الماتىدا جەكە تۇرعىن ءۇي كەشەنىنىڭ ءبىرىنشى قاباتىندا العاش رەت مەملەكەتتىك بالاباقشا اشىلدى، دەپ حابارلايدى almaty-akshamy.kz
بوستاندىق اۋدانىنداعى مەكتەپكە دەيىنگى ۇيىمداردا ورىن تاپشىلىعىن تومەندەتۋ ماقساتىندا الماتى قالاسى اكىمدىگى مەن قۇرىلىس كومپانيالارى اراسىندا جاسالعان مەموراندۋم اياسىندا سالىنعان №189 مەملەكەتتىك بالاباقشا اشىلدى. «اكۆارەل» تۇرعىن ءۇي كەشەنىنىڭ ءبىرىنشى قاباتىندا ورنالاسقان بالاباقشا 300 ورىنعا ەسەپتەلگەن، بالالاردىڭ دەنساۋلىعىن، ءوي-ورىسىن، ويلانۋى مەن لوگيكاسىن دامىتۋعا ارنالعان زاماناۋي قۇرىلعىلارمەن جابدىقتالعان.
بالاباقشادا ينكليۋزيۆتى ءبىلىم بەرۋ ءۇشىن بارلىق جاعداي جاسالعان، «روبوتوتەحنيكا»، «سەنسوريكا»، «قولونەر» جانە «مونتەسسوري» كابينەتتەرى اشىلدى. ويىن الاڭدارىندا ويىن كەشەندەرى مەن كولەڭكەلى شاتىرلار ورناتىلعان. بالالاردىڭ يممۋنيتەتىن نىعايتۋ ماقساتىندا بالاباقشا «تۇز شاحتاسىمەن» جابدىقتالعان. بالالاردىڭ قاۋىپسىزدىگىن قامتاماسىز ەتۋ ءۇشىن بالاباقشا بەينەباقىلاۋ جۇيەسىمەن جابدىقتالعان.
الماتى قالاسى ءبىلىم باسقارماسىنىڭ مالىمەتىنشە، مەكتەپكە دەيىنگى ۇيىمداردا ورىن تاپشىلىعىن تومەندەتۋ بويىنشا جۇمىستار ەرەكشە باقىلاۋدا. اعىمداعى جىلدىڭ باسىنان باستاپ قالا بويىنشا 2 630 ورىندىق 46 جەكە بالاباقشا اشىلدى، اعىمداعى جىلدىڭ سوڭىنا دەيىن 320 ورىندىق 2 مەملەكەتتىك جانە 2600 ورىندىق 29 جەكە بالاباقشا اشۋ جوسپارلانۋدا.
2022 جىلى 7179 ورىندىق 109 بالاباقشا اشىلدى، ونىڭ ىشىندە 120 ورىندىق 1 مەملەكەتتىك جانە 7059 ورىندىق 108 جەكە بالاباقشا. وسىلايشا، 2022 جىلدان باستاپ 10 109 ورىندىق 156 بالاباقشا اشىلدى.
سونىمەن قاتار، بالالاردى مەكتەپكە دەيىنگى تاربيەمەن جانە وقىتۋمەن قامتۋدى ارتتىرۋ ءۇشىن جەكەمەنشىك بالاباقشالاردا مەملەكەتتىك ءبىلىم بەرۋ تاپسىرىسىن ورنالاستىرۋ بويىنشا كونكۋرس وتكىزىلەدى. 2023 جىلدىڭ باسىنان باستاپ مەكتەپكە دەيىنگى تاربيە مەن وقىتۋعا 3 801 ورىنعا مەملەكەتتىك ءبىلىم بەرۋ تاپسىرىسىن ورنالاستىرۋعا 2 كونكۋرس وتكىزىلدى.