الماتىدا الاياقتىققا قاتىسى بار كۇدىكتى ۇستالدى

الماتى پوليسياسى جۇرگىزۋشى كۋالىگىن الىپ بەرەمىن دەپ الاياقتىق قىلمىسىن جاساعان كۇدىكتىنى ۇستادى.

الاياقتىق دەرەگى بويىنشا ناۋرىزباي اۋداندىق پوليسيا باسقارماسىنا جابىرلەنۋشىلەردەن 5 ارىز ءتۇستى، دەپ حابارلايدى Almaty-akshamy.kz Polisia.kz-كە سىلتەمە جاساپ.

الدىن الا مالىمەت بويىنشا، جاس جىگىت جۇرگىزۋشى كۋالىگىن راسىمدەۋدە “ءوز كومەگىن” ۇسىنعان.

«جەدەل شارالار جۇرگىزىلىپ، كۇدىكتى جىگىت قاماۋعا الىندى. ءىس جۇرگىزۋ بارىسىندا ونىڭ وسىعان ۇقساس بەس ەپيزودقا قاتىسى بار بولۋى مۇمكىن ەكەندىگى انىقتالدى. ءوز قىزمەتى ءۇشىن كۇدىكتى 100-دەن 300 مىڭ تەڭگەگە دەيىن الدىن الا تولەم سۇراعان. 26 جاستاعى ج.ەسىمدى ازاماتقا قاتىستى ق ر قك-نىڭ 190-بابى 3-بولىگى (الاياقتىق) بويىنشا قىلمىستىق ءىس تىركەلدى»، – دەدى ناۋرىزباي اۋداندىق پوليسيا باسقارماسىنىڭ باستىعى مۇحامەدالى سەيسەن ۇلى.

ءتارتىپ ساقشىلارى الدانعانداردىڭ كوپ بولۋى مۇمكىن ەكەندىگىن جوققا شىعارمايدى. ولار ازاماتتاردى ۇستالعان ادامنىڭ سۋرەتىنە مۇقيات قاراپ، ونى تانىعان جاعدايدا مىنا تەلەفون نومىرلەرىنە حابارلاسۋعا شاقىرادى: 8 707-808-75-88؛ 8-747-699-70-02. ق ر قپك-نىڭ 201-بابىنا سايكەس، تەرگەۋ مۇددەسىن كوزدەيتىن وزگە دە مالىمەتتەر جاريا ەتۋگە جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىقبۇزۋشىلىق جاساۋدا كىناسىز دەپ تانىلادى.