الماتىدا ەرەكشە قاجەتتىلىگى بار ادامدار تەاتر ونەرىن تەگىن مەڭگەرە الادى. «الاتاۋ» ءداستۇرلى ونەر تەاترى مۇمكىندىگى شەكتەۋلى جاندارعا ارنالعان 10 ينكليۋزيۆتى ۇيىرمە اشىپ، بي، ءان ايتۋ، ىم تىلىندە ءان ايتۋ، كۇلدىرگى ويىندا جانە ساڭىراۋلارعا ارنالعان داكتيلولوگيا ونەرىنە ۇيرەتەدى. بۇل تۋرالى الماتى وڭىرلىك كوممۋنيكاسيالار قىزمەتىنىڭ باسپا ءسوز ءماسليحاتىندا تەاتر ديرەكتورى ماقسات نۇرالييەۆ مالىمدەدى.
ونىڭ ايتۋىنشا، جوعارى ناتيجە كورسەتكەن قاتىسۋشىلار شىعارماشىلىق ۇجىمداردىڭ قۇرامىنا ەنىپ، الماتىلىق تەاتر ساحناسىندا ونەر كورسەتۋگە، سونداي-اق حالىقارالىق بايقاۋلارعا قاتىسىپ، الەمدىك دەڭگەيدە تالانتىن تانىتۋعا مۇمكىندىك الادى.
«ساباقتار اپتاسىنا 3 رەت، 2 ساعاتتان وتەدى. وقىتۋدى تەاتر ارتيستەرى مەن قازاق زاعيپتار جانە ساڭىراۋلار قوعامىنىڭ جەتەكشىلەرى جۇرگىزەدى. قازىرگى تاڭدا ءبىزدىڭ ستۋديالار مەن ۇيىرمەلەردە شامامەن 200 ادام ءبىلىم الىپ جاتىر. سونىمەن قاتار، الماتى قالاسى اكىمدىگى مادەنيەت باسقارماسىنىڭ قولداۋىمەن 130-دان استام ءىس-شارا وتكىزدىك. ولاردىڭ ىشىندە ەرەكشە قاجەتتىلىگى بار ادامدارعا ارنالعان حالىقارالىق فەستيۆالدەر مەن بايقاۋلار، قايىرىمدىلىق كونسەرتتەر، دارىستەر مەن مادەنيەت قايراتكەرلەرىمەن كەزدەسۋلەر بار. ءبىز ينكليۋزيۆتى ورتا قالىپتاستىرۋعا تىرىسامىز، مۇندا ونەر ادامدار سونىڭ اراسىنداعى ناعىز بايلانىس قۇرالىنا اينالادى. ءبىزدىڭ ارتيستەرىمىز – رۋحتىڭ بەرىكتىگى مەن شەكسىز مۇمكىندىكتەردىڭ ايقىن دالەلى. بۇگىندە يتاليا، تۇركيا، قىرعىزستان، تاجىكستان جانە مالايزيادا وتكەن حالىقارالىق بايقاۋلاردا جەڭىمپاز اتانعان قاتىسۋشىلارىمىز بار. بۇل جوبالارعا ءبىزدىڭ ونەرپازدار اكىمدىكتىڭ قولداۋىمەن قاتىستى»، – دەدى ماقسات نۇرالييەۆ.
ايتا كەتەيىك، «الاتاۋ» ءداستۇرلى ونەر تەاترىندا «كورۋ جانە ەستۋ قابىلەتى بۇزىلعان ادامدارعا مادەني دەمالىستى ۇيىمداستىرۋ» ءبولىمى بار. وندا زاعيپ جانە ساڭىراۋ جاندار قىزمەت اتقارادى.