مەملەكەت باسشىسىنىڭ قايتارىلعان اكتيۆتەر ەسەبىنەن الەۋمەتتىك ماڭىزى بار جوبالاردى ىسكە اسىرۋ جونىندەگى تاپسىرماسىن ورىنداۋ اياسىندا ۇكىمەت ارنايى مەملەكەتتىك قوردان وبلىستىڭ كەربۇلاق اۋدانى كوكساي اۋىلىندا جاڭا مەكتەپ قۇرىلىسىنا 1،4 ملرد تەڭگە ءبولدى.
قازىرگى ۋاقىتتا ەلدى مەكەندە ءبىر مەكتەپ جۇمىس ىستەيدى، وندا ەكى اۋىسىمدا 53 بالا وقيدى. بۇل رەتتە وقۋ ورنىندا سپورت جانە اكت زالدارى، اسحانا جوق، پاندىك كابينەتتەر جەتىسپەيدى. جاڭا مەكتەپ 60 ورىنعا ارنالعان. عيمارات زاماناۋي ءبىلىم بەرۋ ستاندارتتارىنا سايكەس جابدىقتالعان. نىساننىڭ قۇرىلىسى ءبىلىم بەرۋدىڭ قولجەتىمدىلىگى ماسەلەسىن جانە مەكتەپتە ورىن تاپشىلىعى ماسەلەسىن شەشۋگە مۇمكىندىك بەرەدى: ءقازىر اۋىلدا 7 جاسقا دەيىنگى 28 تۇرعىن بار.
بۇگىنگى تاڭدا ۇكىمەت ارنايى مەملەكەتتىك قوردان الەۋمەتتىك ماڭىزى بار نىساندار سالۋعا 58 ملرد تەڭگە ءبولدى. اتاپ ايتقاندا، 5 مەكتەپ، ونىڭ ىشىندە ءبىر مۋزىكالىق، 2 سپورت كەشەنى، كوپفۋنكسيونالدى اۋرۋحانا كەشەنى، جاتاقحانا، 2 بالاباقشا جانە جەدەل مەديسينالىق جاردەم ستانساسى بار. «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ سۋبەكتىلەرىنىڭ قاراجاتى ەسەبىنەن ارقالىق، استانا، الماتى قالالارىندا ءبىرقاتار الەۋمەتتىك ينفراقۇرىلىم نىسانىنىڭ قۇرىلىسى جۇرگىزىلۋدە.