭ نەگىزگى ماقساتى - كورسەتىلەتىن ارناۋلى الەۋمەتتىك قىزمەتتەردىڭ ساپاسى مەن تيىمدىلىگىن ارتتىرۋ، قىزمەت الۋشىلاردىڭ ومىرلىك جانە ەڭبەك داعدىسىن دامىتۋ، ولاردىڭ الەۋمەتتەنۋى، تۇرمىستىق بەيىمدەلۋى، وڭالۋى جانە قوعامعا ۇيرەنىسۋى ىقپال ەتۋ.
بەلگىلەنگەن ستاندارتتارعا سايكەس ورتالىق الەۋمەتتىك-تۇرمىستىق، مەديسينالىق، پسيحولوگيالىق، پەداگوگيكالىق، ەڭبەك، مادەني، ەكونوميكالىق جانە قۇقىقتىق قىزمەت تۇرلەرىن ۇسىنادى.