مەكتەپكە دەيىنگى ءبىلىم بەرۋ سالاسىنداعى باستى ماسەلە – بالاباقشالارداعى ورىن تاپشىلىعى
بۇگىنگى كۇنى 1-6 جاس ارالىعىنداعى 42 460-تان استام بالا، 3-6 جاس ارالىعىنداعى 18 865 بالا كەزەكتە تۇر. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى ءبىلىم باسقارماسىنىڭ مەكتەپكە دەيىنگى ءبىلىم بەرۋ ءبولىمىنىڭ باسشىسى ءاليا ساعييەۆا ءمالىم ەتتى، دەپ حابارلايدى Almaty-akshamy.kz.
ءبىلىم باسقارماسىنىڭ مالىمەتىنشە، قازىرگى تاڭدا قالادا 77261 بالانى قامتيتىن 910 مەكتەپكە دەيىنگى ۇيىم جۇمىس ىستەيدى، ونىڭ ىشىندە 193 مەملەكەتتىك (39 214 بالا) جانە 717 جەكەمەنشىك (38 047 بالا). 2 جاستان 6 جاسقا دەيىنگى بالالاردى مەكتەپكە دەيىنگى تاربيەمەن جانە وقىتۋمەن قامتۋ – 71،9%، 3-6 جاس ارالىعىنداعىلاردى – 92،9% قۇرايدى.
«مەكتەپكە دەيىنگى ۇيىمداردا كەزەكتىڭ ۇزاق بولۋىنا، ىشكى كوشى-قوننىڭ جۇرۋىنە جانە جىل سايىن تۋۋ كورسەتكىشىنىڭ ارتۋىنا بايلانىستى مەكتەپكە دەيىنگى ۇيىمدارداعى ورىندارعا دەگەن قاجەتتىلىك وتە وزەكتى بولىپ قالا بەرەدى. وسى ورايدا الماتى قالاسى اكىمدىگى مەملەكەتتىك بالاباقشالاردى اشۋ باعىتىندا اۋقىمدى جۇمىستار اتقارىپ جاتىر»، – دەدى ءا.ساعييەۆا.
بايانداماشى 2022-2024 جىلدار ارالىعىندا 16 مىڭنان استام ورىنعا 188 جەكەمەنشىك بالاباقشا (2022 جىلى – 6 مىڭ ورىنعا 60 بالاباقشا، 2023 جىلى – 4950 ورىنعا 71 بالاباقشا، 2024 جىلى – 5540 ورىندىق 57 بالاباقشا) اشۋ جوسپارلانىپ وتىرعانىن اتاپ ءوتتى.
سونىمەن قاتار، 2022 جىلى كەزەكتە تۇرۋ ماسەلەسىن كەزەڭ-كەزەڭمەن قىسقارتۋ جانە بالالاردى مەكتەپكە دەيىنگى تاربيەمەن قامتۋدى ارتتىرۋ ماقساتىندا "جاس قانات" ىقشاماۋدانىندا 280 ورىندىق بالاباقشا سالىنۋدا، سونداي-اق جەتىسۋ اۋدانىندا 280 ورىندىق بالاباقشا ساتىپ الىندى. 2023 جىلى اۋەزوۆ اۋدانىندا 720 ورىندىق 3 بالاباقشا سالۋ، 240 ورىندىق بالاباقشا ساتىپ الۋ جوسپارلانۋدا. 1380 ورىندىق 5 بالاباقشانىڭ قۇرىلىسى 2024 جىلعا جوسپارلانعان. 600 ورىندىق تاعى 2 بالاباقشانىڭ قۇرىلىسى 2025 جىلعا جوسپارلانعان.
سونىمەن قاتار، جۋرناليستەردىڭ سۇراقتارىنا جاۋاپ بەرگەن ءا.ساعييەۆا قالاداعى مەكتەپكە دەيىنگى ۇيىمداردا ماماندار تاپشىلىعى ماسەلەسىن دە اتاپ ءوتتى.
«تاربيەشىلەر تاپشىلىعى شامامەن 35-40 پايىزدى قۇرايدى، ونىڭ ىشىندە مامانداندىرىلعان مەكتەپكە دەيىنگى ءبىلىم بەرۋ ۇيىمدارى بار، سونىمەن قاتار لوگوپەد، دەفەكتولوگ، مۋزىكالىق جەتەكشى، مەدبيكە، ەسەپشى، تاربيەشى كومەكشىسى سياقتى ماماندار قاجەت»، - دەدى ءا.ساعييەۆا.
سونىمەن قاتار، ونىڭ ايتۋىنشا، قالانىڭ ورتالىق اۋداندارىندا بالاباقشا سالۋعا جەر تاپشىلىعى دا وزەكتى ماسەلە بولىپ وتىر. بۇل جاعدايعا جەكە مەكتەپكە دەيىنگى ۇيىمداردىڭ مەملەكەتتىك ءبىلىم بەرۋ تاپسىرىسى اياسىندا جۇمىس ىستەيتىن بيۋدجەتتىك قاراجاتتى جالعان ەسەپپەن تولتىرۋ، باسقا وڭىرلەردە تۇراتىن بالالاردى بالاباقشاعا جولداما الۋ سالدارىنان يگەرىپ الۋى دا كەرى اسەرىن تيگىزۋدە.